【來稿】 5招提升社交溝通能力 擴張人際網絡
文：Sam Law
相信大家都去過好多社交活動（networking events），係唔係每一次去呢啲活動都用你大部份的精神和精力？去社交活動嘅作用同埋好處，大家都知道，不需要在這裏多說。但係，點樣做先可以令你的交際能力更有效和更成功？筆者我也參加過許多社交活動，相信我，這些活動真的耗盡了我當日的所有的能量，因為需要表現100％的自己，希望識到越多人越好。畢竟，建立關係都需要很多努力和功夫吧！經過了多次「失敗」後，今天想和大家分享5個技巧去幫大家大大提升在社交場合時的溝通能力。
有睇過我之前的文章的朋友，都明白如果你想建立一個好的關係，first impression is everything。唔好俾人覺得你去係為咗收集名片。唔好因為缺乏自信心，覺得自己比唔上活動裏的其他人，冇嘢可以貢獻。唔好俾人覺得你喺度hard sell自己。最後，唔好俾人覺得你係度揀（cherry-pick）傾計對象。如果俾人呢啲印象，應該都唔會識到好多朋友，不如返屋企算。
我以前有晒以上所講的所有行為，每次活動結束回家後，我都會計算我桌子上的名片數量來評估「我的表現」。數字越大，就越沾沾自喜，嗰晚就瞓得越好。幾天後，通常會再次看這些名片，嘗試回想起那個人的談吐、性格、背景和當日談話的內容。如果有任何有建設性的follow up，會主動聯絡他們。其實，因為當日交談的內容很表面，建立的關係不深，所以乜嘢都唔記得。（咁我知道佢哋嘅職業係咩嘢，因為攞咗佢哋嘅名片！）所以任何follow up 的 email 都是非常機械式的，冇乜深度，因為冇乜其他野講。「嗨，很高興當日結識到你……有冇興趣再安排一個時間繼續傾計？」（就係咁多！）如果連收email嗰個人都唔記得你係邊個，佢哋會點做？當然係當你係陌生人唔理你啦！
最後得出的結論是，我的社交能力無效。直接啲講就係浪費左自己的時間。所以我開始閱讀很多關於溝通技巧，networking的書籍。我甚至請教過搞個這些活動的organiser，問他們建立關係和社交技巧的要訣。我現在把所有學到的技巧在這裏送給你。
1. First Impression is everything, yes!
對一個人的印象和睇法可以在5秒內形成，不幸的是，不論這個印象是對或錯，都不是你可以控制的，因為你的大腦會不停地把你看到的人物、事件和信息分析，去形成一些睇法和形象。
人的面貌、衣着打扮、身體語言、甚至面部情緒都可以影響你大腦幫你形成的形象。所以如果你衣衫不整、愁眉苦臉，冇自信唔想講嘢的樣子，其他人看得出的。見到你咁樣，都唔想接近你和你交談。
咁應該俾人一個咩印象？
Sam’s Top Tip：下一次在社交活動時，挺直胸膛，主動有信心咁去同人傾計，唔好再企喺度等人接近你。當你say hello 嘅時候，俾一個好堅定好 firm 的握手，雙手唔好插袋，比少少笑容唔好木口木面。記住講「pleasure to meet you」，望住人話俾人知你很高興有機會和他對話。咁嘅first impression 就完美，之後傾計都會舒服啲。
2. 先對人有興趣，其他人才會對你有興趣 （Be interesting to be interested）
如果您對其他人的背景、專業和故事都不感興趣，咁就唔好要求其他人對你有同樣嘅興趣。有建設性嘅對話嘅意思就係，你同人分享幾多，人哋就同你分享幾多。
當然好多人唔會在社交場合裏分享自己的私人生活，你們是正確的。因為老實講我都唔會，因為我都唔識你！所以唔好問人哋結咗婚未，生咗幾多個小朋友，賺幾多錢同埋住喺邊。諗真啲，人哋係社交場合問你呢啲問題你都會覺得唔舒服唔想答佢地。
仲有唔好不停咁講自己嘅事，你嘅人生大計——Not interested！
其實個概念好簡單：「你想人哋點對你，你就應該點對人——Treat people the way you want to be treated」
我同意有時候真係可以冇嘢講，然後唔小心問咗啲私人問題，明白。但係，如果你對其他人的背景和故事有真正的興趣，我唔同意會冇嘢講。
我曾經喺社交場合同一個做銀行嘅人交談過，談話中我發現他是一個對潛水好有熱誠嘅人，所以我就開始問他點解會開始這項運動，點樣完成潛水牌的考試，面對什麼是挑戰和他喜歡去哪裏享受大自然和這項運動。好明顯他對潛水比在銀行工作更加有興趣，所以他很樂意也很興奮地回答我問嘅所有問題，仲話如果可以成為一名全職潛水教練，會夢想成真。
