【辦公室政治】Email風雲

無論你係做咩行業，只要工作係「坐office」同對住電腦為主，就一定有喺Email場上射過波、守過龍、拉過弓、拎過盾，甚至係打過仗！
每日幾十至幾百封Email Send出Send入，有時表面上係做嘢，實際上係考驗你辦公室智慧，點樣問、點樣答、CC邊個（副本抄送）、幾點Send等等，全部都會影響你下一步工作，或者係一打開封Email就突然躺著也中槍，
所以真係每一吓Send制都要諗清楚先按。

以我做過N間公司嘅經驗嚟講，以下苦主Jennifer的故事真係每個office每日都上演緊，Jennifer，是她／他也是你和我。

成條Team有五個人，當中包括新畢業嘅小妹妹Jennifer，話說五個人要一齊做份Report，每人做一Part，大家做完之後就要各自Send比Jennifer做整合，咁佢就會幫手執頭執尾整返靚啲字形、背景咁。而佢地嘅老闆，係一個極之重視Deadline嘅人，佢話過邊日交，就一定要嗰日交到，否則係會立即著火，而且仲一定會徹查究竟邊個最遲交、邊個令到成份嘢Meet唔到Deadline，佢呢種誓死執行問責制嘅精神令到每個人都唔敢做最遲交嗰個，如果其中有兩個人真係忙到爆炸好有可能交唔切嘅話，就會夾埋一齊交，確保唔會有「最遲」嘅人出現，咁就大家都唔洗腳痛落台。

講返成Team人一齊做嗰份Report，除咗一向有小小無恥嘅同事A之外，個個都準時交，新嚟嘅Jennifer喺Deadline當日朝早就向坐佢後面嘅同事A講：

份Report個個都交哂喇，差你嗰Part未有，請問最遲下午3點比我得嗎？咁我可以6點前比老闆。

不幸嘅係，因為當時係朝早，其他人掛住斟水、食早餐、梳頭、畫眉之類，無人聽到呢翻對話。

到下晏5點，Jennifer先驚驚青青擰轉身問同事A：

得返一個鐘咋，你再唔交我驚趕唔到Deadline，請問你做好你Part Report未呀？

呢個時候全Team都大為緊張，萬一老闆喺「6點附近」發爛渣，就大家都放工無望，當中同事A就最浮誇，拉高八度：

哎呀！我完全唔記得咗，點解你而家先提我呀？

Jennifer當然話朝早已經提過佢，但同事A就話：

咩呀，有咩？無喎！你幾時提過我呀？我搵唔到你封Email喎，你幾多點Send出嚟架？

（繼而做一個狂按Mouse，Click Click Click 的動作）然後佢就不停教訓Jennifer，話佢作為守尾門嗰個，竟然唔提醒今日係Deadline，同事之間無互助精神……

Jennifer單純地諗住轉身開句口快過打字，但佢唔知道返工叫人做嘢、交嘢，真係坐隔離都要用Email，點解？因為好多人個膊頭AA 地，面皮又厚過字典，唔白紙黑字寫出嚟，佢一定過咗Deadline之後屈你無講過，仲有一個重中之重嘅原因，係Email入面嘅CC功能呀！對付懶蟲、小人，務必CC佢老闆！

一封Email嘅真正收件者，並唔喺收件者嗰欄

好多時，Send Email比某個收件者，並唔係真係想收件者收到，而係要比CC list入面嘅人收到，多數係你老闆或者佢老闆。

CC你自己老闆，作用包括：

「話比你老闆知你做咗嘢」
「遲交唔關你事，係有其他人阻住」
「個進度老闆自己喺Email見到啦，唔好日日問你」
「個收件者賴皮，唔該老闆出手問候吓佢」

CC收件者老闆，作用包括：

「警告收件者唔好諗住遲交／唔交，你老闆睇到架」
「唔該你睇吓自己下屬點做嘢」
「跨部門合作而瀨嘢的時候，老闆們無得推落啲細度，因為成個過程你睇住，中間有錯誤你有責任出聲」

簡單啲講，CC老闆就好似一道護身符，無事就無事，有事就用嚟安慰自己，總算盡力「保護」咗自己，拜咗神求咗心安……唔通你真係以為CC完就無人屈你咩？我唔知你老闆有無認真睇Email，但你喺我Facebook Page留言／inbox就實有人理你，食完死貓入嚟呻吓啦。

（本文純屬作者意見，不代表香港01立場。）