大婚倒數50天　修身戰鬥開始！

 作戰者：K小姐 

修身成功前，唔想見光。現代女性。曾經因為要上電視而好緊張自己個樣。外國返港後反而瘦咗。

不幸是新工需要經常見人，一日五餐，食無定時。工作狂遇上超長工時，冇運動時間。好夜收工，宵夜時間食晚餐。

 軍師：Susan 

畢業於倫敦大學國王學院大學（King's College London）營養學，及後在法國藍帶烹飪藝術學院（Le Cordon Bleu）深造廚藝烘焙專業課程，並獲取法式料理和糕點師資格。

曾在倫敦五星級酒店及米芝蓮餐廳任職廚師，很注重食物的營養成份和烹調技巧，希望將健康飲食信息帶給繁忙的都市人。

【作戰者 K】

話說，我約咗營養師Susan喺金鐘一間日式料理店見面。我同Susan素不相識，但有好事之徒(s)質疑我咁落去，點著得落婚紗嫁人，於是皇帝唔急太監急，極力推薦我見Susan，做個修身靚新娘。當我見到佢嗰陣：嘩，靚女一名！當堂有無限想像及無限動力。有些職業，靚，真是無往而不利。

我要強調，我而家唔係減肥，係修身！！

5呎4吋高122磅30吋腰，符合晒 BMI 標準，我一啲都唔覺得地獄囉，只係，婚紗都是變態的，腰位總係造到似Barbie，好地地一副身型著全白好顯肥。係，我認，一生人一次，我死都要靚。望住件喺倫敦買嘅名牌婚紗，加身邊總有同事睇唔過眼日哦夜哦，我得一個選擇。

但係！！食埋呢餐先減得唔得呀？你睇吓個餐牌！！刺身燒物壽喜燒天婦羅拉麵，呢間餐廳lunch長期大排人龍，唔係hea 食咁嘥卦。

我眼望望靚女營養師，弱弱一問：「食飯，得唔得呀？？」

【軍師 Susan】

眼前的K小姐雖然年過三十，但係臉上帶著點 baby fat，望落去幾可愛，比實際年齡年輕，可惜，baby fat face一上鏡就會變大餅臉。

減肥期間，很多人都會對澱粉質敬而遠之，其實節食也要注重均衡飲食， 只要選對食物和掌握正確分量，吃白飯是沒問題的。

K小姐今日 order 魚生飯做 lunch，是不錯的選擇。魚生熱量低，又含有豐富Omega-3脂肪酸；白飯容易有飽足感，能夠減低對其他食物進食的慾望。

突然減少澱粉質懾取會容易感到疲倦，大腦無法好好思考，影響日常生活。最理想是選擇高纖澱粉類食物如糙米飯、全麥麫包、南瓜和蕃薯等。過分節食反而會令肌肉流失， 基礎代謝率減低，當回復正常飲食體重就會更容易反彈。

另外我又留意到K小姐和普遍OL一樣，因為久坐，養了一堆贅肉在腰間。佢嘅另一災區就係手臂。由於長期缺乏運動和飲食不正常，令到三頭肌肌肉鬆弛，形成所謂的bye bye肉，到時著婚紗見到對臂，確實礙眼又會顯老態。

幸好，K小姐的情況不是很嚴重。如果呢個半月，佢肯認真控制飲食和做勤力做運動，著得落件婚紗並非難事。

少吃多動是減肥的不二之法，那些聲稱躺著便能瘦、打支針或用機器就可以把脂肪溶走的效果，不持久，甚至無功效。就算極端的抽脂手術也只能局部塑型，不能减重。

為了短期內達成目標，我心目中已經為K小姐定下好幾個挑戰！ 但首先，要了解一下她的飲食習慣。

一星期前，我們在電話相約時間見面，當時我提出要求，要她記下七天內飲食餐單，好讓我了解一下她的飲食習慣。就當是我給她的第一項試驗。照說，好容易吧？