【來稿．HR人回應詩寧】見一次工就知伏唔伏？小心冇咗份好工

每間公司／部門嘅文化同生態都好複雜，要喺咁短時間充份了解一間公司有幾伏，機會其實唔算高，錯誤解讀仲分分鐘令你失去一份好工。

文：拾陸

作為HR從業員，好多時拜讀詩寧小姐有關職場嘅文章，都別有一番感受。當然，文章基本上都以求職者身分出發，再加上都係個人經歷個人感受，同意又好唔同意都好，其實就好似鍵盤戰士大戰五毛黨，老老實實冇嘢好拗。不過睇咗咁多篇，我諗如果有多一個從公司或者HR角度出發嘅觀點，可能都幾有趣。

就以近日一篇《如何在見工過程，洞悉份工伏唔伏》為例，題目寫得好，如果見工已知份工伏唔伏，各位施主識得回頭是岸唔好嘥大家時間，更加唔使落咗搭先再煩走唔走，的確係功德無量！不過究竟如何洞悉，不如我哋先回顧一下幾個小錦囊：

（一）把握同HR小薯獨處時間，收收風 

一般嚟講，畀得表你填嘅，的確係小薯，分分鐘仲要係小小薯（甚至係Receptionist），而佢哋多數放低份Form同電話攞完你啲Cert就走，如果仲要佢同你吹水搭訕幾分鐘到十幾分鐘……可能要你有返咁上下靚仔靚女先掂，再者佢哋啲風有幾指標性，相信真係見仁見智。

另外一個溫馨提示，如果個HR約你臨Lunch先上去，佢應該都真係文中提及嗰種「蠢嘅HR」，多傾無益。

（二）對住HR阿姐／阿哥要單刀直入（職業病，戴定個頭盔加返「阿哥」，唔怕人告我歧視）

講到呢個Point，首先要更正啲嘢，雖然各處鄉村各處例，但有唔少公司都係HR見先。如果你撞中啲interviewer見人如工廠啤工，見個面問幾句交咗功課就禮成，恭喜你！因為你可以輕輕鬆鬆過一關。不過市面上有唔少interviewer着緊自己個專業同責任，仲會認真處理應徵者，如果佢唔鍾意你，你應該連見team head嘅機會都冇，所以畀着我，HR嗰關點都要小心應對。再者，一個唔該佢睇中你，分分鐘仲可以幫你喺team head面前美言幾句，加定啲印象分。

而文章中講得好啱嘅係，HR的確都會「了解下你背景、過往薪酬福利、點解轉工、性格適唔適合公司文化同職位要求」。點解呢？因為除咗背景資料不可少嘅原則外，應徵者嘅答案以及佢作答嘅方式同取向，其實仲畀緊好多有用嘅資訊我哋去分析究竟佢係一個咩嘢人。

以文中情況為例，由於我哋好理解應徵者想知清楚，所以福利嘅嘢我哋多數預咗你問，但如果你係咁針對住呢個話題（尤其係「啫」住其中一點），HR可能認為佢個人比較計較而扣印象分，值唔值得博？都係嗰句：見仁見智。

（三）參觀吓Pantry同廁所 

有機會評估下環境，的確係一個了解公司情況嘅渠道，之不過Pantry o唔open同有冇「私人時間」係咪直接掛勾，大家可各自演繹。同時，相比起喺pantry，其實亦有唔少department鍾意喺自己嘅勢力範圍建立零食國，閒時一班國民喺返自己疆土入面hea，呢啲未必可以一兩眼望得出。

而廁所方面，作為參考同樣並無不可，只係市面上唔少公司廁所係由大廈管理公司負責，千祈唔好怪錯好人。

（四）唔好做低頭族，周圍望下員工嘅樣 

一般嚟講，公司裝修會議室多數喺Office最外圍，一來唔想外人見到咁多嘢，二來唔想畀人見到啲失禮嘢，仲有啲三來四來等等未能一一盡錄。如果咁好彩真係有機會入去，而且畀人押送嗰時仲可以咁多時間CSI上身由員工至Mouse都驗屍咁驗，睇多眼當然冇蝕底。不過始終一間公司，上至老細、管理層、部門主管、同事團隊；下至行業背景、部門背景等統統都會對環境作出影響。更多時候係每team每department都有自己生態，你見我係咁，未必隔離department都一樣，如果單憑一眼之緣就一竹篙打一船人，未必係最佳決定。

－HR從業員的建議－

雖然上文指出一啲我個人唔認同原文嘅地方，但我相信詩寧小姐其實只係想帶出留意身邊事，見微知著嘅重要性，而本人對此係完全贊同嘅。同樣地，我見工嗰時亦都會留意啲枝枝節節，唔係話因為見到某啲嘢就要危險速逃，但作為參考，為間公司加下分減下分，應該有助你決定加唔加入佢哋：

（I）Reception部電視 

小例子，雖然播得畀你睇一定係佢公司啲風光嘢，但如果出現好多好多員工活動／義工活動，你可能要有定心理準備有時啲星期六日要出動。

（II）會議室 

會議室其實可以反映好多嘢，間房有幾大、啲設備同櫈整唔整齊、會唔會攞咗嚟做雜物房、白板乾唔乾淨、有冇啲Hi-Tech會議設施等等，絕對可以睇到間公司幾有規模同埋願意做幾多門面嘢。如果有埋phone book仲開心，連個org chart都睇埋，大概已推敲到你個department有幾多資源甚至你有冇機會升上去。

而且最重要係得你一個喺入面，除非佢係玻璃房，如果唔係反轉嚟睇都仲得。

（III）面對team head 

相比起老練（其實係麻本）嘅HR，同team head／line manager傾偈其實可以撈到更多油水。一來佢哋多數冇咁sensitive，二來佢哋真係身處你他日工作嘅環境，好多嘢比HR嚟得更實在。從佢哋講嘢／問問題嘅角度（同樣道理，如果佢係咁針對住某個話題，尤其係「啫」住其中一點），你大概都估計到實際嘅情況，以下係一啲例子同潛台詞：

「依家份工忙唔忙，多唔多OT」＜＝ 你就好啦，我哋冇得咁悠㗎喎

「你條Team都幾多人喎」＜＝我哋冇咁多資源，你最好有定心理準備要食自己

「你哋啲tasks都分得幾清喎」＜＝ 我哋10個窿6個蓋，到時咩都要幫手

當然，寫就咁寫，但面試嘅環境、氣氛、語調、用字甚至line manager有幾醒目等等都可以影響實際意思，究竟佢發放緊啲乜嘢信息，只有靠你嘅直覺同經驗去解讀。最重要嘅係，你將來就係同呢位人兄共事，你最應該係諗下自己同佢夾唔夾得嚟，呢一樣可以話係面試嘅重中之重。

基本上，每間公司／部門嘅文化同生態都好複雜，要喺咁短時間充份了解一間公司有幾伏，機會其實唔算高，錯誤解讀仲分分鐘令你失去一份好工。不過我好信奉人搵工工搵人嘅精神，如果間公司嘅環境、同事、HR或老細畀你嘅印象唔好，與其為難自己，不如再搵份啱心水嘅。

小小分享，就此收筆，共勉之！

【編按：作者從事人力資源及培訓多年，最愛與人面試交流。】

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）