【廢青企管學】如何做個收買人心的高層

老闆係唔係全部傻／一定無好嘅？當然唔係！聰明、有領導才能、心地好、關顧下屬的高層我遇過，我真係遇過。
各位老闆、各位食鹽多過我食米的前輩，喺你地抱怨而家啲後生郁啲辭職、養唔熟、想一步登天、唔肯捱……之前，不如又諗吓自己能唔能夠做到一個「真正能收買人心的高層」？

  心清眼亮　知人善任

曾俊華辭職，發表離職感言，佢公開多謝兩個前特首董建華同曾蔭權，前者任命佢做海關關長，係佢第一份政府主要官員職務；後者則鼓勵曾俊華回港考AO，而且兩人先後多次為上司下屬關係，包括曾蔭權任命曾俊華做財政司司長。我相信曾俊華係真心感恩的，佢真心到唔提梁振英。

對曾俊華嚟講，董建華同曾蔭權都係知人善任的上司，能夠睇到下屬優缺點，安排適合嘅職位比佢。以前有位director，安排我地全team人各施其職，令到一堆女仔做嘢零是非仲要合作無間、互相補位，例如佢認為我優點係「寫嘢快、危機處理、有創意」，咁佢就將所有，係所有！要寫嘢、突發事如網頁被入侵等等，都比哂我去做，當然佢都睇到我缺點係「無耐性、唔願處理重複的工作如影印」，同team有同事係比較鐘意做影印、較對等工作的，佢就會將呢類工作派比適合同事。結果我地每個人都做到自己鐘意嘅任務，唔洗浪費時間抱怨。

  心地好　對所有人都真心好

呢個世界大把人係「人前人後兩個樣」，藝人（偽人）見到記者就笑騎騎，對住工作人員就黑面擺款，呢啲唔係新鮮事，因為連老闆對下屬都一樣係咁。上一秒佢仲同你講最憎人遲到，下一秒佢笑住同個遲到30分鐘嘅大客講：「我地都知出面塞車，唔趕呀，慢慢抖完先傾，飲咖啡定茶？」　

一個忠於自己嘅善良人，除咗唔會得失啲客外，對公司上下都一樣好，會同茶水阿姐講早晨、唔該前唔該後，甚至佢深明自己有手有腳，可以自己斟水飲，唔洗要「公司資源」去服侍佢。

曾經有個上司，每朝都要飲蜜糖水，佢無指定邊個人要幫佢沖，但總之佢一定唔會自己沖，仲要好奄尖，一時鬧同事沖得熱、一時鬧沖得凍。有一排佢好鐘意特定某同事B幫佢沖，話佢沖嘅溫度最適中，有次我唔小心見到同事B拎住老闆隻杯，沖完蜜糖水就插隻手指落杯入面，啊！原來聰明的同事B在細心試溫！拎住隻杯係唔會估到是否太熱的，放隻手落去就最感受到溫度了。

  對下屬喜惡上心

下屬辭職，上司幫手寫reference letter好常見，就好似5年前，唐英年辭去政務司司長嗰陣，前特首曾蔭權即喺聲明宣佈請辭消息同署任安排，仲大讚唐唐對香港嘅貢獻。適當讚賞絕對能令同事更落力，就算你讚A君，B君聽到都會受激勵，因為佢都希望下次被讚嗰個係自己。

見同事辛苦做完一單大project，上司請食件餅或者請食餐飯真係好振奮，現今社會，打工除咗出糧，成功感都好重要，自己嘅努力比上司睇到，都係滿足感嘅一種。我以前有個老闆甚至會記得哂我地每個人口味，每次慶功都輪住食某一同事鐘意食嘅嘢。又有次我喺街見到個廣告，無聊影低send去同事group chat話：「嘩呢個聖誕套裝好靚呀！但有啲貴，買唔買好呢？」，點知第二日，老闆就靜雞雞叫咗我入房，佢買咗套套裝比我做聖誕禮物，真係好感動！大家感到受重視，自然會越做越起勁。

老闆，人心肉做，你平時用盡啲同事，年尾加2%人工仲要同事謝主隆恩，大家點會唔辭職呀？

（文章純屬作者意見，不代表香港01立場。）