【Fashion】LV新系列核突過觀光店手信？無局限才是二次創作
小菲擦邊球都算係半個潮童，Jeff Koons 同 Louis Vuitton 合作竟然去到第二彈，上次搞到滿城風雨，今次緊係要關注。點睇？見到好多人話 LV 應該係履行合約先會同Jeff Koons 繼續出 part II；喂，呢個世界邊有咁灰機啊（淨係窮人先會灰機㗎咋）！
唔好講笑，4 月初出第一爐香，人家聽到 Jeff Koons 同 LV 一齊玩喎，個個都打個冷震。個 Masters 系列現身，大家都打個突，劣評如潮喎，點算先。小菲當時係有俾佢震懾到，但諗深一層，其實，why not？
大師名畫 + 高端時尚＝ #LVxKOONS 正正得負？
小菲帶你時光倒流。今年 4 月，當代藝術潮童 Jeff Koons 同高檔的 Louis Vuitton 聯手，手上一堆牌開嚟見人，Jeff Koons 一次過將 LV 的名牌包包、絲巾同鑰匙圈齊齊披上國際大師光環，將達文西呀、梵高呀、Rubens 呀、Titian 等等嘅名氣大作一炮過印嚮各種高檔貨上面。嘩，個個道長上身 e 嘩鬼叫咁大鬧佢破壞原作，一句「印嚮個袋上面變晒形呀」，一句「唔尊重各大已入棺的老人家們呀」此起彼落好聽過浪聲。乜二次創作會影響你對原作嘅印象咩，點解 LV 同 Jeff Koons 玩二次創作你就要 diss？網絡發達各大名師作品唔係早就以不同的形式平民化晒架喇咩？咁大個人重講呢啲無謂嘢，痴線架咩，咁你繼續支持廿三條啦咁。
拿，Jeff Koons 重好似貼堂以超大隻字 cite 返畫家本人，鍍金鍍銀烙上各位大名。一幅幅價值連城的名畫印嚮高級時尚包包上面，出到嚟正正得負？反而賤過羅浮宮傍邊打卡勝地觀光店賣的周邊手信？坊間唔少人話呢次 crossover 好 low，更加大罵堂堂逾百半世紀的大牌玩低檔，愈玩愈低。但小菲唱反調，就係唔同意！
名牌唔做得二次創作？你話佢係馬桶？我話佢係噴泉！
如果你有留意當代藝術，100 年前的 Marcel Duchamp 個 Fountain 都係一鳴驚人。如果你話今次 LV 搞個羅湖 A 貨，佢話佢今舖係世紀大作。二次創作就係無局限！高檔品牌同庶民一樣玩得！
有人話最大獲係 Jeff Koons 拎埋自己 initial JK 整成偽 LV 商標，一秒將大牌包包變羅湖商業城的二次創作，大家不禁弱弱問句：邊個買？
Jeff Koons 向來就係咁的一個人，慣常將日常裡面最俗套嘅嘢更俗套咁呈現嚮你面前。喂，記唔記得佢個噸半重的迪士尼輕氣球？又或者果隻大到暈的汽球玩具狗？都係 Jeff Koons 的拿手好戲。講到 Manet 配合成的 Neverfull 包包佢重話：「他們是我生命的一部分，當有人拿著這個手袋走到街上或坐在咖啡店時，便展現出對人性的愛。」小菲小人之心假設 Jeff Koons 內心 OS：「Hey，咁大個品牌任我玩，我唔將你 hi-end 拆到 low-end 實在浪費呢個機會！」
一邊笑住 make fun 一邊求求其其 make some noise。何樂而不為。
你估養狗唔可以嫁獸醫咩？你以為 LV 傻的嗎？
你以為 LV 痴線㗎咩，德國啲電視先係痴線（按此重溫舊文）。咁大個品牌會亂嚟？你以為搵 Jeff Koons 之前無做過 research？咁天真咩。
LV 先前搵過一張花紙包起博物館的 Richard Prince，又用點點點出了草間彌生，亦都試過俾村上隆將日本之美（櫻花和漫畫）落入品牌之中，靚唔靚見人見志。但從來，靚都唔係重點，get it？Let me put it this way，身為領導人，靚唔靚還重要咩？金正恩要似 Taxi Chan 咩？最重要緊係走嚮最前，而呢種最前唔係剩係爆炸性，而且衝出去的爆炸力！
如果小菲係 LV，自問財雄勢大而家唔做幾時做？而家唔玩幾時玩？唔好以為搵個 artist 返來求其撩幾筆就過關，咁大個品牌我唔信大家唔駛過關斬將拎 permission（當然小菲都信實有傻仔品牌事事旦旦，但唔好咁諗住先話晒百幾年大牌子）。搵得 Jeff Koons 都知佢「龍嘢」，俾得佢玩就係低俗先夠格。如果唔係，倒不如直接買版權將 Luncheon on the Grass 成塊印絲巾就算啦，都已經包起 Mona Lisa 個廳開酒會啦，駛鬼叫 Jeff Koons 再加神來之筆咩。
LV 就係尺衡量過自己，玩得起先會玩！先前 Louis Vuitton 的 CEO Michael Burke 早就對《New York Times 》講過，就係因為要玩政治不正確，好有信心咁話聽到反對聲音就代表他們真係做得啱。所以奉勤大家，唔好行得太貼，不妨退後一步睇真整個與 Jeff Koons 合作的背後概念。
況且，呢個世界裡面 who care 你是不是 care 喔。小菲行完美術館後都曾經嚮 museum shop 買過把梵高長遮，亦都買過翻印出來的富嶽三十六景，重會沾沾自喜；倒是真係毫不介意拎住 Rubens 的大旅行袋出門遊阿姆斯特丹，拎住 François Boucher 當去咗法國喔。
（文章純屬作者意見，不代表香港01立場。）