新城12月30日商場搞實體頒獎禮 周柏豪感新鮮:兩年冇見過咁多人

撰文:劉傳謙
出版:更新:

新城電台今日(17/11)舉行記招,宣布將在12月30日下午於商場舉行《新城勁爆頒獎禮2020》,盼與現場觀眾近距離接觸。記者會邀得陳柏宇、周柏豪、泳兒、馮允謙和Dear Jane等歌星出席。

新城電台舉行記招,為《新城勁爆頒獎禮2020》造勢。(梁碧玲攝)
+9

新城知訊台執行總監程凱欣(Karen)透露,今年將沿用上年做法,在實體頒獎禮前率先頒發部分獎項:「舊年嘅《勁爆頒獎禮》已經唔只係得一日嘅頒獎典禮,而係一個橫跨住幾十日嘅活動,喺唔同嘅地方頒獎,亦都會有一個實體頒獎禮。好多朋友都話好特別同精彩,唔會淨係喺限定會場,只係得限定人數嘅觀眾參與到。秉承住上年所有同事嘅努力,今年更加會喺呢個基礎上面更進一步。」

程凱欣指新城今年一定舉行實體頒獎禮。(新城電台提供)

Karen接受傳媒訪問時承諾,今年必定會舉辦實體頒獎禮,讓歌迷可以近距離看到偶像得獎和表演的場面。不過,要在商場舉行活動前需要申請相關牌照,因此確實地點仍是未知數,被問到若申請失敗會否改在電台頒獎,Karen即指:「實體頒獎禮一定搞,我哋真係好想喺商場搞,可以同觀眾玩遊戲,但若然因為限聚令而申請唔到,我哋都會有個後備方案,但係就變咗唔對外啦。」

舉行實體頒獎禮的其中一個目的,是希望有更多樂迷可以體驗今年設計的AR小遊戲。(梁碧玲攝)

今年亦新增AR技術遊戲,讓樂迷與歌手隔空互動。會上亦有歌手率先體驗,其中周柏豪配合HANA菊梓喬彈結他的動畫,在台上突然唱起生日歌。下個星期才生日的HANA即向柏豪解釋,而柏豪就說要提早為HANA送上生日禮物,相當窩心!他在會後接受《香港01》訪問時坦言,對實體頒獎禮舉行在即百感交集:「係新鮮嘅,但係都好熟悉。因為有差唔多兩年冇見過咁多人,頭先見到咁多個歌手朋友,我都有同佢哋打個招呼。新鮮在於好耐冇見過啲歌手朋友,熟悉係之前連續十幾年都有出席。」

周柏豪抽中與菊梓喬的AR動畫互動。(梁碧玲攝)

談到今年的樂壇成績,周柏豪感激粉絲繼續支持自己所有幕前工作:「《劫後餘生》喺唔同嘅流行榜上面都有好嘅成績,好開心,大家對自己幕前嘅工作都繼續支持,希望繼續努力,因為2020就快過。其實我唔想2020咁快過,我希望疫情快啲走,2020仲有時間畀我哋追趕返。」談起女兒成長,他亦十分開心:「可以完全陪到個女先係人生最大嘅成績,佢由乜都唔識,到知道自己同爸爸中文名,原來佢都就快一歲,同佢相處真係一個好好嘅緣分。」

周柏豪直言對頒獎禮既熟悉又陌生。(梁碧玲攝)

早前商台決定,明年元旦日(1/1)將在會展舉行《叱吒樂壇流行榜頒獎典禮》,但為保障出席者安全,會場將不設觀眾席。而港台則再度取消實體頒獎禮,並將在明年1月16日以特備節目形式公布《十大中文金曲》得獎名單。