【職場警訊】新入職嘅你千萬不能信「前輩」們這些話

撰文:詩寧
出版:更新:

每年二月,都係迷下迷下就過去,除咗等收爐,仲有唔少人等緊辭職轉新環境,雖然明知地獄處處,但能夠去一間新公司發展,個人都會充滿衝勁同埋有一絲期盼,希望今次搵到一份適合自己嘅工作。而新入職唔知頭唔知路,少不免畀人老點下,特別係年資高的「前輩」們,你要小心聽、小心分析佢哋講嘅嘢,輕易相信隨時跌落陷阱。  

「有咩唔識隨便問啦」

無論做到幾高級,都唔會有人第一日返工就知道自己要做咩,需要由其他同事簡述一下部門情況同工作內容係好正常嘅事。如果你有帶過新人,你應該知道呢個工作絕對唔係優差,因為「帶人者」既要完成日常工作,又要額外花時間同新人解釋工作運作,亦即係好容易要OT。新人入職之前,「帶人者」已經用咗一段時間去食上手(辭職者)留低嘅屎,怨氣一早萌生咗,到新人入職,基本上個心已經急不及待想盡快將離職同事嘅工作交畀新人。

「帶人者」心知新人無咩可能一兩日上手,所以循例同新人講句:

「明唔明?慢慢嚟,有咩唔識隨便問啦。」

新人信以為真?頭三日問都OK嘅,但到第四日,就會發現句「隨便問」真係「隨便講下」咋,你一問就會發現同事出現黑面、皺眉、衰聲,所以有咩要問,記得頭三日狂問!無論你條問題有幾蠢,頭三日都會忍下你,到第四日就會當正你已經過咗試用期,理應乜都識。

「畀樣嘢考下你,我哋一齊研究下呢個Task點做吖」

新人入職對條Team係新衝激,一眾舊同事日日對住同一堆嘢,一早做到無晒感覺,有時諗唔到新橋、無靈感好正常,所以需要新同事嘅幫助,用「外人」角度去睇個Project,試下注入新睇法、新元素。

出得糧,幫手當然無問題,但「前輩」會將件事包裝成:

「Hey Peter你過嚟,畀樣嘢考下你,我哋一齊研究下呢個Task點做吖,你試下諗三個方案,然後我哋聽朝開會前討論下。」

新入職嘅你當然係好想盡快有良好表現,盡心盡力咁諗咗幾個Idea出嚟,真誠相信係「一齊研究」同「討論」,結果你喺開會之前交咗Idea畀「前輩」,「前輩」只係答你:

「嗯……都OK嘅,不過你始終未熟我哋運作,我幫你諗諗個Idea點樣可以好啲,你睇下開會資料先。」

轉頭入到會議室,「前輩」就將你嘅研究變成佢嘅研究,喺上司面前鬆容不迫、自信滿滿咁「幫你」Present,仲要完全唔提你個名。而你?就係一個睇緊開會資料嘅阿呆。

雖然辭職係令你爽、轉工係令你心花怒放,不過現實中,地獄A跳去地獄B無咩大分別,賤同事A和賤同事B亦同樣要防,First Impression好重要,開壞咗個頭好難翻身,一旦覺得你好恰,就會一直恰你。

(文章純屬作者意見,不代表香港01立場。)
你可能感興趣