鄭中基演唱會設catwalk通道 要求樂手背譜:叫樂隊出嚟同大家玩

撰文:
最後更新日期:

鄭中基(Ronald)今日(8/4)現身葵涌,出席《Drive In Ultra – WEE are Ronald Cheng演唱會》記者會。在車輛套票極速售罄後,有不少歌迷擔心無法入場一睹偶像風采,Ronald解釋,車位後方已同時安排座位,舞台上亦特設特大LED熒幕及煙火效果,同一時間,車位將安排以「品」字型排列,令所有歌迷都能享受這次演唱會。他續指,這次在製作上將利用航拍機:「有航拍機嘅話就想做一件我想玩好耐嘅事,就係投射。例如我投射咗一條公路出嚟,有啲車會入嚟,有一個飛車嘅畫面,呢啲畫面都會投射喺觀眾嘅頭頂、車頂同地下,所以大家就算揸車入嚟,都要望住個熒光幕,咁先會知道發生咩事。」

Ronald出席演唱會記招。(梁碧玲攝)

為顧及車位後的觀眾,Ronald在舞台中央特設兩條通道,方便與其他觀眾近距離互動,不過在限聚令下,他稱不會與歌迷近距離接觸,又呼籲觀眾留在座位欣賞歌曲。他透露在舞台與座位間來回,大約需要兩至三首歌,但距離已比其他戶外Drive-in演唱會小:「場地比起其他戶外演唱會唔算大,可以話係中型啦,不過都啱嘅,始終香港都係第一次搞,就由呢個規模開始,畀大家感受下戶外騷。」另外,Ronald已經預留門票給慈善機構,希望低收入家庭能免費體驗第一次Drive-in演唱會。

Ronald已經安排好catwalk舞台,與座位觀眾近距離互動。(梁碧玲攝)

離演唱會尚餘兩星期,Ronald指自己已經準備得七七八八,但樂手連日來要忙於背譜:「比起紅館等等嘅室內演出,個台淺咗同闊咗好多,我想試下樂手出晒嚟玩,等大家同樂隊一齊玩,就算係我行緊catwalk,樂隊同埋和音都會行出嚟,好想呢個演唱會大家唔係淨係睇鄭中基一個人,希望佢哋會背得切啦!」

以往紅館舞台有一定深度,方便樂手演奏音樂,但今次舞台較淺,加上Ronald希望樂手能一同與觀眾互動,於是決定樂隊成員需要背譜。(梁碧玲攝)

他透露這次演唱會將特設環節紀念唐奕聰(Gary),同時為對方預留座位,他憶起在對方鼓勵下,決心在三年前重返樂壇:「我咁耐冇做音樂,冇寫歌,出返嚟第一首歌就係佢幫我做。佢叫我要去做,知我忙,佢就話寫完畀佢再搞,最後我哋同Joey Tang一起傾,於是就有《廢中》呢首歌。好記得我話好耐冇搞,驚會用好多時間,佢話『上嚟我錄音室啦,我走咗你都仲可以用。』好多嘢我真係講唔到咁多,留返喺演唱會用一段講下我同佢嘅友誼,同埋大家做歌嘅歷史。」另外。Ronald透露,早前籌備翻唱專輯,當中收錄10首廣東歌經典及兩首新歌,日前已經完成錄製,將在演唱會攤位發售。碟中亦收錄新歌《玩咗先至瞓》,勸勉樂迷及時行樂。

Ronald將特設環節悼念Gary。(梁碧玲攝)



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。