【職場】上司都只係打工仔，點解總以為自己擁有世界？
一個辦公室入面，人人打工嘅目的都唔同，有人純粹為兩餐、有人為興趣、有人為向上爬拎更多權更多錢，正因為人人期望都唔同，所以少不免會有紛爭，例如力爭上位嘅人會睇唔過眼Teammate返工只係等放工，會覺得對方太Hea甚至連累埋自己；相反，有人重心放喺工作以外其他生活，所以對份工只係「為出糧」嘅心態，就會覺得嗰個成日開口埋口講要點樣捱生捱死博上位嘅上司好煩、成日逼人OT好變態。
唔同人嘅心態、目的、需求都唔同，識得互相尊重就本應相安無事，但又唔知為乜總有人要強迫對方同自己睇法一致，總係覺得對方錯自己啱，夾硬要將自己嗰套思想塞落其他人身上，即係自己放工無人約，就期望人人放工都無人約，人人都要留喺公司做到天昏地暗、直到皮膚都乾哂、身體差哂。如果你公司都有呢種「迫你認同我」嘅人，仲要係你上司，就真係早走早著，因為遇到權力慾過高的控制狂上司絕對係極可怕嘅惡夢。
有話事權的小人
你有無遇過好鐘意搞小動作嘅無能上司？佢唔止有心製造是非，仲有「控制」同事嘅辟好，喺佢心目中，佢要你行就行、企就企，曾經聽過舊上司同一個剛畢業嘅妹妹講：
「以後出去做嘢，你要幫我開門同按電梯。」
妹妹唔敢反抗，只有唯唯諾諾，究竟呢個上司係咪以為自己住喺北韓？呢種上司往往認為自己大哂，佢講嘅命令係世紀道理、佢度嘅橋係宇宙之中最創新，所以一有人同佢意見唔同，佢就會搞是搞非，煮重對方米或者喺背後亂唱啲嘢出去。
早排同朋友Jennifer食飯，佢就好激動咁講佢公司有個對「搞是非」樂此不疲嘅Manager，令全Team人都好痛苦。Jennifer間公司好大，坦白講真係冗員眾多，好多人都無咩做、非常準時放工，而呢啲公司就最適合是非精滋生，Jennifer就遇到一個十分熱愛搞是非、咩都小事化大嘅上司，好鐘意捉同事「錯處」，而所謂「錯處」包括：
小便超過兩分鐘／大便超過五分鐘？錯！（係呀，是非精真係幫佢地計時，睇實佢地行開幾耐先返埋位）
交嘢比是非精一定要Hard Copy + Soft Copy，如果你想支持環保，只係Email Send份嘢比佢而唔印出嚟？錯！（無論份功課係2頁定200頁，都要印）
是非精話咗個Project係邊個同事做，就只可以嗰個同事一個人負責，其他人好心想幫？錯！（是非精唔會覺得同事係互相幫助，只會認為大家係作反，自把自為唔跟從佢嘅分工指示）
由於連屙篤屎都會得罪佢，所以Jennifer日日返工都預咗要比人話。但呢位是非精上司又好得意，佢唔會當面鬧當事人，但會喺背後做好多小動作，牽涉好多人入局。Jennifer條Team有個同事懷孕，平時已經成日被是非精上司怪責佢便意頻頻。由於大肚唔係幾忍得小便，有次開會期間，懷孕同事急得濟行咗出去廁所，大家本來都唔為意，點知當日放工之前，是非精上司就Send咗封Email比Jennifer全Team人，內容係力數去廁所嗰位同事，話佢開開吓會走咗去係好無禮貌、係唔放佢（上司）在眼內、係不能容忍嘅行為，仲呼籲大家要杯葛呢位懷孕嘅小便同事，好讓佢受到懲罰。Jennifer同全Team人睇完封Email之後都呆咗，究竟呢個是非精上司係唔係有精神病？大家都堅係有啲擔心人身安全。有人將呢封Email內容講返比懷孕小便同事知，唔知係咪因為荷爾蒙影響佢情緒，佢知道件事之後顯得非常驚訝、委屈同不快，仲當眾喊咗出嚟。
其實唔少上司都會好容易墜入「I am the King」嘅思想陷阱，覺得自己有資格分工、有資格落吓決定就好威風，但佢忘記咗自己都只係打工仔，間公司唔係佢建立出嚟的，佢自己都有機會會有日被炒，佢篤同事背脊嘅同時，同事都有機會篤返佢背脊。其實上司同下屬嘅關係，就真係「同事」咁簡單，並唔係主人同奴隸，講到尾，份糧唔係阿上司出而係公司出的，所以以為自己高高在上嘅「上司」真係萬分低手，叻極都只能一世做Manager，無得再升上去。
權力慾除咗影響下屬，與同Grade亦唔見得安寧
權力慾會令上司同下屬之間有是非，但上司同上司之間亦一樣受呢樣嘢影響，當中最普遍、最常見嘅例子就係：「你憑咩用我條Team嘅人」，即係A Team 唔夠人手，有件事想B Team同事幫手，呢個時候B Team Manager就會講呢句說話，呢句說話有雙重意義，表面係保護下屬，唔想乜嘢都關自己下屬事，「好心」想幫下屬擋／射走啲Job，驚做死自己個下屬。但問心，往往令下屬做到死嘅兇手，又點會係隔離Team嘅Team Head？一定係自己Team Head！所以句說話嘅深層意義就係：
呢個係我下屬，只有我有權令佢做死，其他人休想奪我大權。
呢種上司事事計較，口嗰句就話人手分配係管理學嘅一種，要確保公司資源（即係同事）運用得宜，心嗰句純為保住自己地盤同權力慾。如果真心為公司好，理應互相幫助，為公司爭取最大利益，而唔係不停擔心自己少咗利益。你有無被職場控制狂虐待過？我會喺Facebook Page爆出更多慘痛經歷。
（本文純屬作者意見，不代表香港01立場。）