【FF特首選戰】劉備做特首,邊個做教育局長?

撰文:李聲揚
出版:更新:
劉備完全就係一個有野心但冇心機讀書自己撲水創業嘅窮L文青。
李聲揚
左起:曹操、孫權、劉備。(《三國志13》遊戲圖片)

頭盔:本文純係大話西遊,切莫認真。本文主要以「野史」《三國演義》為參考,唔係「正史」嘅《三國志》,因為《演義》多人識好多。而歷史係勝利者編寫,《三國志》嘅「正史」有幾「正」都仲有排拗。打算話我小說當史實嘅,唔使睇落去了,返屋企磨墨啦。

先熱下身,畀你諗下,魏吳蜀,曹操孫權劉備,天時地利人和,對應三個特首候選人,你會點配?

正路嘅對法,打機領教過曹操強橫實力嘅都知,曹操當然係最多提名票嘅林鄭,一個頂兩個,好打得,夠奸,有天時,可以挾天子(西環?)令諸侯嘛。好彩葉劉入唔到閘,否則可能要比個遼東公孫淵之類嘅角色比佢,想搞搞震最後畀林鄭,呀,曹魏收拾。

東吳孫權,碧眼紫髯鬼仔格,梗係薯片啦。番書仔係賣點,一度仲要拎美國護照,仲唔係地利?至於佢老死貪曾,聽聞叻仔意氣風發,但出名貪小便宜又小器,同周瑜有啲似。無巧不成話,周瑜大孫權7年,貪曾亦比薯片大7年。

至於胡官,就惟有係有人和嘅老好人劉備。記住,劉備係冇鬚嘅,唔信你睇返書點寫,唔好信電視同戲劇嘅造型,所以劉備唔可以係薯片。

《演義》愈睇愈冇癮,劉備孫權聯手都搞唔掂曹操,之後仲內鬨反面,最後齊齊亡國,返到現實,林鄭做特首都係比較多人估嘅結局。更堪玩味就梗係曹魏中途畀司馬氏食埋,三家歸晉(提早一國一制?),唔使爭。

歷史冇得改寫,但創作可以永恒。無數創作都想有「大團圓結局」,劉備一統天下。如果換落香港,劉備做特首,又會係咩過程咩結果?即管又FF一下,分開天時地利人和三方面講。留意,係FF真劉備,唔係胡官。

如果換落香港,劉備做特首,又會係咩過程咩結果?(《三國志13》遊戲擷圖)

天時方面,新一代應該幾buy劉備成個人成套價值觀。佢其實幾煩,成日有意無意賣弄漢室正宗,血統純正,但呢個正好符合部份本土新一代講嘅「血統論」。佢符符碌碌,好似冇樣叻(除咗識點人),但一樣做大佬,啱晒睇慣超級英雄片嘅新一代。佢細個屋企只係賣草鞋織草蓆,但見到棵桑樹都可以當係林寶堅尼發夢,「大個咗我一定做才俊開呢款車」,懶理長輩叫佢踏實啲,似足十個有十一個都話追夢嘅新一代。佢唔愛讀書,鍾意評馬論犬(馬會賭仔?),聽音樂睇靚衫,仲唔係偽文青?而最重要嘅係,佢點發跡嘅呢?點解有馬仔? 因為佢有金主,有商人畀錢佢!爭在未搞眾籌咋。劉備完全就係一個有野心但冇心機讀書自己撲水創業嘅窮L文青,報紙應該爭住訪問。

之後講地利。打機嘅應該記得,曹操幾時都係嗰個位,「真地利」嘅孫權更加成家在江東深耕多年(現在叫做「地區工作」,蛇齋餅糉)。唯獨係劉備,打游擊咁,唔同年代唔同劇本就去咗唔同位。最初就做義勇軍討伐黃巾(加入警隊打人定係光復上水踼篋就任君表述)還好,後來跟下呢個大佬又跟下嗰個社團, 都係走嚟走去,顛沛流離,咩「家鄉」根本一早淪陷。 

