【英倫對決.影評】唔係動作片 主線係一個政治陰謀故事

撰文:李聲揚
出版:更新:

讀者冇耐性,比個結論你先。《英倫對決》 (The Foreigner) 照計唔會太收得,亦唔可以話好好睇。但算係有誠意,值得一睇。在我心中「值得一睇」已經係讚。人生苦短,好多嘢唔值得浪費時間。

講返套戲,你點迴避都好,點都避唔到要講,成龍。亦係因為呢個原因,冇人肯同我一齊睇。成龍因為政治立場同言論,當然係好多香港人眼中釘。但無數咁多事實話你知,出去講香港電影,甚至講香港,人哋都只係會識成龍李小龍。你去紐約倫敦仲好啲,人地會識王家衞。去到科索沃瓦努阿圖之類(我去過!真係去過!),你講你嚟自香港,人地只會講三樣嘢: Bruce Lee, Jackie Chan, 同埋 Jet Li李連杰 (暫時仲未會講最好打嘅馬雲, 同志仍需努力)

成龍電影,在而家嘅香港,係趕客嘅。即使唔計政治立場之類,大家,包括我,聽到呢套戲嘅反應都係:喂大佬,仲打?唔好啦啩。幾廿歲人,房祖名大家都嫌老啦,仲整佢老豆出嚟,唔好啦。亦都大把人抱住食花生嘅心態入場,睇你臨老仲要吹啲打點出醜。 呢套仲要係「合拍片」(萬達同華誼兄弟有份),更加趕客。

11年前我正係抱住同樣心態,入去睇史泰龍(Sylvester Stallone)嘅 「洛奇:拳王再臨」(Rocky Balboa)。好心啦,成百歲人仲打擂台,傻的嗎?做多次Rambo都仲未癲夠? 但結果, Rocky Balboa非常好睇,直頭係打臉。當初入去諗住睇龍哥出醜嗰啲,應該感到羞愧。

呢個亦係我對《英倫對決》嘅睇法,黑心想睇成龍出醜嘅,應該感到羞愧。

想睇成龍出醜嘅,應該感到羞愧。(《英倫對決》電影劇照)
+47

表面上個故事好簡單,預告講得好白,唔怕劇透。恐怖份子炸死咗成龍個女,成龍單挑報仇。嘩頂,中國超人?定耆英版救參96小時?(OK, 其實 Liam Neeson仲老過成龍)。 之前我都有睇成龍嘅《天將雄師》同《十二生肖》。好爛就稱不上,但都係果句,好心啦, 幾廿歲人,仲打打打……爭在未好似在《神話》拍金喜善咁當自己係情聖。

但《英倫對決》真係唔係好同。佢唔係大愛國(無論英國定中國)故事,亦唔完全係慈父救女故事(成龍要救不如打鬼妹救左小龍女卓林先?)。套戲唔係冇動作場面,唔少。但主線其實係一個政治陰謀故事。

《英倫對決》就係一套有啲不倫不類嘅戲,話動作片又唔係,話political thriller又唔完全係,但原著小說《The Chinaman》都係咁上下,一方面講英國嘅政治陰謀,北愛爾蘭問題,愛爾蘭共和軍,政客為上位或自保可以去到幾盡。另一條線就係主角為女復仇。

就算對成龍點冇偏見都好,都不能否認,其實政治嗰條線好睇好多。皮雅士布士南(Pierce Brosnan)不經不覺咁老,好長時間我都仲當佢係占士邦。佢演得好,夠深藏不露,收放自如,加上本身係愛爾蘭人,演返角色先有說服力。至於成龍,就真係老態龍鍾。但亦冇所謂,書入面都係咁,成龍戲入面甚至比佢現實更加蒼老。而成龍亦唔係一打一百嘅英雄(雖然都好打得),亦唔會為老婆仔女忽然大爆發嘅Liam Nesson。你在佢面上,就只見到滄桑。呢個老兵經歷嘅失去嘅已經太多(又,成龍現實都係咁)。

皮雅士布士南(Pierce Brosnan)不經不覺咁老,好長時間我都仲當佢係占士邦。(《英倫對決》電影劇照)

其他政治陰謀種種就唔劇透。但政治情節令套戲有一個問題。原著係寫於1992年,嗰時北愛仲係問題,愛爾蘭共和軍仲十分勇武。但事隔咁多年而家先拎嚟拍戲,就難免令人有啲難代入。留意套戲冇拍「嗰個年代」,係設定返在現代,有手機有手提電腦。而家嘅貝爾法斯特(Belfast),應該和平過你去旺角。

外媒相當讚賞成龍嘅演出,認為好破格,唔係以往嘅醉拳小子諧趣角色,或超級警察一打一千,我認為外媒都係對佢太偏愛了。成龍不錯係事隔幾十年卒之有啲「演技」,佢演嘅角色同以前都唔同。但唔好話拎嚟同史泰龍嘅Rocky Balboa比,佢嘅演出甚至比唔上甄子丹在《追龍》嘅突破。而其實成龍師兄洪金寶好早已經在《八兩金》證明自己識演劇情片。

所以,成龍nice try,但主要都係睇皮雅士布士南,以及種種政治嘅勾心鬥角。你好易會tempted to think套戲冇咗成龍仲好,但冇左佢又真係唔完整,而呢個角色我又覺得佢演得稱職。

(本文純屬作者意見,不代表香港01立場。)