【Al科技】從神奇女俠Gal Gadot「AV流出」說起……

撰文:李聲揚
出版:更新:

小弟當然係科技盲。但問我 2017 年最重要嘅科技新聞?當然唔係 Bitcoin,亦唔係網絡中立,而係神奇女俠 Gal Gadot 套「新片」。

到底咩「新片」?就當然係 AV。網上流傳(自己搵啦)神奇女俠嘅一套打真軍新片。我本身其實對佢冇乜興趣,但為着求知嘅精神,同讀者嘅知情權,我睇晒,相當精彩。

當然了,細細個行商場都見咩「酒井法子」AV。之前「暖男」篇文都講過,if something sounds too good to be true it probably is。發夢冇咁早,套片係假的。移花接木,將神奇女俠個頭移咗落去原本 AV 女主角度。但,假得嚟,都幾真下。細心睇當然知道係假,但只為自用「娛樂」嘅,應該收貨有餘。況且科技發展只會向前,像真度只會愈嚟愈高。

你會話,一早有呢啲嘢啦,十幾廿年前上網都有大量呢啲女星移花接木圖。問題係,key 圖相對容易,配埋片加埋對白跟埋對白口形表情,就唔係咁簡單了。

之前美國華盛頓大學已經用奧巴馬嚟示範過,只要有一段聲音檔案,就可以整到段假嘅片出嚟,令你覺得片入面嘅人講緊呢堆嘢,跟晒口型同表情。今次神奇女俠 AV,都係差不多嘅技術。原作者話畀大家知,「其實唔難」。只要搵到對象嘅相同片(Google 同 YouTube 大把),然後送畀電腦用機械學習,就搞得掂。

睇到呢度,識驚未?Motherboard 網站原本嘅標題係《AI-Assisted Fake Porn Is Here and We're All Fxxked》。呢個「we're all fxxked」實在用得好,一語相關。不如數下你日日放咗幾多自己嘅相上 Facebook Instagram?有冇拍埋片?好快可能就到你嘅「短片」流出。你話你冇拍過?唔係喎,片中人擺明係你,口型表情都一樣,你男朋友都分唔到。

不過暫時可以放心,要拍到段片夠真,關鍵就係原材料夠多,所以超級名人奧巴馬同神奇女俠先係好嘅「對象」。閣下如果唔係太多高清相片嘅,應該都唔怕嘅。

然後下一個問題就係,呢類片有冇「市場」(先唔計會畀人告)?我朋友律勤(假名)用嘅比喻係,好似車仔麵咁(唔知做乜佢睇 AV 都可以諗起車仔麵),唔靚執到靚。好似砌機砌車咁,天使面孔魔鬼身材,全部 tailor made,完美 AV。問題係,咁仲有冇樂趣?「完美」係咪就係最好?

+3

我初頭諗,熱潮過後,應該冇乜人有興趣。當年嘅移花接木網,非我所好,亦唔見得好多人睇。另外,樣靚身材正嘅星級女優之外,長期都有所謂嘅「素人」AV,都幾受歡迎。當然十居其九都係 fake taxi 咁,打晒燈有晒劇本嘅「素人」,但就證明好多人寧願要呢種「粗糙感」,唔係要完美。

同樣地,你見好多時最多人睇嘅,係啲乜乜自拍流出片,最好有埋廣東話對白。哪怕拍片嗰位打橫部電話搞到你要側起個頭睇,哪怕佢啲拍攝手法震過杜可風,哪怕成日聽唔到啲對白講乜,大家依然睇得好過癮。證明大家係鍾意「真實」,多過華麗。

同樣地,以前 CD 一舊水一隻任你聽成世,之後甚至都唔使錢。演唱會反而一千幾百一場,聽完幾個鐘就冇,但一樣搶爆。當然你可以話同歌手現場互動唔同,同愛人一齊去睇「最愛演唱會」又唔同。但,你解釋唔到明明錄音室大碟可以執到完美,點解仲有人買演唱會 CD(特別係啲唱現場明顯唔掂嘅)?

唯一解釋,就係好多人鍾意唱現場嗰種「不確定」,以及少少瑕疵,先更美麗。

再諗落去,其實人生好多事情都係咁。太完美就冇癮。睇波嘅,你捧一隊波,佢贏,你梗係開心。但係因為有挑戰性,最過癮就係棋逢敵手。你捧皇馬,見佢贏巴塞拜仁曼城,會開心。但想像下皇馬對烏干達丙組仔,場場炒十幾廿球。係,頭兩場你睇 C 朗表演仲好過癮,睇足 38 場你仲有心機?

哲學家諾齊克(Robert Nozick)在《無政府,國家,烏托邦》(Anarchy, State, and Utopia)入面提過一部機器,叫做「夢想機」(The Experience Machine)。你諗好晒,瞓入去,佢就會幫你實現你嘅夢想。你鍾意酒池肉林,搵好多錢,做大將軍,上月球,同 C 朗做隊友,做奧斯卡影帝,乜都得。不過,你係唔會再醒嘅。事實上佢哋推你埋一邊,就做下一個客。咁仲好唔好玩?

你會話,唔係真嘅。但你都瞓着咗,唔會醒返,點知咩係真實?或者換個玩法,畀一個「隨心所欲」機器你。聽日你想邊個做你女伴都得,有幾多錢都得,李嘉誠做你工人都得。但冇得退貨,你諗乜都會即時成真,仲好唔好玩?應該好快,你就會許願殺咗自己。

呢一堆,就係我聽到「完美 AV」後,即時諗到嘅嘢。

明明錄音室大碟可以執到完美,點解係要聽現場演繹?(網上圖片)

不過到我睇完成套「神奇女俠」(8 分鐘嘅 AV,唔係兩個幾鐘嗰套)後,想法又唔同咗。完美 AV,照計大有市場。

頭先用咗唔少篇幅去解,完美嘅人生,當然係最差嘅人生。有痛苦先顯到快樂,失去過先識珍惜,急屎先有搵到廁所(而入面冇人)嘅快慰。但,哪怕你嘅癮幾咁大都好,睇 AV,只係你人生一小部份啫。呢一部份嘅「完美」,影響唔到你「不完美」嘅人生。睇完,聽日你咪又係朝早同人迫車返工,忍受住阿姐唔插耳筒睇片阿叔剪指甲,返到公司繼續對住啲廢柴同事仆街客戶。

睇星級 AV 女優嘅,同睇「素人」或流出嘅,唔係兩班人,係同一班人。人有時要完美,有時要不完美。你食米芝蓮三星,都想由擺盤到服務到洗手間都咁靚,唔使個侍應在你面前吐痰先「襯托」到啲嘢食幾好味。既然係咁,睇星級女優時,明明都知道係假,就梗係完美到盡啦。所以呢啲 AI 假片,應該大有市場。想要真實嘅,先睇返「素人」或流出咯。

(文章純屬作者意見,不代表香港01立場。)
你可能感興趣