劉備做神州人球碌嚟碌去咁多年,轉捩點在邊?有兩個好出名嘅時刻。第一個就係「劉備借荊州,一借冇回頭」,第二個就係「三分天下」,赤壁之戰後,劉備入蜀。兩件事有乜共通點?就係兩個Airbnb主人家都引狼入室。而荊州劉表同益州(蜀)劉璋有乜共通點?答案就係兩個都姓劉!唔係爛gag,佢兩位都自居漢室後人,同姓三分親,點估到劉備唔熟唔食。

睇到呢度諗到乜?就梗係同文同種,甚至有人講同香港「命運共同體」嘅台灣同澳門!香港淪陷,就梗架啦,但唔緊要,心中有香港邊度都係香港,成班遺民可以流亡海外,搵台灣澳門同胞收容你,搵機會東山再起!台灣澳門讀者放心,劉備都留劉表劉璋一條生路,冇殺佢哋的。

最後講人和。劉備做特首,咁諸葛亮當然係眾人奶媽嘅政務司司長。不過三國時期真勇武,關羽張飛趙雲馬超黃忠魏延,成班武夫去到呢個年代,冇咁多仗打,做乜好?咁多局都要搵局長嘛。

劉備做特首,關羽張飛趙雲等武將又有什麼好做?(《真三國無雙.英杰傳》遊戲擷圖)

先講關二哥關羽,雖則好多關公災難,但都唔好要關二哥做PR啦,佢出名小器。黑白兩道都拜關公,點講都係警務處長,況且關公夠叠馬,你睇劇睇畫都會見到佢馬仔關平周倉?啱晒而家要擴充嘅警隊。不過關二哥個人其實有義氣但冇法治精神,分分鐘會好似華容道義釋曹操咁放生犯人然後返差館自首,律政司司長(諸葛亮做埋?)記得睇緊啲。我亦好肯定你叫關公出嚟道歉一定係天方夜譚。一唔係佢做保安局,警隊呢啲交比其他手下啦。

雖則關二哥係武聖,但寸嘴唔肯認低威嘅佢會同人講「我濕濕碎,我義弟張飛仲好打」,照計張飛應該仲好抽。可惜張飛就比關公更冇領導材能,又鍾意打人,自己友都打。聽聞仲係張開眼瞓覺,人肉CCTV,照計都係做懲教署好啲。除非建國有軍隊總司令啦。

趙雲又係一身是膽,現代叫做「好打得」。長阪坡百萬軍中藏阿斗,救返劉備個仔劉禪,後來孫權同劉備反面,想搶阿斗,又係趙雲搶返。之前佢仲有靚女送上門都唔要嘅優良往績。趙雲絶對係年青人典範,做教育局實好過吳克儉。

之後呢兩位就有趣。先講馬超,擺明係商務及經濟發展局,仲要係專門負責中小企。點解?馬超嘅故事,就係佢老豆馬騰(可惜唔係馬化騰)成立檔中小企比人買咗,佢由太子爺變到入大公司打工跟劉備,鬱鬱不得志畀人投閒置散, 中小企困境由佢最清楚。推廣旅遊佢都可做埋,馬超有羌人血統,鬼佬當佢神咁拜,若果係香港建國嘅做埋外交部長都仲得。

魏延呢?最出名乜?反骨仔。但亦有人記得佢提出子午谷偷襲曹操,最後畀諸葛亮ban咗佢呢條絶世好橋。呢啲咁大無胃嘅人,梗係做創新及科技局。至於反骨同人夾唔嚟周圍惹火頭?啱晒。科網奇才由Steve Jobs(見過未都好)到Elon Musk到Mark Zuckerberg邊個唔係怪怪雞雞麻麻煩煩?

最後,老黃忠,最出名就係老,同埋老。凡老皆廢老嘅年代,有冇部門專搞安老院?或者勞工及福利局啱晒,再唔係積金局都好。

三國最後還是盡歸司馬氏。(《火鳳燎原》漫畫封面)

FF完,最後一句,記住,最後都係三家歸司馬氏,奸雄曹操及其後人,都未夠司馬氏奸。每個小朋友睇《演義》都係愈睇愈冇癮的。對,睇《水滸傳》都係愈睇愈冇癮,人生都係咁回事。

(文章純屬作者意見,不代表香港01立場。)
你可能感興趣