實現新年目標,其實唔難,你只要……

撰文:李聲揚
出版:更新:

關於新年目標,馬克吐溫(Mark Twain)最有資格講。佢話,戒煙?話咁易啦,我戒過成千次。有何難度?

放完長假返工,年初四咁嘅樣。唔知你有冇定新年目標?定咗嘅,放棄或者忘記咗未?放心,其實去到今日先放棄/忘記,已經唔錯了。

香港人我唔知,但維基百科話,差不多一半美國成年人會整New Year Resolution(其實有啲難譯,姑且叫新年目標)——不過九成(真係九成)都會失敗。固然當中有啲係隨口講就算,但亦有成一半人係當時真心覺得自己做到。

我認為新年目標有兩大用途:第一,忘情水(其實係改錯帶,但怕讀者太年青唔知係乜)。有2018目標,就可以抹走冇實現過嘅2017目標啦!第二,贖罪券(或者叫避孕丸)。既然會整新年目標,咁聖誕自然可以瘋狂咁過。食埋呢個蛋糕就減肥,食埋呢幾條就戒煙。

既然會整新年目標,咁聖誕自然可以瘋狂咁過。(視覺中國)

事實上,大家都知,踏入2018年,咩都冇變過。你依然係繼續煲煙,繼續星期六日瞓到黃昏,繼續容忍你啲廢柴同事仆街上司。唯一變嘅就係你會寫錯日期。

舊年篇文講過,叫你有心做就做,搞乜鬼新年目標。但,真係講就容易。點放隻大笨象入雪櫃?打開雪櫃,放隻大笨象入去咯,咁簡單。點拎世界盃?前鋒入多啲波中場搶多啲波後防少啲犯錯龍門失少啲波咯,咁都唔明?我見美斯都係散下步咁扭幾個人篤個波入網又話球王,都唔係咁難啫。講嘅話。

過去多年,筆者只達成過兩個新年目標,其中一個是打手遊。(資料圖片)

所以今年分享多少少。我唔食煙,但有大把其他惡習。唔記得有幾多年試過立新年目標,但至少,有兩年係做到嘅:

2014年,我戒咗賭波。2017年,我戒咗打手機遊戲。

兩年out of唔知幾多年,成功率應唔算好高(仲要一年有十個八個目標),但即管集中睇下呢兩年點解成功。

想知點定目標先成功?答案好簡單,睇下咩目標會失敗。無數咁多調查研究都話你知:新年目標嘅最大死因,係目標不切實際(第二先係冇一路跟進,第三係「唔記得咗」)

呢個年代語不驚人誓不休,個個追夢。PayPal教主,矽谷神人Peter Thiel講過,創業搞生意一定要夠癲,越高難度越好——冇錯你開頭會極痛苦,死嘅機會好大,但畀你搞得掂嘅,就有好高嘅圍牆,冇人挑戰到你。佢兄弟Elon Musk明顯都係咁諗,一係唔搞,一搞就射火箭上太空,或者搞Hyperloop半個鐘(你冇睇錯,係半個鐘)LA去到三藩市。「相比之下Tesla呢啲真係濕濕碎」。 無數咁多KOL教你要Dream Big,冇人恥笑嘅唔係遠大嘅夢想,你影嘅相唔好因為你企得唔夠近,連聖經馬太福音都教你「要行窄門,少人行嗰條」。

Elon Musk一係唔搞,一搞就射火箭上太空。(視覺中國)

但,首先你唔係Elon Musk亦唔係耶穌,佢哋亦都唔係新年忽然決定改變世界。對於百份之九十九點九嘅人(即係你同我)嚟講,新年願望成功秘訣就係金融白頭佬話齋,一步步致富。具體啲講,就係中國首富王建林話齋:「先定一個小目標」 (後面「先掙它一個億」就扮睇唔到啦)。

真的,新年願望點解衰?因為目標太遠大。講出嚟嚇死,做就笑死。記住,唔好高估你自己嘅能力,唔好高估你嘅自制力,唔好低估炸雞薯片嘅吸引力——錯過咁多年,你應該知道先係。

你以為好基本嘅目標,其實全部好難——證據? 係咁簡單你一早做到啦。 「做多啲運動」唔係小目標,「食得健康啲」唔係小目標,「減肥」「多啲陪屋企人」「做個好人」「畀心機工作」呢啲更加係難過登天。唔好以為量化佢(「要減20磅」「一星期食3餐麥皮」)就易啲,亦唔好以為貼上網同人講咗就唔會走數——你啲網友一早習慣啦。

與其在Facebook上面假大空,真係想有啲作為嘅,好簡單,定個小目標。唔好「做多啲運動」,諗下「放工行樓梯返屋企」。唔好「食得健康啲」,諗下「食雞唔好食皮」(just saying,我個人就覺得咁係淫褻緊隻雞)。唔好「做個好人」,試下「唔好講粗口鬧同事」。一步步嚟,易養成習慣,人要咁先適應到。 2014年我戒賭波都係先戒球會,再戒友誼賽,只係世界盃買,然後成功(輸咗唔少錢後)戒賭。2017年一樣,我先係唔課金打手遊,然後唔課金越嚟越唔夠人打,自然被迫戒埋打手遊。

定立小目標嘅另一個好處,就係你會容易踏出第一步。第一次試跳就世界紀錄,嚇死人咩。開始試,然後成個過程中,你就會知自己真係要啲乜。 紙上談兵最大問題,就係你冇嘢真係要取捨,自然就做唔到決定。減肥好重要不過食雪糕都好重要,追夢好重要不過要供樓都係問題。但,真係壓到埋身,你自然就做到決定。唔踏出第一步,你永遠都唔知咩先係自己真正鍾意真正珍惜——然後幾廿年後就做廢老想當年 「嗰時我要轉去高盛都話咁易啦,不過我為咗屋企人冇去之嘛」。對,在回憶中,所有人都係「幾乎成功咗的」。正所謂老人家都話Almost has sex every day——Almost had it on Monday,Almost had it on Tuesday……

(文章純屬作者意見,不代表香港01立場。)