【FF特首選戰】從特首選舉看雲格去留

撰文:世界波
出版:更新:
今年適逢香港特首選舉,而雲格都會喺今年約滿,暫時睇走勢,廠迷都可以有定心理準備搵新帥。都係嗰句,選特首同選新教頭都無得球迷揀,最多就出嚟做下「民意」,但點會咁如人意?
世界波
雲格未能帶領球隊走出低潮,令球迷高呼「雲格滾蛋」。(Getty Images)

洛迪高@世界波

兵敗安聯球場5個1皮後,廠迷要求雲格(Arsene Wenger)雲爺爺下台嘅呼聲愈嚟愈高,似乎雲爺爺已經用盡咁多年嚟累積嘅功勞,咁啱今年喺雲爺爺合約最後一年,佢嘅前弟子,中堅基昂(Martin Keown)就講到雲格即時下台應該無可能,但如果(續到約)下季仲見到佢就會覺得好出奇。雲爺爺而家外憂內患,大家焦點已經係邊個可以做下任廠帥…

不過你心愛嘅球隊選帥,同香港選特首無咩分別,普通市民(球迷)都無得話事,唯有求「阿爺」(球會管理層)生生性性揀個啱嘅人算喇…

洛迪高講講下,發現原來廠迷除咗呢樣外,其實依家個心路歷程或個性都有啲似香港人添?唔信?睇埋成篇就知啦!

留在Comfort Zone

啲人成日話,大部分香港人安於現狀,唔敢走出Comfort Zone,其實阿仙奴球迷早幾年何嘗唔係如此?同阿仙奴同香港一樣經歷過輝煌時代,但都因故受過困境,阿仙奴自然就係要起新球場。由於開支巨大,咁雲格慳住洗買人影響成績,都叫情有可原,而且連年有歐聯享有關收入,都算係功績。反正負債時目標係確保收入,又何必去換走一個幫手達到目標嘅人?雖然未能更進一步。

大部分香港人都一樣,覺得搵到食咪得囉,貿貿然作某種改變,唔止影響自己,仲影響成家,咁樣好咩?

當阿仙奴還完球場債之際,似乎拎返幾個冠軍先啱廠迷胃口,仲要唔係足總盃就夠!重拾英超,甚至挑戰歐聯,唔再16強出局先係依家目標!不過雲爺爺似乎都仲係令球迷失望,尤其係上年群雄倒下,由草莽英雄李斯特城奪冠嘅英超,雲格本來可以趁其他列強病,攞佢哋命,點知最後又係跟住劇本倒下。最後唯一成就係保持英超排名年年高過熱刺…既然依家再無龐大負債壓力,可以承受一下潛在嘅換帥陣痛期。

香港人亦都一樣,由於本地政府政策大多不以香港人為本位,真香港人嘅基本權益反而畀外來人剝削,既然依家隨時連食都搵唔到,年輕嘅向上流動力又因外憂內患受到嚴重影響,咁仲有咩可以輸,仲怕啲咩?而且唔少香港女仔話最想香港男仔有咩?係上進心呀!淨係想年年第4點得呀!

今年適逢香港特首選舉,而雲格都會喺今年約滿,暫時睇走勢,廠迷都可以有定心理準備搵新帥。(路透社)

點揀新帥

今年適逢香港特首選舉,而雲格都會喺今年約滿,暫時睇走勢,廠迷都可以有定心理準備搵新帥。都係嗰句,選特首同選新教頭都無得球迷揀,最多就出嚟做下「民意」,但點會咁如人意?

所謂「民意」,話事人心情好嗰陣,就可能聽下嘅…話說洛迪高有次聽深宵電台節目,有嘉賓講到中國對於未來香港特首嘅「挑選」有幾個要求:路線、民意及才能。阿仙奴請新帥,不妨由呢幾點參考下:

  1. 路線

雲爺爺要走,成績自然係最重要一點,尤其歐聯已經連續6年16強出局,睇怕今年都唔另外(首回合作客以1:5不敵拜仁,截稿前尚未踢次回合)…既然經濟壓力,係時候加大投資再求上進。

路線仲可以包括踢法,相信無人會話阿仙奴啲波唔好睇,但一啲缺點依然存在,所以年年阿仙奴劇本都近乎一樣…先係威係勢—跟住回落—稍一反彈—一瀉千里—急起直追。球員心理質素都一直為人詬病,或者整個施蒙尼(Diego Simeone)咁嘅鐵血主帥會有幫助?

  2. 民意

上面都提過,係特首選舉入面可能民意都有啲畀「阿爺」嘅參考價值,咁阿仙奴選帥,民意似乎無咁重要,至少路線同才能更重要,符合呢兩樣,自然就少反對喇。

  3. 才能

才能可以講緊兩樣野,好似執教成績咁,如果有好成績支持自然係代表有料,就好似上面講到嘅施蒙尼,或者RB萊比錫教練夏辛侯迪(Ralph Hasenhüttl)咁。另一樣就係踢法,如果本身踢法夠吸引,有自己哲學都算有才能嘅,就好似般尼茅夫領隊艾迪賀維(Eddie Howe)!

究竟下年開季,廠迷會唔會懷念爺爺?或者廠迷到而家都會有唔同意見,但好肯定嘅係,我哋都想香港「遠小人,親賢能」。

(文章純屬作者意見,不代表香港01立場。)
你可能感興趣