居港智利人最愛廣東話 歷史與文化價值無可取替

撰文:
最後更新日期:

智利青年為識朋友學廣東話

「好眼瞓,仲未瞓醒!」26歲智利青年Lucas Patricio Peralta Furet遇到記者後第一句迎面而說,稠密的落腮鬍包覆整個下巴,棕黑眼珠與濃密眉毛,一副典型的「鬼佬相」。記者隨Lucas拾步上,長沙灣唐樓中住著他與他的香港人室友,還有隻十個月大的小貓Momo。

現職資訊科技業的Lucas住在香港超過6年,但原來早在9歲已跟廣東話結下不解之緣:「我當時得9歲,爸爸播《少林足球》比我睇,當時唔識廣東話,就咁睇西班牙文字幕,都已經覺得好搞笑。」他於17歲到港當交流生,把周星馳電影當為瑰寶,「我嚟左香港之後先知原來係周星馳電影,學咗廣東話後再重睇一次,更覺好笑。」Lucas最難忘《少林足球》中周星馳和「鐵頭功」黃一飛在酒吧被「爆樽」一幕,「我覺得好白痴但好聰明!」

Lucas大讚周星馳電影風趣幽默,最愛鐵頭功被打一段。(王海圖攝)

僅用六個月時間 學會基本用字

不少人覺得廣東話難學,單是聲調便有「九聲六調」,還未加上棘手的文法與各種俚語。但Lucas為了能在香港認識朋友,花盡心機和時間學廣東話:「我其實用左6個月時間就學識最基本廣東話用字。好簡單,因為嗰陣我讀緊中學,數學、歷史所有科目全部都唔合格,因為我將所有時間用晒去學廣東話。」他對廣東話的熱愛,就連晚上睡覺也夢到自己說廣東話:「大約學左六個月廣東話,有一次我發夢人地同我講廣東話,我識得聽同答返佢!」夢境中的Lucas遇上了問路的陌生人,流暢地為迷路者指路。起床後的他馬上跟朋友「報喜」,更把自己學廣東話的經歷放上Youtube分享。( 其Youtube連結:www.youtube.com/channel/UCMEhYuxpkmiXoYryeXt0b5A)

在香港住了一段時間,Lucas也彷彿成了個地道的「港青」,最愛茶記奶茶、蝦仁炒蛋、炒飯,但他笑著憶述去茶餐廳叫餐不時會被無視:「我去茶餐廳嗰陣,員工見到我係外國人樣,會唔夠膽同我講嘢。我有時要等好耐,會偷聽到佢哋講,『你去啦你去啦!』、『我唔去,我唔識英文呀!』咁我就會同佢講一位唔該,或者唔該想嗌嘢。」

Lucas認為廣東話跟英語或其他語言不同,能很精準地表達心情:「例如我好中意講『只許周官放火』,話我啲同事佢地好中意做一樣野,但又唔比人做。用英文都可以咁樣講,但個意思無咁勁。」他更與朋友研發一個專門教人寫繁體字的APP「ChiCha」,讓更多人可以認識繁體中文。

Lucas用了六個月時間就學懂廣東話的基本用字。(王海圖攝)

英國教授「貼地」 看高登小說

同樣熱愛廣東話的,還有在香港生活了28年的馬詩帆(Stephen Matthews)。馬詩帆現任香港大學粵語語言學教授 ,早年在加州讀書已產生對中文的興趣,結識了太太後更覺廣東話有趣:「我問佢可唔可教我由普通話轉返做廣東話!」後來因為要「見家長」,馬詩帆開始全心投入學廣東話,主要透過聽太太和親戚的廣東話,邊聽邊學,「同埋我都會睇電影,個陣好流行睇粵語電影例如《秋天的童話》、《雞同鴨講》。」

馬詩帆最喜歡由許冠文主演的《雞同鴨講》。(洪業銘攝)

除了電影,連香港人甚小讀的粵語小說亦成為馬詩帆的涉獵之物:「早期我會睇《小男人周記》,講個主角經常出錯,係公司做野都會出各種意外。」而他最近則喜歡讀網上論壇的連載小說:「最近我就睇新一代嘅,係高登論壇連載嘅網上小說《男人唔可以窮》,佢講到男人唔單止唔可以無錢咁簡單,而係要正直。」

馬詩帆之所以如此喜歡廣東話,是因為被豐富的句尾詞吸引:「廣東話有幾十種句尾詞,表達到唔同意思。例如佢又搬屋喎,呢個喎字有表示我聽返嚟嘅意思;又搬屋啩,就代表我係估出嚟。」

懂得看及讀中文的馬詩帆到餐廳點菜時都會用廣東話。(洪業銘攝)

廣東話助歷史、文化傳承

提到早前教育局局長楊潤雄提出廣東話長遠會否失去優勢的疑問,Lucas和馬詩帆都異口同聲指母語教學是最理想。Lucas認為廣東話在文化和歷史上均充滿價值:「香港文化是建基於廣東話和英語,而普通話跟簡體字會失卻了很多與歷史相關的聯繫。如果你現在叫小朋友不用母語上課,我覺得會跟香港文化形成一種隔閡。」

目前在大學教廣東話語言學的馬詩帆則指,事實上不少內地及外國學生都對廣東話有興趣,同樣認同母語教學對小朋友最好,且有助傳承:「我哋今年去左加拿大,發覺好多父母都會想小朋友學廣東話,同埋用廣東話學中文。佢哋會想一代傳一代,小朋友如果唔識廣東話,就唔可以同上一代、老人家溝通。」

馬詩帆現時會閱讀網上論壇的粵語小說。(洪業銘攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。