【周永勤棄選】狙擊行動足本錄音曝光:等佢開論壇都冇心機

最後更新日期:

周永勤突然在有線電視立法會選舉論壇上宣布棄選,更一度灑淚。(有線電視截圖)

原定出戰立法會新界西選區直選的自由黨周永勤,昨晚突於有線電視選舉論壇宣布棄選,事後回應傳媒提問時更一度灑淚稱:「我唔想講呀!」周早於昨午2時許,曾向傳媒提供兩段錄音,稱是市民報料,內容講述到如何在論壇狙擊周永勤,有人並建議在論壇中段,換衫再歸隊支持何君堯。何君堯證實,該男聲為其選舉義工。《香港01》記者昨午曾聯絡周永勤,並取得應錄音,當時周仍未見異樣,豈料晚上即急急宣佈棄選,又向其選舉傳媒聯絡人交代離港數天,記者至今仍未能成功與周聯絡。

錄音中一把男聲下指示狙擊周永勤,狙擊完畢後需穿起背心支持何君堯。(資料圖片)

周永勤指街坊偷聽到有人要狙擊自己

周永勤昨午曾聯絡《香港01》,指有市民在屯門蝴蝶邨飲茶時,偷聽到鄰枱有人稱要動員狙擊自己,又向記者提供兩段相關錄音,當中有一把男聲指「咁我哋今日呢有兩個身分嘅。一個身分呢就係市民,就係自發抵唔得頸呀周永勤,同埋呀鄭松泰佢哋嘅政治抹黑嘅手法好不良」,該男聲又提到召集20至30人到會場狙擊周永勤,要令周「開論壇都冇心機為止」,並指示狙擊完畢後穿起何律師(何君堯)背心,支持何君堯。以下為兩段錄音全文:

兩段錄音全文:

第一段錄音:等佢開論壇都冇心機為止

唔係,嗰度呢就係,何律師就意思,8字嘅牌還8字嘅牌,咁我哋今日呢有兩個身分嘅。一個身分呢就係市民,就係自發抵唔得頸呀周永勤,同埋呀鄭松泰佢哋嘅政治抹黑嘅手法好不良。同埋,呢佢嗰三個學運領袖呢,個判刑過輕。而呀何律師提出個上訴要求,律政司上訴而佢哋質疑何律師多管閒事。咁我哋發公義之聲,今晚會召集二三十人呢,就喺個會場狙擊周永勤嘅。咁等佢開論壇都冇心機為止。咁我哋今晚就會咁做嘅。所以一陣會畀啲牌嘅標語呢去做,我依家就睇下,er…唔會我哋做㗎,我哋做唔到㗎,咁呀寫字樓嗰度幫手做啲牌咖啫下。另外,我一陣同你夾呀XXX(按:某義工名字)

第二段錄音:散會時再狙擊

我哋狙擊完呀周永勤之後呢,就帶隊著返晒何律師嘅背心,就喺現場支持何律師、打氣,係咁多。散會嘅時候,又狙擊呀周永勤,個做法就係咁啦,唔該。

周永勤下午仍未有異樣

記者收到錄音後,曾與周永勤通電話,當時周仍未見異樣,稱因自己過去曾揭露何君堯的醜聞,因此與對方關係轉壞,估計對方希望籍狙擊行動,打擊自己的選舉聲望,故向傳媒提供錄音,希望傳媒關注事件。

豈料5小時後的選舉論壇,周永勤卻急急宣佈棄選。事後,自由黨榮譽主席田北俊在Facebook專頁稱正嘗試聯絡周永勤,稱「非常擔心佢同家人嘅安危」。而商業電台引述周的競選傳媒聯絡人稱,周昨晚曾交代將會離港數天,她指「近呢個星期都感受到壓力」,但未有交代具體情況。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。