【Future Man．美劇評】Seth Rogen重現香港失去了的無厘頭文化
上世紀九十年代叱吒一時的無厘頭文化，將港產片提煉成時代的精華，嗰種低級無聊無厘頭笑話，如中國功夫一樣，帶住香港衝出國際。
Bruce Lee同Jacky Chan？唔通我學過如來神掌又要講你知咩？
小菲都曾經以為外國人剩係識李小龍同成龍，老早就去咗荷蘭的港人餐廳老闆甚至問小菲香港迪士尼起好之後係咪真係成個樂園咁。韓國仔仔更同小菲講讀電影嘅佢最鍾意林青霞添。但小菲話你知，無人不識的係我哋嘅逃學威龍周星星呀。
係呀，真係席捲整個歐洲的喜劇有我哋嘅周星馳呀。小菲十年前已經喺海牙睇到電視播少林足球，配埋荷蘭文，當下睇住個畫面個腦都自帶周星馳把耳熟能詳的聲線。當時以為只係咁啱得咁橋帶住條東方代表「功夫」橋，先將《少林足球》踢出國際，幻覺嚟㗎啫，嚇我唔倒嘅！但事後小菲喺歐洲好多地方同英國都有電視台播周星馳的戲。嗰下你就無辦法唔再相信，曾經風靡的無厘頭電影已經真真正正咁滲透國外。
有今生無來世！Seth Rogen重現無厘頭文化大盛
喜劇類的美劇通常都無乜邊出真正跑出，好多美劇迷都會選擇自動略過。不過好在上天都待小菲不薄，Seth Rogen親自落場監場的《Future Man》幕後花絮流出，小菲立即雙膝跪地搓手期待。
Seth Rogen+Evan Goldberg的製片配搭真係魅力無窮，先有血腥暴力的美劇《Preacher》（影評傳送門）同電影《The Watch》，而小菲同佢地情訂終身的係2013的一套《This is the End》（大明星世界末日），呢套最把炮係有真．男神James Franco出演，「I'll cum everywhere!」一幕真係贏得世間掌聲（YouTube 有得睇！）。
《Future Man》算係 Hulu 繼 《The Handmaid’s Tale》（按呢度睇返小菲對《使女的故事》的睇法）後的另一套話題之作，爛蕃茄有77%，IMDb當然直上8分無懸念。天啊！小菲簡直覺得中頭獎！
Seth Rogen同Evan Goldberg喺《Future Man》空前絕後咁重現當年無厘頭文化大盛的熱鬧氣氛。追朔過往，香港的無厘頭似乎喺星仔變成星爺後消聲匿跡了。星爺人愈大愈內斂，變成電影輔角後的周星馳已經將「周星馳電影」扭出另一種新高度，雖然好唔好睇仍然見人見智，但至少星爺選擇真心做自己想做的事。無厘頭誇張角色真係後繼無人？我哋最愛的周星星真係無後代？香港呢廿年嚟都無貨，咁缺貨？不如而家就由身為星爺粉絲的Seth Rogen帶你取西經！
《Future Man》式周星星救世界：only you can take me 取西經？
講到低俗搞笑可能你會諗起彭浩翔的「牛歡喜」；2000 年打後，喺香港要搵笑片要搵鄭中基扮機械人「銀芽」，要低俗你有杜汶澤同你騎騾仔。但《Future Man》的搞笑係千真萬確貼近周星馳的「誠實豆沙包」，粉絲拍出偶像嗰種九十年代橫掃的無厘頭，開始拿捏到節奏的Seth Rogen任你笑到節操跌滿一地。
故事很簡單，一個中二病主人公，接受由遊戲機入面出嚟的一對男女邀請，同佢地一齊穿越救世界。拿，就好似《12 Monkeys》溝《刀劍神域》咁，身為清潔工的男主因為打爆機一下子變成拯救世界的救世主。用上《Hunger Games》男角Josh Hutcherson做中二病英雄與俠義化身的男主角，嗰種善心的窩囊廢變成救世主，簡單啲嚟講就係直接叫人諗起《一本漫畫闖天涯》夜總會侍應阿星。前者沉迷打機虛擬拯救世界當個救世主，後者醉於港式漫畫黑社會情義想要成為大佬。帶住無厘頭的對白同劇情，所有嘅荒謬同突兀都變得合晒邏輯；粗俗、下流同不文更似乎成為標誌性符號，勾勒出無厘頭精神。
唔講得笑的係Hulu片頭都改埋打機字樣，半小時一集，一季十三集。小菲特別推薦劇本同場片調度都極為一流的第九集，拍得好有《92黑玫瑰對黑玫瑰》的感覺。想要重溫九十年代的低俗無厘頭？而家就係機會喇飛雲！有今生無來世呀！小菲趕住去二刷，Ciao。
（本文純屬作者意見，不代表香港01立場。）