張敬軒首亮相《Chill Club》 讚疫情下續請樂手:令佢哋有收入!

撰文:劉傳謙
出版:更新:

日前張敬軒(軒仔)現身無綫錄影音樂節目《勁歌金曲》,今日(12/3)則首度亮相ViuTV拍攝另一音樂節目《Chill Club》。軒仔接受《香港01》訪問時透露,自己在拍攝前特意參觀錄影廠,笑言有種拜訪景點的感覺:「我有好多朋友上過去做節目,今日見到佢哋成日喺錄影廠出面影相嘅走廊,有種『終於嚟到呢個名勝』嘅感覺。(有打卡?)係呀,啱啱都影咗啲相。」

這次是軒仔第一次上ViuTV節目。(陳順禎攝)

軒仔透露在節目中將演唱兩首從未作現場演出的曲目,包括收錄自上一張專輯《Senses Inherited》的《裝睡的情人》,及在新碟《The Brightest Darkness》的《重頭開始》。他坦言在錄影期間感到緊張,又認為與Joey Tang(鄧建明)等音樂人合作機會難逢:「我好耐冇同Joey Tang合作,同Tang Sir咁多年都係喺大型演唱會合作,但係今次可以好近距離Jam歌,覺得好開心。」

軒仔又特別講到與主持駱振偉(Thor)合唱《笑忘書》,原來軒仔在2013年轉投英皇娛樂後,Thor剛好就約滿離巢,他對這位同門「師兄」近年發展感到高興:「佢參加新秀嗰年,唔記得係咪做評判,總之我就係喺現場。我覺得佢就好似伍仲衡評價強尼嘅說話一樣,樂壇欠佢一個交代。佢係用心做音樂,相信雖然佢喺電視台有好好嘅發展,又有拍劇又做主持,但係我諗音樂都係佢好想得到成績嘅一個範疇,希望樂迷同愛戴佢嘅觀眾都畀多啲支持佢。」

軒仔期待Thor在音樂上做出成績。(陳順禎攝)

直言《勁歌》與《Chill Club》無法比較

軒仔先後現身《勁歌金曲》和《Chill Club》,他指後者在音響、燈光的水準高,被問到兩間電視台的音樂節目有何分別,他坦言無法比較:「兩個音樂節目嘅製作風格同目的好唔同,坦白講,其實冇乜嘢好比較,因為大家做緊唔同嘅嘢,唯一嘅著眼點係,音樂節目一定要推動樂壇,令歌手同音樂人有表演機會。」

他特別提到《Chill Club》在疫市下沿用現場樂隊為歌手伴奏,為樂手雪中送炭:「成個疫情當中,我哋幾乎冇晒演出,但係因為《Chill Club》,一班樂手可以有好穩定嘅收入,呢個係我覺得電視台音樂節目最可貴嘅地方。其實音樂節目除咗畀一個平台我哋唱歌,對樂壇係有一啲隱性作用。」

軒仔認為《Chill Club》為樂手帶來穩定收入。(陳順禎攝)

「唔會特登諗要去邊個台!」

被問到日後若兩間電視台頒獎禮撞期會如何取捨,軒仔解釋在沒有電視台歌手合約下,兩者之間根本不需要作取捨:「以往大家有一種認知,認為某個電視台唔畀藝人去其他電視台,其實我哋當時要簽(電視台歌手)約,而呢個舉動係基於尊重合約精神。因為冇乜人講過,所以我都唔想大家有誤會,其實如果歌手冇(電視台)合約,喺任何一個傳媒都可以出現,例如我依家係冇合約,所以唔會特登諗要去邊個台。」他又稱自己今年保持當新人的心態,希望接觸更多不同類型的節目:「喺呢行,你要抱住去嘉年華嘅意識先得,嗰度有攤位遊戲咪去玩囉,輸贏唔緊要,最緊要係玩得開心,呢個就係我依家嘅心態。」

軒仔稱將以樂壇新人的心態面對今年工作。(陳順禎攝)
+10