【立會新丁】容海恩自評論壇未現真性情 想同「鄺神」跳街舞
「不如你話畀我知吖！」這句說話，是新民黨候任立法會議員容海恩，在選舉論壇上被對手質問時的回應，亦令有「法律界桂綸美」之稱的她，被質疑只是一個花瓶，將來在議事堂內「口窒窒」地議政。
容海恩接受《香港01》專訪時就為自己平反，指論壇上未能顯示自己真性情，更信心滿滿地指即使議會內未能時刻有黨主席葉劉淑儀「傍住」，亦「唔覺得自己勝任唔到」。容海恩又自詡為「最佳溝通員」，表明要用「音樂、打機、煮嘢食、飲嘢」，「都可以打開非建制派的心」。她又指，議會內的「最佳溝通員」不是建制陣營中的元老，反而是被視為激進泛民的「長毛」梁國雄。
用音樂打機打開非建制派的心
新一屆立法會當選人的平均年齡，較上屆議會年輕8歲。有份拉低平均年齡的容海恩今年39歲，曾被網民翻出兩年前獻唱舊片段的她，揚言想用唱歌謝票，又希望和民主黨超區候任議員「鄺神」鄺俊宇一齊跳街舞，「跟泛民打交道。」雖然她被視為「西環契女」，要打開非建制派的「心」似乎有難度，但她就說，「用音樂、打機，都可以打開他們的心」，不過要視乎對方「受唔受我玩」，坦言想做踏出第一步、修補雙方關係的人，「做同事幾年㗎嘛，或者傾下偈飲下嘢， 煮嘢食都得嘅，無所謂！」
容海恩說，在一眾年輕候任議員中，較欣賞香港眾志的羅冠聰，因為對方的談吐反映出歷練。她又自爆是一名「機迷」，曾對「英雄聯盟」（LOL）等遊戲入迷；至於是否有利打開與同樣是「機迷」羅冠聰的心，她稱打機時不能一心二用，「打機還打機，要另再約佢哋傾偈」，「不過希望可以講一個話題大家是舒服的，唔係講咁尖銳的話題，唔好講咩政改， 就先講青年人問題先啦！」
自稱上過120小時溝通課程、是「最佳溝通員」的容海恩，語言技巧似乎未有在論壇上顯現，並招來「花瓶」之說。容海恩在選戰過後與傳媒茶敍時，言談間談笑風生，又大方承認論壇上表現不足，笑言連朋友都對她當時的表現感到失望：「嗰個都唔係你嚟嘅」。在論壇上「處處捱打」，容海恩形容自己表現欠佳源於緊張：「始終是緊張的，頭幾次做論壇，一次比一次艱難咁。」
反批陳志全在論壇「以偏概全」
在論壇上，一句「不如你話畀我知吖！」，令容海恩被指身為大律師卻毫無辯論能力。她對此事至今仍耿耿於懷，激動地指出，當時是人民力量陳志全向她詢問對標準工時立法的看法，她本身不想直接回答「是非題」，「佢問我支唔支持標準工時，我無理由問你『你鍾唔鍾意食麵？』 就立即答，你都要講下咩麵， 日本麵、意大利麵、中國麵，淨係問你鍾唔鍾意食麵， 咁樣好似以偏蓋全！」
至於被網民瘋狂轉載、她回應陳志全對徵收陸路離境稅看法時，以「咁飛嗰啲呢？陸路呀？淨係陸路呀？咁飛嗰啲你又唔控制嘞喎」來回應，被外界恥笑她無常識，更要排在其名單第二的譚領律輕拍手臂提醒。容海恩回應此事時，強調譚不是葉太委派來提醒她不要「講多錯多」，「唔需要，無論我答成點佢哋都係支持我，佢哋都係信賴我嘅答案」。
讚長毛「最佳溝通員」 二人有偈傾
既然自認是立法會議員「最佳溝通員」，容海恩竟認為社民連梁國雄亦是議會內另一位「最佳溝通員」。雖然她站在「反拉布陣營」，但容海恩形容「長毛唔會太激，佢都係講理性，所以得民心一直連任。」對於建制派經常批評梁國雄在議會中「掟嘢、拉布」不理性，容稱：「我相信只係針對性， 因為某啲事項真係市民需要佢咁做，或表達到佢情感，當然我哋不認同」。
「最佳溝通員」長毛原來在選舉期間都有與容海恩溝通，「佢都係以一個長輩同後輩的身份去講返，唔好話教啦。佢會話『喂，你咁樣嘅』，事後同我講『做咩唔答問題呀？』，所以我覺得佢都係一個好人來的，都可以向佢學習下。」
唔怕無葉太「傍住」 相信自己能勝任
容海恩自認小時候讀書成績不好、背書差，能否熟讀政策在議事堂上議政或成為她的挑戰。但她稱「運用就唔同㗎喇！開會活學活用， 我無可能唔識囉！你唸口簧都會識。」葉太早已表示，現階段要抽時間為容海恩「補習」，但未來在議會中未必經常有葉太「傍住」，會否擔心自己「甩轆」？容海恩就稱：「都唔會呀！因為樣樣有程序，我亦都相信議會中各人有各自工作、責任，我唔覺得自己勝任唔到」。