【興德學校.博評】校長哭訴無功都有勞:世上有不卸責的高層嗎?

撰文:詩寧
出版:更新:

屯門興德學校被指管理不善,學校管理層今日就開咗個記者會回應,我本來無咩興趣睇,突然聽到校長陳章萍一邊喊一邊形容自己對份工「無功都有勞」、又經歷好多苦與樂、「有血有淚」……聽到呢度我不禁留心起嚟,因為一個管理層竟然好意思形容自己「無功都有勞」?原來呢句嘢可以係求原諒嘅借口嚟咩?然後再聽落去,喂佢講到所有責任都係副校長同老師嘅責任,校長本人呢?委屈囉、無辜囉。無論佢有無貪餅卡、有無任由「影子學生」存在,佢喺記者會嘅表現都足夠激嬲所有打工仔。

你試吓對老闆講「我對份工無功都有勞」,你估會點?

大家都好清楚,出嚟做嘢要受氣、要比人鬧、比人屈係等閒事,有時你明知自己抵鬧,但有時你知嗰隻係死貓,唔想食死貓嘅時候你會點反抗?梗係講證據,搵返堆Email出嚟講清楚自己跟到邊度、由邊度開始唔關你事、出事位喺邊度、邊個同事負責……老闆信唔信係另一回事,但如果你比人鬧緊嘅時候只係話「我做得好辛苦」或者「我對份工無功都有勞」,你估聽嗰個會唔會因此而唔鬧你?坦白講,公司出糧比你,就係要「勞」你,所以「付出勞力」唔係咩值得歌頒嘅事。

唔止打工仔,基本上大部份香港人都好「勞」,連幾歲的小學生讀書考試都一樣要「勞」,老師要上深圳派傳單難道又唔「勞」?所以「有勞」真係唔係一個用嚟擋子彈嘅原因;再者,作為管理層喎,你有權又有錢,下屬對你絕對係有期望,希望你可以帶領眾同事愈做愈好,無人會接受到你袋呢份糧但竟然「無功」,咁不如我坐你個位吖?反正「勞」呢樣嘢我地幾歲就識,勝任有餘。

屯門興德學校被指管理不善,學校管理層今日就開咗個記者會回應。(資料圖片)

永遠得不到人心的上司:卸膊

衰上司有好多種,最令人神憎鬼厭嗰款,定必為:

「有功就領,有鑊就卸」

記者問陳校長有關「影子學生」嘅事,即係點解學校竟然有29個學生係持續唔返學但得以保留學位甚至升班呢?當中有學生係長達兩年無返過學!而教育局有規定學校必須嚴格遵守申報程序,

「校長必須在學生連續缺課的第七天,向教統局申報有關個案,不能延誤。」

被問到學校有無申報呢?校長支吾以對,就話呢樣嘢係副校長負責嘅,佢作為校長好鬼忙,係唔會察覺到有學生無返學……但講緊唔係兩日無返學,係兩年無返學!

高層就係咁,啲嘢交咗比啲細嘅,就唔關自己事,一隊咗落去,件公事就好似已經變成下屬嘅私事一樣,睇住下面做生做死,一出事就手指指教訓下屬:

「你點做嘢架?」
當公司出事,高層走出嚟但樣樣嘢都唔知,比人插多兩插就一隻手指指落下屬身上。(視覺中國)

做高層,你落每個決定、簽每個名,都清楚知道自己係要「孭飛」,否則求其一個阿豬阿狗都簽得名啦,點解要比你簽呀?你係明星咩?

公司出咗事,高層一定係最大鑊,所以要盡所有能力防止出事囉,即係當同事有難嘅時候,高層理應盡心盡力去提供意見、運用獨有經驗去幫手解決,而唔係「我交咗比你喎」。你唔幫,到事情愈來愈糟,一發不可收拾的時候,天真的高層真係以為可以獨善其身?

今日,希望香港地所有高層都睇到,當一間公司出事,高層走出嚟但樣樣嘢都唔知、唔識答,比人插多兩插就一隻手指指落下屬身上,個畫面係幾醜怪,唔止比人睇到自己幾無責任心,更加比人睇到自己平日對工作幾唔上心,咩都

「唔知、唔係我做、唔係我跟」

究竟你一直出緊嗰份糧係跟啲咩?有咩你係知架?

好就高層,唔好就膠層,你有無被膠過?歡迎到我Facebook Page留言分享。

(本文純屬作者意見,不代表香港01立場。)