有無諗過,裸辭之後喺香港working holiday?

撰文:詩寧
出版:更新:

大學畢業,30歲未夠就裸辭過6次。
年少衝動、破釜沈舟追尋理想、嫌棄工作無聊、受夠老闆低能,甚至因不滿公司某啲不公義而聯同CEO、Director等五六個人集體辭職我都試過,
而我係「每一次」,都未搵到工就辭職。

每次裸辭,我都不愁搵工,而且每次轉新工,人工福利唔多唔少都有丁點增長,所以身邊一有朋友呻工作不愉快,我都會鼓勵對方裸辭,讓自己休息一下,才更知自己「想去」哪裏、「適合」去哪裏,然後愈變愈好。

  第一次裸辭

因為我很清楚自己很想很想很想到電子傳媒工作,所以破釜沈舟辭職專心找方法入電視台/電台。

幸運地成功了,一做便三年多,快樂、成功感統統擁有了!但年紀漸長,始終有一日要面對現實,看看身邊朋友,薪金高我一倍,工時呢?我卻長他們一倍,作為藍領,銀行假更加跟我無關。

  第二次裸辭

夢追過後,慢慢發現金錢很重要。於是又裸辭,膽粗粗去了創業,點知又幾順利喎,想試試「做大佢」…

可惜唔夠積蓄又無膽借錢去博,「不如搵份Hea工,邊儲錢邊創業?」咁就走咗去做receptionist,諗住爽呀喂,朝九晚五仲有得放銀行假!頭一個月好地地,耐咗就唔work,個阿叔(上司)太得閒成日走出嚟R水吹,比佢望到實完全做唔到私人嘢,仲要見我太得閒就夾硬比啲嘢我做,例如:成櫃都係文具但仍然叫你訂文具、去會議室開機陪佢唱卡啦OK、淋吓花(最後淋得太多,花都死埋)……

  第三次裸辭

目的達不到,加上做嘅嘢實在太唔適合,又裸辭。

(為免將自己CV寫哂出嚟曝露真身,下刪另外3次裸辭經驗…)

係,講到尾其實係廢青一個。

假如、假如、假如當初堅持約定做傳媒,而家會點?可能紅咗,但更可能係一邊捱一邊仲怨緊人工低,然後越黎越老,變到已經無膽辭職,跟住窮一世。
假如、假如、假如創業嗰時再堅持耐啲又會點?
假如、假如、假如之後每份工都做夠三五七年又點?

假如即係幻想,幻想有無限可能,返返嚟真實世界先,你望吓喺公司做咗十幾廿年果位同事,佢都仲係坐緊喺你隔離,每日去8次廁所,每次10分鐘,話咁快放工。

咁……係值得讚頌嘅人生嗎?

不同人有不同追求,沒人有資格下定論指哪種生活比較好,只需要為自己、為家人負責就可以了。

搞嚟搞去,最終我CV足足空白咗一年,HR問嗰年咩事,其實我好想答我喺香港過左一個working holiday

體驗過做receptionist、
酒店接線生、
Marketing、
PR、
Corp Comm、
自己做老闆。

點解人地去紐西蘭剃羊毛、去澳洲摘士多啤梨、去德國做小販,做兩個月工放一個月假就叫體驗生活,喺香港做同樣嘅嘢就係廢?

我喺事業上係無咩成就,做唔到管理層、搵唔到大錢,但經過嗰年,每裸辭一次就更了解自己多啲。特別係創業嗰段時間,好多自己從來唔知嘅潛能都被谷哂出來;轉工亦擴闊了人脈、認識到很多真心朋友;見識過上市公司的仔細分工,也被細公司訓練要周身刀乜都識……這些過程都讓人進步、成長。

一世人流流長,拎一年半載出嚟任性吓啦,最緊要唔好喺屋企乜都唔做,我裸辭咁多次都仍然有人請,因為我無比自己HEA落嚟,愈識愈多人,自然會有人睇到你嘅能力。

為咗多謝你睇到最後,我將最重要嗰點放尾。

裸辭咁多好處,都唔係無成本,最大本錢叫「青春」,有日你唔再青春,真係好多嘢你都無份試。

所以,仲有青春嘅你,如果份工影響到你社交生活、情緒甚至健康,裸辭啦!!!!!

你已經無嘢可以再輸!工一直都在,要搵隨時都搵到,但你自己個靈魂呢?好多人搵一世都搵唔到。

裸辭過6次,我而家餓死未?未,不過面對有可能發生的第7次……我怯了。

(下回再續)

(本文純屬作者意見,不代表香港01立場。)