屋苑停水區議員被批無跟進 水車一到即擺易拉架領功
撰文：黎凱容
出版：更新：
颱風山竹離開香港後，隨處可見破壞的痕跡，不少區議員紛紛出動，處理區内大小事務，市民亦點評哪些議員有誠意為社區做事，出心出力。荃灣區區議員林婉濱就被指在荃威花園停水期間完全沒有向署方尋求解決方法，反而水車一到就立即豎立宣傳易拉架，表明政績，惹來街坊不滿。
有居民指水車一到，林婉濱就帶同其他義工到附近帶領市民取水，有領功之嫌。（荃威花園維修關注組提供）
「好似由頭到尾都無人見過林議員，係到水車出現，就已經棟晒牌，話自己協調水車出動喎。」荃威花園維修關注組在網上公開此事後，林婉濱隨即惹來街坊批評。有人痛斥林不做實事，只顧抽水：「都話佢打完風實拎埋個易拉架出嚟，劑劑都喺度抽水...習慣晒」，亦有人揶揄：「 有冇同啲老人家講，成功爭取到個太陽出嚟，成功叫山竹遠離香港？」
有街坊在「荃威花園維修關注組」的facebook專頁怒斥林婉濱只顧抽水，不做實事。（荃威花園維修關注組facebook專頁）
現任業主立案法團的秘書趙恩來向《香港01》指，颱風吹襲香港過後，荃威花園以及荃錦公路一帶的屋苑因水務署的電力故障，自星期一朝早4點半開始，暫停供水。「又真係無見過佢出現，法團嘅人朝早5點就已經搵署方嘅人處理，但因爲當日交通好混亂，又多冧樹，所以一時三刻水車都入唔到屋苑。」他指後來依賴市民自發清理街道障礙物，水車才能在大約11點到達。
事件變羅生門
林婉濱接受《香港01》查詢，她的説法卻完全相反，事件驚現羅生門。「打風當日我已經跟緊屋苑情況。以我所知，係星期一7點先全座停水，我已經即刻跟進！」她表示早上7點多就直接聯絡水務署職員，一直跟進事件，就連11點多水車到達屋苑，水務署職員也是找她為負責人查詢相關安排。「我好肯定，全個過程我都有參與。淨睇水車嚟到搵邊個，已經知啦。我都有私底下通知居民水車到咗。」
