無綫與三大唱片公司破冰 陳柏宇叫好:有得參與返頒獎禮一定高興

撰文:劉傳謙
出版:更新:

近期樂壇焦點離不開無綫即將與三大唱片公司破冰,身為Sony Music旗下歌手的陳柏宇(Jason)今日(22/2)出席代言活動時,直言雙方重修舊好是件好事,期待師弟妹有機會體驗TVB頒獎禮:「其實我一向都有上TVB,只不過冇去頒獎禮啫。(恨唔恨去頒獎禮?)有嘅話幾時都係好事,就算我唔恨,我都想師弟妹有機會去到。(冇得去TVB頒獎禮會覺得差咁啲?)又未至於係好似少咗忽肉,佢要變陣就要變陣,就算發生緊咩事你都要接受,只不過啱啱開始嗰陣會覺得可惜,如果依家有機會參與返頒獎禮一定係高興。」

張敬軒喜見TVB三大唱片破冰 指與關智斌仍是密友:前幾日先食飯

Jason最期待師弟妹有機會出席TVB頒獎禮。(梁碧玲攝)

談起對近年對樂壇的看法,Jason認為近期開始出現跨唱片公司的合作,反而整個行業比以往更團結:「依家啲合作多到不得了,甚至唔同公司都有crossover,我唔認為因為頒獎禮嘅分歧,就話呢個樂壇唔百花齊放,反而音樂圈係團結咗添。其實睇你留意啲咩啦,淨係睇表面嘅話就係話呢啲人唔去呢度,嗰啲人又唔去嗰度囉,但係你仔細留意呢個圈發生緊嘅嘢,就知道唔係呢回事。」

最近Jason與Serrini合作,翻唱對方的《網絡安全隱患》。他認為音樂圈比以往更團結,不可以因為頒獎禮的分歧就定奪樂壇不是百花齊放。(梁碧玲攝)

說到剛過去的農曆新年,Jason指自己比過去更常與家人拜年,重拾節日氣氛:「上年我好似唔使派(利是)咁滯,因為我有一段時間唔喺香港,同老婆去咗做嘢,又慳咗啲。不過今年又要派返,因為返咗公司團拜,又有朋友過嚟拜年。唔知點解呢排多咗啲父母拜年嘅過程,以前都冇咁多,之前唔去咪唔去,依家好似為咗個女去咁!(享受?)享受嘅,畀個女感受下個氣氛,又可以見到其他小朋友,又可以等佢同其他朋友玩下。」

Jason今年在香港過年,笑指自己又要準備派利是。(梁碧玲攝)
Jason為讓女兒感受節日氣氛,決定比過往參與更多拜年活動。(梁碧玲攝)