職場最毒未必婦人心 成日勸你辭職、熱衷講公司壞話背後另藏意思

撰文:
最後更新日期:

損人利己嘅事好多人做,但只損人而不利己嘅無聊事都一樣有人熱衷地做。我嘅轉工次數多到自己都數唔到,經驗話我知,幾乎每間公司都有一個「好鐘意叫人辭職」嘅同事,佢口中每一句都係講緊公司壞話,但最正係,佢講到間公司咁差,偏偏佢自己就唔辭職,最後仲做埋資深同事,本文稱呼佢哋為「辭職老臣子」。

作者:詩寧

(《未生》劇照)

其實返工辛苦想呻下好正常,但發出過多嘅負能量就令人好討厭,呢種花生友好鐘意見到啲同事來來往往,每次有人辭職,佢就會話:「唉,又走一件,呢度真係留唔到人,我都就走架喇,你都搵工啦。」除咗咁,佢哋說話亦有以下幾種特色。

(《未生》劇照)

小事化大

為咗落力數公司嘅不是,辦公室每日發生嘅任何事都會成為佢哋借題發揮嘅材料。小事如茶水間嘅蒸餾水剛好飲晒而新一批未送到,「辭職老臣子」會話:(精彩語錄請點圖,如有聽過,實屬巧合===>)

成日講「以前」

「辭職老臣子」開口埋口都話公司差,當然遇過人反問佢:「咁你點解仲唔走?」呢個時候佢哋就會搬「舊屎」(舊時)出嚟,話公司以前唔係咁架,成班同事好似屋企人、日日嘻嘻哈哈,老闆又無睇到啲Budget咁緊……如果你工作經驗唔多,迷迷糊糊就會畀佢遊花園帶咗去第二度,「舊屎」都無你份,你唔夠佢講的,仲分分鐘信咗佢,畀佢影響到以為公司係「越來越差」,而呢個亦係佢哋想灌輸畀你嘅官感。

(《未生》劇照)

把口好甜,成日讚你

有玩社交媒體都知道,想香港人按個Like唔係咁易的,否則都唔會有咁多公司要請Digital Marketing返嚟玩專頁。現實生活亦一樣,熱愛投訴嘅香港人點會無啦啦讚人?除非你都自問做得好好甚至係超出一百分,否則,個同事成日讚你叻,你就要諗下係咪有啲古怪。其中,「辭職老臣子」踩公司嘅同時亦會讚同事:

(再來精彩語錄請點圖,如有類同,實屬不幸===>)

明明公司請你返嚟就係為咗買你嘅技能,但佢講到你為公司付出技能係蝕底咗咁,畀人讚多兩句好容易就飄飄然覺得自己應該搵「更好」,而乜嘢係更好?出面一定更好?「辭職老臣子」唔會答到你,佢只係想你辭職。

如果你已經有幾年工作經驗,我相信你都遇過「辭職老臣子」,可能中過佢嘅圈套或者已經學醒了。此文想提醒各初出茅廬人士,你成日聽人講出嚟做嘢要醒目,因為會有人畀氹你踩,直接害你的人當然要防,但日日同你食飯互呻、齊齊數公司嘅人都未必係益友,帶眼識人呀。

(《未生》劇照)

【01女生.愛情告白】正所謂情深說話未曾講,世界與你又何干,無論你係單戀、暗戀、熱戀、失戀,誠邀你趁情人節愛情告白,將由「01月老」(神秘嘉賓)於情人節為你讀出。https://bit.ly/2AMS5PN
(愛情冇限期,但告白有,截止收集:2019年1月28日)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。