大家傾計投入，每人問了幾個問題，好容易就過咗一個鐘頭，當中1秒冷場都沒有。
講完之後，他就問我我的興趣是什麼，現在已經好像一個真正的朋友一樣談話。眨吓眼又過咗一陣，其實在活動期間和活動之後他也介紹了朋友給我認識，我們也成了真正的朋友。當然，日後的談話都會講有關工作的事，我們會exchange notes也會互相幫忙。
咁既 networking 算唔算成功？
Sam’s top tip：傾計嘅時候唔好怕深入去討論一啲大家覺得舒服嘅話題。用Active Listening去幫助你同人交談，避免冷場。當人哋感覺到你對佢嘅故事背景有興趣時，他會比較放鬆和開放啲同你分享。而且會因為你俾既effort而付出相同嘅興趣，感謝你做左一個好的聽眾。記住盡量避免問私人嘅問題。最後就係，如果你哋講得興奮時有其他人有興趣想加入，let them！Let the party begin！
3. 唔好一開始就問「你做什麼職業」這個問題 （Avoid asking the「What do you do」Question）
話俾你知點解。
我哋每一個人都鍾意judge人哋，斷定人哋係某一種人。點解有人唔想話俾你知佢哋嘅工作，就係因為唔想係你未真正認識佢之前就斷定佢係某一種人。同你講佢係做律師、醫生、工程師或保險，無論係邊種職業，聽到之後其他人都有機會會粗略估計賺的幾多錢，背景係乜嘢同埋做得幾成功。諗真啲，如果佢做得好成功你會唔會覺得佢在炫耀自己？再者，如果你覺得佢做緊啲低收入嘅行業，你又會唔會唔想再同佢講野？
咁樣俾人judge你會唔會覺得唔公平？或者如果咁樣同人比較底下，而你係唔「成功」嗰個，你會唔會失咗少少自信心？其實佢係做老闆嘅，然後感覺到你咁樣去judge佢，真係乜嘢話題乜嘢興趣都冇晒。所以你應該明白，唔係佢哋唔想講或者是對自己的行業感到不自豪，而是因為唔希望咁樣俾你斷定佢係哪一種人。亦都有人認為這個是一個私人問題，如果你唔明點解係社交活動中應避免問私人問題，請再次閱讀第2點。
Sam’s Top Tip：避免一開始就問這個問題，找一些更有趣的話題來談。（提示：讀點2）
4. 在對話期間不要檢查你的手機
我注意到，冇嘢講嘅時候大家通常都會揼低頭開始睇自己手機check message。如今，好似已經變成一個「The Perfect Escape」的習慣。揼低頭睇手機感覺上好似安全啲，因為當你唔係直視緊一個人的時候，你暫時沒有義務跟他說話。係以前，當手機只有打電話和send message的功能時睇手機根本冇可能用作為逃避談話或冇嘢講時的escape。冇得逃避，我們便會多放心機去維持一段對話。當然有時候真的有緊急電話要接收，但是我可以向你保證，有90％的時間所有信息都不是urgent的。如果你真的要離開去處理緊急事故，應該有禮貌地向與你交談的人解釋和道歉。
Sam’s top tip：在社交活動時，手機會不停震動提醒你有新的message。學下唔好每20秒都一定要病態式check電話。唔緊急嘅message可以等，我個人覺得就算是公司email都應該等。讓他們等等！因為如果你的注意力是集中在手機上，除了是非常無禮貌，還會分散你給其他人的注意力。學下點樣同人傾計，唔好永遠都依靠睇電話的這個「escape」。
5. 不要試圖滿足所有人 （Don't try to please everybody）
在社交場合裏，你會遇到來自不同背景，專業，經驗和文化的各種人。我可以向你保證，他們每一個人都不同，所以你跟他們的溝通技巧、問的問題都有機會不同。你不是神，不可能將自己變成「fit—for—all」。（T-shirt都至少有三種尺碼！）
你可以透過being open和誠懇的態度認識的人和避免形成不好的偏見，但你不能阻止其他人對你構成任何偏見。一定會有一些情況，對話就是唔「click」，對你就是冇興趣。
如果你覺得對話沒有建設性沒有進展，就有禮貌咁多謝他的談話時間和很高興認識他，跟住move on！這個不是你的錯，拍手都需要兩隻手啦！
Sam’s top tip：良好的人際網絡來自建立關係時的質量，不是數量。如果你在每一個社交場合，認識到兩個真正的朋友，我話你已經非常非常之成功。認識到不同行業的人，是一種榮幸。
希望這些提示會真正幫到大家擴張你的人際網絡。
（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）