海俊傑到樂富突擊玩busking 有小朋友認得佢係《法證4》史釘
撰文：鍾冠全
出版：更新：
海仔突然到樂富busking亦引來街坊圍觀。
近排忙於宣傳新歌「平行時空」嘅海俊傑日前受福音節目「2人3轆」邀請做嘉賓，海仔同主持人李有毅坐住三輪機動車周圍去，當中就去到海仔小時候住過嘅地方。到達目的地嘅時候海仔感觸良多話：「嘩！個腦立即諗返起以前同爺爺嫲嫲一家人好開心嘅日子，真係好懷念（之後定格左10秒）回過神望到而家眼前現實景象真係有一種平行時空嘅感覺！真係好多感覺湧現，好有趣。」
海仔接受福音節目「2人3轆」訪問。
當海仔坐住三輪機動車時不停話好爽，又話唔使戴頭盔有種無拘無束嘅感覺，搞到我都心郁郁想考個電單車牌！另外節目更安排海仔去做busking，海仔話：「玩之前都有啲緊張㗎，又唔知多唔多人，又唔知有乜嘢反應，都唔理得咁多交俾神安排！」當Busking開始，唱新歌「平行時空」嘅時候就慢慢吸引到人流，工作人員於人群中留意到一位小學生用好純熟拍攝手法咁用手機影住海仔仲不停重複同媽咪講：佢係法證先鋒嗰個史釘呀！係史釘呀！當海仔知道後就放低之前嘅擔心，仲好興奮話真係好好玩，想再玩多幾次。總結今次拍攝好順利地完成真係好開心，好感恩，感謝主。