【辦公室結界】晚晚OT源自開會文化 避免老細無限loop可以點做?

撰文:詩寧
出版:更新:

你有無試過,放工後個腦好攰唔係咁清醒,諗一諗自己當日做過乜?完成咗乜嘢工作?然後好恐怖哋發現自己竟然乜都無完成過。明明工時好長、無偷懶、出咗好多腦力,但依然有一堆嘢未做好,啲文件仲喺枱頭等緊你!持續不斷的OT ,只係源於份工多嘢做?啱一半,背後仲有一個原因——開會!

作者:詩寧

(《不懂撒嬌的女人》劇照)

開會的意

只要你條Team有三個人或以上,你就好難避開「開會」的命運。究竟點解要開會?好聽啲講,開會畀大家報告下手頭上做緊乜,可以令個Project順暢啲,減少甩漏或好讓上司更適當地分配人手,例如Peter太忙?就分返啲工作畀John幫手。表面說話係咁講,但實際上「開會」係咩一回事?

(《華麗上班族》劇照)

開會係為咗表好忙

打工仔你一定知道,喺香港職場上,「得閒」是罪名,就算你真係坐喺度「𢯎腳」,都要邊「扮工」邊𢯎 ,萬一你同人講手頭上無咩忙緊,大家就會覺得你係冗員、廢人,除咗講你是非之外,仲會諗辦法畀嘢你做,喂,你有糧出架喎,點可以「得閒」?因此,開會前大家都會儲定一堆工作,即使有時間做晒100%,但為咗開會時候有嘢可以「講到自己好忙」,就只完成40%,留返60% 喺開完會先做。

可能你會話:「喂,我唔係啲咁嘅人,我好正直嘅。」你乖乖做晒自己嘢,亦好大方幫其他同事做埋佢哋嗰份,但你一樣要開會,會議室就好似結界咁,你入一入去,返出嚟就發現人生無咗三個鐘,被消失的三小時,你只係坐喺度凍、聽同事講啲不著邊際嘅說話,上司又總係講一堆假大空,佢強項就係將啲明明三句講完嘅說話,兜來兜去講成個鐘,令人聽到頭暈暈。

(《未生》劇照)

開會係解決問定製題?

幾經辛苦,終於喺永遠都好大冷氣嘅會議室出返嚟,去個廁所、飲杯水,已經六點,你喚醒已進入Sleep Mode嘅電腦,想完成埋開會前做到一半嘅工作?Sorry,你喺結界嗰三個鐘有好多Email嚟咗等緊你覆,同時又有其他同事埋嚟搵你傾嘢,覆完已經八點。想做完「實事」先收工?又一次OT 到十點。

(《半澤直樹》劇照)

曾經遇過一個老闆,好鐘意同事問問題,佢要求每位同事都要喺會議上提問,講下自己做緊嘅嘢有乜困難,藉開會集思廣益,希望成班同事齊心解決。同事們內心都覺得老闆是傻的嗎,唔通我星期一遇到困難,儲到星期四開會先問?問得嚟都完成咗。初時大家都唔發問,但老闆就好唔開心,覺得同事唔好學、唔團結,結果佢就將會議無限拖長,拖到有人發問先心息,結果,大家每次開會前,都要花盡腦力諗一堆問題,夾硬喺開會時候滿足老闆喜好。如果用「諗問題」嘅時間做實事,大家又可以早一個鐘收工了。

老闆要你開會,你又點會有得避?!唯有諗計令自己喺結界舒服啲。(點圖即看,5招避免老細假大空、無限loop==>)

(《自體發光辦公室》劇照)

終極開會結界,原來是...

如果你做政府工,我相估你對「開會」有更深感受。我做過某間半公營機構,啲會要約「高層」一齊開,但「高層」本身就每日朝九晚六都開緊會,你想約佢?提早三星期啦,如果個會係同時有兩個或以上「高層」參與,就大鑊啦,夾來夾去,剩係約開會都成個月,嗰個月就係不停同佢哋啲秘書Email往來,出現得最多嘅字就係"availability "。會都未約到,無人落決策,咁需要處理嗰件事點算?等囉!社會上好多民生小問題,點解遲遲實行唔到?點解整一個網上交表系統都需要18個月?

親,約唔到人開會啊。