【廢青求職攻略】辭職時「Reference Letter」只係一份紀念品

最近見到求職網站多咗唔少新職位，你公司有無同事「Sick Leave」密咗？而家見定工，過完年交信剛剛好。人來人去等閒事，每個辭職嘅員工同公司最後一個月嘅交涉，除咗人工、Claim車錢飯錢之外，應該就係封「Reference Letter」，我真係經常、經常、經經常收到讀者提出有關呢封信嘅疑問，甚至覺得：

如果我最後一個月唔任勞任怨，公司會唔會唔比Reference Letter我？

其實呢封信又係咪真係咁重要？

唔係唔重要，但唔係好重要

坦白講，除非你係傑出員工、或者老闆對你超有印象，否則所謂嘅「Reference Letter」咪又係HR出比你嘅Standard嘢，即係寫你咩名、咩職位、做咗幾耐、證明係自己辭職而唔係比人炒，再加句祝你前程錦繡之類，HR改幾粒字就可以Print出嚟比你，咁樣嘅一封信真係會幫到你日後搵工？真係足以影響新僱主對你嘅印象？

封信的確係有佢嘅作用，但個作用一般都係用嚟證明你無講大話，證明你寫嘅CV係真、你真係喺某某公司做過某某職位，同埋證明你唔係比人炒，完。

各位唔使再成日驚：

如果我最後一個月唔照老闆吩咐做哂半年後嘅工作先走，佢會唔會寫花我封Reference Letter？

佢唔會寫花你封信，因為佢連多幾粒字都唔會寫比你。調轉你係老闆，你會唔會花心神、傷腦筋去寫篇文形容一個已經無利用價值嘅人？你已經係Nobody，老闆用多啲時間處理剩低嘅人同工作，或者研究吓點樣出個請人廣告好過啦。

比一封信牽住走？喺公司搵定個諮詢人更實際

如果你申請高薪厚職、一言一行對公司有莫大影響力，公司請你之前當然會起你底、查清楚家宅。相反，講真只係請一粒微塵返嚟，除非你有犯罪紀錄或者嚴重過失，否則無幾多間公司會介意你喺舊公司入面係一個點嘅人，因為普通如辦工時間上網、返工遲到、射波此等小事，有幾多打工仔係從來未試過？老闆同HR都唔會傻到認為兩三萬蚊可以請到一個完美嘅人返嚟。

間間公司制度唔同，有啲大公司程序上的確要「問一問」你舊公司覺得你請唔請得過，但佢地嘅方法絕對唔係睇你交出嚟嗰封「Reference Letter」，而係問你拎舊公司HR／上司的電話，打去問吓佢地點睇你，我就試過交舊公司HR電話號碼比新公司的HR，我唔知佢地傾過乜，但最後請咗我。交電話號碼出嚟嗰時我就無咩緊張，因為舊公司有成幾百人，個HR同我又有幾熟吖，都唔會講得出啲乜，再者，只要你喺舊公司無亂得罪人，好少人會刻意講損人不利己嘅說話，因為大家都知世界是圓的，無人想為自己製造多一個敵人，係人都想第時跳槽有人幫。

仲有一個必勝方法，就係離開公司之前同上司做朋友，見新工直接填佢做諮詢人。萬一你同前上司有牙齒印點算？喺公司搵一個同你關係良好嘅「上司」（不一定直屬）填落去就得，當然你要同呢位「上司」工作上有合作關係，可以講得通佢係了解你嘅就得，例如你係廣告部，你填會計部經理做諮詢人，唔係唔得，但要諗定你地之間嘅合作經歷，例如曾經一齊滿足過一個要求高嘅客戶所需之類，而唔係純粹大家都鐘意曼聯所以寫佢個名……

其實見工好多時都係睇你執生能力，並無「必中」或「必錯」的答案，好多嘢只要你組織得好，你敢講，就有人信。所以封「Reference Letter」……當留個紀念就夠。

（本文純屬作者意見，不代表香港01立場。）