品牌的溫馨啟示：我們都愛好東西

啱啱拜讀左01有篇文，咁自己又唔係體育專家，唯有講吓品牌公關。

本身質地好　就唔怕畀人嘈

做品牌嘅，最開心梗係遇到件本身已經係正嘢嘅product，出半分力可能就已經得七成效果，全力做嘅話直情做到全城效應全城唱；反之可能就要花九牛二虎之力，先可以幫一件劣貨「包裝」到正常水平。

講到尾，本身品質好，先係構成「愛好西」嘅重要理由，公關嚟講，都不過係錦上添花／亡羊補牢啫。

譬如好似日系車，比較起上嚟係抵買、耐用、慳油，自然吸引唔少買家青睞，例如中國，2016年上半年中國汽車市場嘅銷量有近1300萬架，其中自家用汽車就佔左1104萬架，而當中日系車就佔左當中嘅15%。

你話，喂，15%啫，都未夠德國車同其他自主品牌喎，但係咁，日系車同上年同期比較，銷量增長係有成12.7%。即係咩呢？即係話就算有一大堆人不停話自己抵制日貨，抗議遊行打爛日本車嗰陣，又同時間有好多人走去買日本車囉。

如果套用某種奇怪觀點：就算你點樣冷嘲熱諷，其實你心裏都係愛我呢個BRAND嘅，都係我一份子嘅話，咁呢班中國車主其實係咪打從心裏反映咗佢哋對大和民族嘅身分認同呢？唔係喎佢哋堅愛國唱紅歌㗎喎？咁又係咪口裏說不心裏卻崇日嘅表現呢？哦，唔係，原來愛國還愛國，大家都係本能地自動波揀好嘢嘅，「抵制日貨，不如抵制蠢貨！」呢個時候梗係唔應該講政治㗎啦！嗰啲示威，都係「一窩蜂的表面現象」啫。

中國的會爆炸是常識吧？

有人問，件貨本身產地實有影響㗎喎，Made in Japan同Made in China畀你揀你都心中有數呀？咁當然啦，你見到某個國家嘅產品，心理上覺得好，因而狂喜、激動、歡呼，無人可以阻止你。咁諗深一層，何解你又覺得來自日本會比起來自中國好？

因為過往經驗令你有咗觀感落差嘛。你成日見到中國從硬幣到廁所板都會爆炸、食嘅從雞蛋到魚翅都造假、網購嘅全部都係抄、然後連自己人都走去小小香港補給掃貨，喂Made in China呢幾個字真係臭哂朵，好難叫人愛你喎？相反，日本人就算幾假，交出嚟嘅貨就絕對均真喎，咁連帶令人對成個國家有信心，呢啲係光環效應喎。

與其怪人哋做咩成日冷嘲熱諷，將虛假嘅「民族觀」套喺唔同嘅事上，不如諗下點解成條line可以由頭到尾衰到貼地，就算有啲品牌力挽狂瀾自救，始終都係畀成個系統拉落水？

然後又會有人衝出嚟話，係囉，你哋就係以偏概全，無留意到人哋當中係有進步有好嘢㗎，係咪遭iPhone「侵權」嘅100C手機、NewBalun嗰啲？簡直係中國法律嘅大進步啦。

至於有愛先會關注，又想講一個事例：FB近年咁多意見領袖，每個都係獨立品牌，朋友就特別討厭其中某某，覺得佢小器無料到，咁無嘅咸魚白菜各有所愛啫，唔鍾意咪唔鬼睇佢囉，但係偏偏佢就like咗呢個人，仲要將佢啲post set做「搶先看」，喂乜你個人咁犯賤㗎？「我就係要睇下佢寫啲咩廢話！笑下佢都好！」

一單衰嘢就夠打殘一個Brand

係囉，恨都得㗎啫，討厭一個人都可以follow佢㗎，心裏在意都有好多種形式表達㗎嘛，利迷長期話曼狗，好難話佢哋其實對朗尼係有真切關懷啩？或者咁可能算係一種歪曲嘅愛呢？我又唔係心理專家，點知點解有啲人真係可以咁諗，又以為人人都係咁諗嘅啫。

即係呢，我鍾意劉翔呢個brand，唔係因為佢出產條line正，係因為佢打破田徑壟斷，同埋一直在玩命呀！正如我鍾意烏茲別克嘅Oksana Chusovitina，大哥我鬼愛烏茲別克咩，係因為佢本身品質好，41歲7闖奧運。面對外國對手係咪會同聲同氣為自己人打氣？well，早幾日女子乒乓球好似荷蘭對法國，兩個都係中國人又兩個都係外國，打唔打氣好？中國網民就話：那是洋鬼子的事！

一個傳園慧品牌效應再好，都救唔到一個孫楊再加一整隊國家隊，正如幾多深度報道同好記者，都未必救到一個中學程度嘅觀點。我都覺得有啲人應借奧運會為良機，好好思考下困擾港人已久的中港關係囉。

（本文純屬作者意見，不代表香港01立場。）