脅迫對方口交同「叫我個名」一樣，只係宣洩同滿足自己嘅權力欲，同自身性能力勁唔勁一啲都無關係。如果你另一半無情情喺床上逼你叫佢個名，佢一係睇 AV 太多，一係最近被老細小得太勁，自卑感掩蓋理性。
強迫床伴叫你個名，不過是自high行為。（Getty Images）
「叫我個名！」
「啊……」
「叫我個名呀！」
「Ben、Ben……」
「叫我個名呀！」
「Ben……啊……啊……啊……」
讀者無去錯 Txxx AV，我亦無交錯稿去「西極圈」，以上對白嚟自 TVB 16 年前一套單元電視喜劇《Loving You 我愛你》，由黃智賢及鄧萃雯兩位好戲之人激情演繹。
呢類床上戲，喺現今尺度下可能好普遍，不過喺當時 YouTube 未出現嘅年代，非常非常非常爆。
當年筆者讀緊和尚寺（全男班）中學，第二日一返學，就聽到一大班同學仔輪流黃智賢同鄧萃雯上身：「叫我個名呀！」「啊……啊……啊……」
我唔係腐女，見到兩個男人呻吟呢個畫面，絕對唔覺得浪漫，只覺爆笑。
其實劇中黃智賢強迫床伴「叫我個名」，只有佢自 high，床伴一啲都唔 high。喺性行為中，控制欲比較強嘅人，往往鍾意通過唔同手段去掌控性行為嘅主動權，例如「叫我個名」，或者要求對方口交，呢一刻做愛 high 唔 high 已經唔重要，因為權力已凌駕一切。
相傳古羅馬的男性可命令奴隸提供口交。（Jun/Wikipedia）
逼到人就範 唔代表能力勁
相傳喺古羅馬時期，口交係男性嘅無上特權，可以命令地位比佢低嘅女性同男奴提供口交。台灣作家許佑生《口愛》一書更指出，如果古羅馬有賊人偷農作物被地主發現，地主可以命令賊人口交作為懲罰（其實係罰事主定個賊，我睇唔透……）
脅迫對方口交同「叫我個名」一樣，只係宣洩同滿足自己嘅權力慾，同自身性能力勁唔勁一啲都無關係。如果你另一半無情情喺床上逼你叫佢個名，佢一係睇 AV 太多，一係最近被老細小得太勁，自卑感掩蓋理性。
有返過大陸出 trip 嘅朋友應該會知道，稱呼任何人都要加個「總」字包無死錯人；姓羅叫「羅總」、姓陳叫「陳總」，不過如此類推好易出事。試過喺一個場合遇到一個姓葉嘅大陸客戶，聽到有人衝口而出叫對方「葉總」，對方一面尷尬，我差啲笑咗出聲。
當阿豬阿狗都係「總」，又何必太着重呢啲虛名？認真你就輸了。真正值得人尊重係「品德」，只可惜太多人唔知道……
（本文純屬作者意見，不代表香港01立場。）