AK@MIRROR為新歌拍MV難逃冬天濕身命運:拍出嚟畫面會好靚

撰文:劉傳謙
出版:更新:

MIRROR成員AK(江熚生)和Lokman(楊樂文)今日(25/10)現身ViuTV,參與音樂節目《Chill Club》錄影。Lokman透露二人除了與樂隊ONE PROMISE編排一段串燒歌外,更會首度演繹《虎道門》,他直言感到緊張:「之前拍MV(舞步)都未排好一個完整版本,今次算係趕工排好咗,但係我同隻舞仲未有太大感情,所以會有啲啲緊張,好多嘢要配合下。」問起二人會否再出合唱歌,AK指十分期待:「都係喺兩個鐘頭前同Lokman傾過,如果我哋可以再做多首歌,不如玩下其他曲風,想同Lokman喺歌曲上再有合唱機會。」

AK及Lokman今日參與ViuTV音樂節目《Chill Club》錄影。(劉傳謙攝)

早前在經理人花姐(黃慧君)的限時動態中,看到AK在濕身後獲工作人員悉心照顧,他解釋當時原來為下一首歌拍MV:「嗰陣就係準備緊《虎道門》之後嘅新歌,唉,又係喺冬天嘅時候先嚟濕身!噚日的確係有啲凍,但係畫面出嚟會好靚,希望大家鍾意。」他透露新歌是一首以流行搖滾(Pop Rock)為主的作品,說的是大家耳熟能詳的主題:「有啲嘢係需要同人講,唔好收埋喺心入面,要早啲同人講。」

為了拍攝新歌MV,AK又要在冬天濕身。(花姐Instagram限時動態截圖)

問到對年底樂壇頒獎禮奪獎的信心,二人均指以平常心看待,Lokman認為:「有好多嘢都冇得估,都有好多歌好出色,都係嗰句,我哋做好自己作品,帶出自己想講嘅信息,呢樣嘢先係最緊要。」AK續指MIRROR眾多成員仍是後輩:「我哋出咗道只係3年,有好多前輩我哋都好尊重,能夠參與呢個盛事,一齊去支持,已經好足夠,唔去太期待結果會比較好。」至於今日隊友Anson Lo(盧瀚霆)遇到車禍扭傷腰,AK指對方也有在通訊群組報平安,並無大礙,也提醒他痛楚如果持續,就要看醫生,相信他可以把握今天空檔好好休息。