【職場．性別歧視】職業女性，嫁不嫁都難
女人打份工，生得靚／唔靚要比人評頭品足，戀愛同家庭狀況更加成日比人擺上枱講，甚至影響晉升機會。
除非你本身個位已經坐得好穩，例如你已經係高層或者喺行內有啲名氣，否則普通小薯去結個婚生個仔，好易因為家庭就錯失工作上的機會，唔好話升職，好多女人陀緊仔或者生完BB 就比公司迫走，工都無埋。
成日都聽到年約30（好似又提早咗係25歲？）而無伴侶的女性被標籤為「剩女」，「剩女」OT係原罪，因為實有人話：「佢放工無人約，返屋企又悶，所以喺公司賴死」；如果佢係上司，說話就更難聽。另一方面，你以為嫁咗做人妻會好啲？「返屋企煮飯啦／湊仔啦。」亦不絕於耳……無論你咩樣、咩能力、咩家庭狀況，都一樣有人講。
結婚之前覺得轉工係閒事，反正我對爬上高位無咩興趣，總之每次轉工都有人工加就得啦，但做咗人妻之後，發現轉工難咗，因為僱主睇完我份申請表，多咗一個考量……
結婚前辭職休息咗一段時間，嫁完出返嚟搵工，每次見工望住份申請表，我枝筆徘徊喺married 同single之間，究竟填唔填真嘢好呢？雖然間間公司都話自己係公平僱主，對任何性別、年齡、婚姻狀況嘅求職者都一視同仁，但我信呢啲門面說話不如信香港政府真係有心打擊樓市？每次填表都有同樣的小掙扎，然後每次都選擇講真話，結果每次被問同一些問題：「你夜晚會唔會煮飯？」、「有無打算生小朋友？」嗯……做咩關心我煮唔煮飯？驚我放工趕煮飯唔肯OT囉，唔通想我煮埋比佢食咩；做咩關心我生唔生BB？因為關心我會唔會放產假囉，唔通想等我生完比佢上契咩。
見成份工，到正式返工喇，同事們一般都對新同事比較寬容，循循善誘，覺得你乜都唔識，比多啲時間你慢慢上手。過咗幾日，有次成team人食飯，知情的老闆閒聊問我：「平時你放工點買餸煮飯？你買定你老公買？」然後成枱同事就「吓你嫁咗？咁早？吓？吓？吓？真架？」喺佢地吓完問完一輪之後，過兩日我覺得喺佢地眼中嘅我好似即刻老咗十年，覺得我婚都結埋仲唔係人生閱歷好豐富？做咗咁耐人應該咩都識同咩都做到，突然唔需要比時間我慢慢上手了，語氣態度都有唔同。本來話搵晚一齊唱K飲嘢，最後都好似自動認為我唔會去／無興趣繼續叫我去，由返工頭兩日嗰句：「月尾B team有同事生日呀，我地去唱K，一齊丫。」變成「上次同你講B team有同事生日，你應該唔去架啦？」
職場上，嫁咗都只係「少咗人對你好」，但大肚就會「多咗人對你差」
回望過去咁多份工，好似唔少公司同同事都唔係咁鐘意大肚同事。係，的確有人恃住大肚唔炒得就好懶，咩都推哂比其他人做，但亦都好多人一聽到有同事大肚就立即反感，先入為主覺得個同事好煩「做乜大肚」，分享一個大肚婆被歧視個案。
Jennifer喺一間中小型零售店舖工作咗五年，好叻女好肯捱，幫老闆由兩間小舖擴展到十間舖，每次搵舖位、傾租約、裝修、運貨等等都係佢一腳踢，老闆對佢亦唔錯，人工年年加，直到Jennifer意外懷孕，老闆對佢態度就180度轉變了……
咁多年嚟，老闆都容許Jennifer彈性上班時間，可能今日返9收6，聽日有事就返11收8，總次做得完啲嘢就無咩所謂，但佢大肚之後，老闆就要Jennifer每日準時9點出現，遲到十分鐘都會黑面教訓佢，總之突然間所有嘢都執得好正。直到Jennifer懷孕五個月，老闆對佢嘅惡言就越來越嚴重，任何嘢都拎出嚟鬧佢，甚至話佢喺度霸住個位，阻佢請新人，令到Jennifer日日都好唔開心好大壓力。Jennifer自問大肚後都一樣係用心工作，覺得老闆係唔想「蝕」個產假比佢而日日鬧，希望鬧走佢，作為孕婦，Jennifer都好怕日日充滿負能量會影響肚內BB，所以佢都想離開呢個衰老闆。
醒目女點會咁易比人蝦丫，Jennifer做好辭職嘅心理準備之後，有一日就入老闆房質問老闆：「你成日鬧我又叫我辭職，究竟我工作上有咩失誤？」爭執一輪，大家越鬧越激烈，最後老闆真係講出話係因為Jennifer大肚，所以好想佢辭職。夠了，Jennifer入去之前就開著電話的錄音程式，錄起咗老闆嘅真心話，然後佢就搵勞工處介入，結果老闆要賠十幾萬比Jennifer。
人生除咗工作，仲有好多必經階段，呢啲階段除咗發生喺你同事身上，都有一日會發生喺你／你另一半身上。除非已婚／大肚同事無做好本份，成日帶麻煩比其他人就唔抵幫，如果佢都乖乖工作，同樣的盡心盡力，大家可以少一點計較、多一份祝福嗎？唔需要你伸手助人，唔好伸手搞事已經好好。踏入人生新一頁，一邊打工一邊適應會遇到好多困難吧？入嚟我Facebook Page留言分享吓。
（文章純屬作者意見，不代表香港01立場。）