【閨蜜巴打BFF八大要素】小同中同大同,你幾時識你Best Friend?

撰文:
最後更新日期:

大家人生追求咩野? 名利定係自由,冒險定係安穩?

但無論你的「人生屬性」係追求咩野,相信你都會同意,「友誼」呢回事帶來的感動,可謂千金難買。

在這個IG與Snapchat的快餐年代,我們的「Friends / Followers」與前所未有地多。飲飲食食嘻嘻哈哈背後,有幾多人可以有信心地指出自己的Best Friend為誰?

大部分人真正的Best Friends來自讀書時期,而其中No.1 係中學時期,其次係大學,再之後先到小學。(VCG)

SJ同大家探討下Best Friend這回事。或者,係Best Friends,通常都有以下特徵:

1. 中學同學 > 大學同學 > 小學同學

非正式統計,大部分人真正的Best Friends來自讀書時期,而其中No.1 係中學時期,其次係大學,再之後先到小學。

大概係因為中學時期的同學日日見,開始有局部自由度,而又有大量共同經歷:每日早會,上堂,小息,放Lunch,放學,課外活動等,到Weekend就可以相約出街/打波/唱K/影貼紙相等。

相反,大學雖然更自由,但正因為太自由,可能反而較少共同經歷。而小學,主要係大家都心智不成熟,就算細時好Friend,大大下更容易各行各路,例如朋友間入了Band 1 vs Band 3校,咁幾乎可以肯定會慢慢疏遠。

而且好重要係,數據來講,中學有6年時間(以前7年添),相比大學4年(以前得3年),小學雖然都有6年但真正稍為有思考能力都係得高小2年,中學識到好朋友機會自然大得多。

由朋友上升到好朋友甚至Best Friend,幾乎必須有呢種經歷。(《那些年》劇照)

2.  有長期共同興趣

無論係咩時期認識,成為長遠好朋友,往往都需要一些長期共同興趣。

最典型的就係球隊朋友,定期一齊踢足球,踢完足球就食埋飯吹下水,咁呢個運動就將你地綁埋一齊,再加上呢D團隊運隊期間你地的共同經歷,培養了球場上的默契與支持,很容易在場外的友誼延續。

3.  有深刻共同經歷

有深刻共同經歷可以話係友誼的「Cornerstone」,有睇過美劇《Westworld》大概都會明白咩意思。

無論係中學時期犯校規一齊被罰,或者係一齊躲在草叢躲過訓導老師的追捕;定係畢業後一齊去旅行,幾個人各自租架綿羊仔環島,去到邊玩到邊,嘻嘻哈哈之餘,竟然遇上特別劇情,例如協助幾個在路上意外受輕傷的當地人,一個負責洗傷口,一個負責開車運送物資等,延伸Teamwork拍住上幫人脫離險境。

呢D都係深刻共同經歷,由朋友上升到好朋友甚至Best Friend,幾乎必須有呢種經歷。

一家人都有唔同政見,但好朋友之間往往價值觀反而唔會差太遠。(資料圖片)

4.  價值觀類近

一家人都有唔同政見,但好朋友之間往往價值觀反而唔會差太遠。

當然,一個基督徒,理論上都可以同個無神論者做好朋友,但容易有Conflict,除非雙方都努力避開。

但假如呢D價值觀本身對你來講係好重要,咁就唔係太容易避開了。

5.  住得近

如果2-4係Best Friend的「軟件」,呢個就可能係其中一個「硬件」。

住得近特別容易做到Best Friend,原因好簡單,雖然話Whatsapp都好方便,但無野比隨時一個電話就約落樓下食飯傾計更加體現到友誼的可貴,尤其係假如任何一方需要緊急幫忙時,Best Friend更加可以係提供「照應」的不二人選。 事無大小都可以隨時見面, 就係朋友間住得近所提供的便利。

假如有一日,從前步行距離的Best Friend因種種原因要搬到第二個區,搬走後你才會發現少了一個放工晚上可以隨時出來傾計的 Buddy,或者到時先感受到個種患得患失感。

中學時期,所有朋友基本上都在區內,而且大家都好Free,任何一個朋友約出來打波食飯,基本上一呼百應。(VCG)

6.  唔使約 隨時即興見面

承上題,住得近其中一個好處,就係凡事唔使約。

或者大家都有呢個感受:中學時期,所有朋友基本上都在區內,而且大家都好Free,任何一個朋友約出來打波食飯,基本上一呼百應,一個鐘後大家已經在樓下某間Seven集合。

相反,出來工作後,各自因工作或伴侶的原因搬到全港各區,而且每人都忙於工作/讀MBA/籌備結婚/生仔/湊仔/同其他朋友消遣等等,好難再即興,基本上任何見面都要2個星期前開始約,然後都好難約齊。

而真正Best Friend,始終都為你留一席位。

7.  認識對方父母

呢個去到好Advanced了,大把人拍拖5年,都未見過對方父母。然而,假如Best Friend已經見過父母,更顯呢份友誼已經幾乎打爆機 Lv 999。

假如你而家有一個重要的個人決定,撇除呢個決定本身的專業性以外,你第一個或者最看重邊個朋友的意見?(《閨蜜》劇照)

8.  互相承認Best Friend

呢個大概係最困難,唔係話平時美國黑人/星加坡式的 「Hey bro!」

而係假如你而家有一個重要的個人決定,撇除呢個決定本身的專業性以外,你第一個或者最看重邊個朋友的意見?

而且,對方又會否同樣將你擺為第一或者最重要?

正如愛情,「殘忍的單戀非你專利」,假如係單方面的友誼,其實一樣令人遺憾與難過。

例如,對某些人而言,你再努力去融入,佢永遠唔會當你係朋友,更遑論Best Friend。

相反,例如假如你想去旅行,你想到的旅伴會係呢位朋友,而佢又正正係想同你一齊出遊,咁好可能呢種友誼係雙向的。

可能,呢個就係你Best Friend了。

結語

好朋友可以令你忘憂,甚至為你解憂。SJ也特此感謝自己幾位好朋友,有些事或者力量,係神奇得經歷過先會相信。To our best friends! 或者,不要埋怨沒有的,而是感恩我們今天擁有的。

【原文轉載自StealJobs.com。StealJobs全面透露各行各業人工,工時,晉升前景,以及入行攻略,歡迎匿名提供收入資料。】

立即下載《香港01》,緊貼公務員職位空缺、勞工處筍工推介,了解CV、面試致勝技巧!
下載網址:
https://hk01.app.link/bkbJyY5t4O



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。