吳保錡@ERROR為新歌MV再做兵 演精神病患者瘋狂FF甜蜜愛情

撰文:陳芷穎
出版:更新:

ERROR成員吳保錡(Poki)作為今年新人,其個人作品《猥瑣》大獲好評,所以他繼續以同一班底製作新歌《羅曼蒂克衰亡史》。MV中,Poki與女主角的親密鏡頭更勝上回《猥瑣》,不過Poki笑指親密程度都不及隊友何啟華(Dee)在過去電視節目中的Kiss鏡頭。

Poki與女主角的親密鏡頭更勝上回《猥瑣》。

Poki這次乘勝追擊,繼續找來舒文監製、黃偉文(Wyman)填詞,炮製新作《羅曼蒂克衰亡史》,Poki道:「做完《猥瑣》之後,我同舒老闆、花姐搵咗好多Demo,聽咗好多首都唔係好鍾意,後來聽到呢首歌我同花姐都喜歡,就揀咗Larry Wong呢首作品。上次搵咗Wyman寫,好希望佢繼續可以幫我,而佢又肯,所以非常感恩。」

Poki繼續找來舒文監製、Wyman填詞炮製新歌。

這次Poki在MV中繼續做兵,但他同時也是一位精神病患者,不停有FF畫面出現:「我這位精神病人幻想好多愛情經歷,但全部都係幻想出嚟,最終女方係冇出現過。其實MV都係講緊做一隻兵,你可能會無私奉獻畀你鍾意嘅人,但佢身邊已經有一個佢鍾意嘅人,你永遠只能做佢後備。好多嘢都係我哋呢啲兵自己幻想出嚟,好美好,但都只係虛構。」

講得做兵,當然要有女主角,今次Poki親自找來YouTuber雪瑤參與MV演出,難道想再一次自肥?Poki說:「上次搵咗Heidi(李靜儀),今次想搵新啲嘅面口,睇下會唔會做到新嘅感覺,想畀人睇到不論MV或唱功都有全新感覺。喺熊仔頭個show見到雪瑤嘅表現、佢嘅樣,我覺得佢適合個MV,就邀請佢返嚟。」

今次Poki親自找來YouTuber雪瑤參與MV演出。

雖說是為粉絲帶來新鮮感,但做得兵,在充滿美感的畫面上都不乏親密鏡頭,MV其中一幕說到Poki幻想與所愛的人咀嘴,想不到親密程度令他變得十分怕醜,表現尷尬。Poki回想起道:「未試過演呢啲戲,今次係冇kiss到,只係扮kiss,不過咁近都有少少緊張。過去我只奉獻過畀阿Dee,我最叻同男人Kiss!同異性係未試過,所以喺鏡頭前咁多人喺度,有少少驚同拘謹。」

除了女主角,今次Poki MV也有隊友肥仔的加持,拍攝MV當日他特地前來探班,更二話不說幫忙做幕後,在Poki拍攝雨景一幕幫忙噴水壺,不過見肥仔起勢狂噴十分開心,似玩多過幫忙,不過兩兄弟自然冇計啦!

點擊睇更多MV花絮照: