你估追個鍾意去百老匯電影中心嘅女仔有咁易咩
筆者平日游手好閒百無聊賴，就會到電影中心，有時打個白鴿轉，有時即興買飛睇場戲，有時行下電影中心café，聞住咖啡香，睇下書留意下designer brand，時間都過得特別慢，特別寫意。
見到隔離有作者講述同一個鍾意去百老匯電影中心睇戲嘅女仔相處，筆者偽文青病發作，久久未能忘懷，故有感而發寫返兩句。
追一個鍾意去百老匯電影中心睇戲嘅女仔，的確係要習慣嘅。要習慣佢附近商場嘅戲院唔入，山長水遠跑到去油麻地，出咗地鐵站仲要行多10分鐘嘅路先去到電影中心，夏天嘅話仲要冒住見到佢妝溶嘅驚嚇（如果你值得佢為悅己者容）；要習慣佢有時沉醉係自己世界入面，就算天塌下來，或者地震，你叫佢走但佢都從容不迫同你講，「在我最美的時候遇見你，是我的幸運，但是我卻沒有時間了」。
如果你追到個鍾意去百老匯電影中心睇戲嘅女仔，無錯，你唔需要諗去邊度行街，行咩好，食咩好。簡簡單單地係電影中心消磨一個下午，可以省卻你好多煩惱同不必要嘅分歧（仲有錢）。
之但係，如果你本來偏好的戲種唔同嘅話，或者唔鍾意咁百無聊賴嘅消閒方式，就算畀你追到個女仔，又如何？情況就好似，好難得搵到一套《La La Land》係大家都啱睇嘅戲，佢完場後讚嘆緊導演一口氣拍兩三分鐘嘅長鏡頭，講緊劇中提過嘅《Casablanca》，再用另一套戲《About Time》來做比較，而你就聽都未聽過呢兩套戲，只可以話男女主角嘅愛情好可惜；或者係，當佢睇完3個鐘嘅《黃金時代》都仲覺得意猶未盡嘅時候，你搭一兩句嘴附和佢好好睇但音響未夠好，已經足以令空氣當場死亡。你話到嘴邊唔敢講出口嘅係，其實你頭一個鐘已經悶到訓着咗。何苦呢？苦苦堅持，真係經已沒意思。
鍾意睇戲嘅人有好多，不過唔係個個戲院都啱小戲癡入去收睇。講咁多，其實都係想講，追女仔，就無特定地方嘅。追一個人如果要習慣咁多你平時唔習慣嘅嘢，甚至係要「適應」，咁我都係奉勸一句，施主，回頭是岸啦，愛情唔係飲水飽嘅，價值觀同品味都唔係一朝一夕能夠改變嘅事，無緣份嘅話，追個鍾意去百老匯電影中心睇戲嘅女仔都唔係咁易。
（文章純屬作者意見，不代表香港01立場。）