太極紅館個唱海報從《正義聯盟》攞靈感 劉翁:Gary係太極嘅超人

撰文:劉傳謙
出版:更新:

太極樂隊將於8月7-8日,在紅館舉行兩場《Rainbow After Rain演唱會》,這個本來計劃在去年底,於西九舉辦的戶外音樂會,在疫情下一再延期,雖然鍵琴手Gary(唐奕聰)在3月離世,但五子決定繼續籌備個唱,最後幸運地得到進軍紅館的機會。

太極樂隊將在8月7-8日,移師紅館舉行演唱會。

雖然演唱會海報一早在去年10月已經完成拍攝,但在Gary離世後,五子決定捨棄本來在戶外具陽光氣息的海報,按本來的照片重新設計。負責這次海報設計的劉翁接受《香港01》訪問,透露海報靈感來自電影《正義聯盟》:「因為超人死咗,所以嗰張海報係冇咗超人。呢樣嘢對佢哋嚟講好有感受,喺太極裏面,Gary就係佢哋嘅超人,所有編曲、其他麻煩嘅嘢,Gary係完全幫你搞掂晒。當Gary離開咗,佢哋就想做一張類似係咁嘅海報,於是重新揀相,但係就冇重新影過。」

經歷場地改變,加上Gary的離開,劉翁與太極樂隊商量後,決定改變演唱會海報設計。(受訪者提供相片)

說著製作過程,劉翁坦言心情十分沉重,他想起與Gary拍照時的點滴:「今次我想大家著西裝,大家都有一份帥氣,但係Gary曾經講過『我個肚腩咁大個,着西裝唔好睇喎,所以之前都唔敢著西裝。』我應承佢,要幫佢做一套好靚嘅西裝,要著得佢好靚仔。最後佢行出嚟嗰陣話『我真係好靚仔,好耐未著過西裝。』就係有呢一刻,所以執相嘅時候會觸動到自己,冇諗過呢個造型會係幫超人做嘅最後一個造型。」

劉翁坦言製作過程中,心情感到複雜。(資料圖片)

而令劉翁最難過的,是當時演藝界巨星一個一個離世:「我影相都影咗20年,影過好多前輩。喺同一個月入面,我幫第36屆金像獎影過嘅吳孟達,佢離開咗;同一屆嘅廖啟智,佢都離開咗。同一個月入面,Gary都離開埋,佢最後嗰張想係喺10月影海報嘅時候,諗住當PR相,大家開開心心咁影,冇諗過呢張係送畀Gary最後一張相,我諗唔只係我,好多人都會覺得心情好複雜。」

點擊圖輯,懷念今年離世的演藝界人士:

+16

在演唱會方面,Gary的鍵琴手位置會由黃丹儀頂上,而成員雷有暉(Patrick)接受訪問時透露,演唱會不會特意設悼念環節:「唔會特別安排一部份嚟致敬,因為喺我哋心目中,呢個騷都係我哋6個一齊演出,所以唔需要特登致敬或者懷念,做返我哋應該要做嘅,表達應該要表達嘅嘢就可以。」

Patrick指今次演唱會不設特備環節向Gary致敬,寓意與這位太極靈魂人物一同開騷。