【2017香港電視大事回顧】大台近年最叻係令觀眾好快咁厭惡一樣嘢
2017年眨吓眼又過，由各大網絡搜尋器嘅全年搜尋排名嚟睇，免費電視仍舊係大眾嘅最基本嘅娛樂，無他，唔使錢又覆蓋率高，總係比電影、舞台劇等等同樣係視聽之娛嘅活動普及得多。所以我成日都話，就算你唔睇電視，都應該要知道電視業界發生緊咩事。因為免費電視頻譜係公共資源你同我都有份，要大家一齊去監督。另外，就係電視嘅影響力仍然係好強，熄機完全唔理佢同斬腳趾避沙蟲一樣，係不設實際。好喇，講咗咁耐，不如睇吓2017年到底香港嘅電視業界發生過啲咩大事。
女人劇天下
估都估唔到，2月播出、江美儀因為劇本問題而叫停廠最後搞到電視城滿城風雨嘅《親親我好媽》會成為年頭嘅收視奇葩，再加上5月播出、 大台首部4K實境拍攝嘅《不懂撒嬌的女人》，兩套女人劇成為咗上半年嘅收視同埋口碑王者。男人劇呢？最剛陽味重又高啲收視嘅係9月開播嘅《使徒行者2》，不過都係唔夠呢兩套女人劇鬥。唔知2018年會唔會繼續係女人劇嘅天下？
《蘭花刼》創無綫黃金時段收視新低
講到女人劇，又點可以唔提以三姐妹恩仇做故事主軸、5月尾開播嘅《蘭花刼》？睇牌面，有蘇玉華、田蕊妮、唐寧以為一定得？可惜呢套劇係以低清喺2006年拍攝，事隔11年先至喺香港嘅免費電視頻道首播，將當年4：3拍攝嘅畫面，切割成16：9，大台話已經將畫面優化先播出街，但好多觀眾都因為畫面質素太低而棄劇，仲嘲笑套劇叫做《眼花刼》，令到呢套劇收視跌破16點，成為無綫黃金時段收視最低劇集。
不過好多喺其他頻道睇過呢套劇嘅觀眾都戥佢唔抵，因為故事演員其實都唔錯。三位女演員為呢套劇拍嘅宣傳片當中講到話「相信好劇有好報」，可能感動上天，喺最尾嗰個星期第15集有颱風幫手托一托收視，最後大結局都拎到20點，拎返個尾彩。不過此例一出，大台應該唔敢再拎啲低清節目出嚟播（其實有腦都唔會咁樣做）。
奇妙上場老舊乏力 自製劇集系列4缺2？
由九龍倉話唔再畀錢有線電視開始，大家擔心有線攬住個免費電視牌照一齊死。等了又等，5月18日母親節當日，有線電視持有嘅免費電視台「奇妙電視」終於登場。不過一開台就畀人老套感覺。慶祝開台節目靠老牌藝人撐場冇新意冇氣氛、重播有線娛樂台嘅《伍姑娘真識食》嚟做頭輪節目亦都令人驚奇萬分，加上「全新節目」《帶阿媽去旅行》擺明車馬sell媽媽級嘅觀眾，令到唔少年青嘅觀眾失望。
不過target係媽媽級嘅觀眾冇問題，計得掂條數拎到個巿場份額夠生存就可以。之不過奇妙嘅自製劇集就似乎唔係好跟呢個方向。事先張揚會拍嘅《100天》四部曲，全部以戀愛嘅唔同階段作為主題，同媽媽級嘅取向有啲差距。已經拍咗兼播埋嘅《閃婚100天》同《熱戀100天》冇乜人理，另外嗰兩部曲「分手」、「婚前」都唔知仲會唔會開拍……
急變劇線 大台周末線成砲灰檔
6月底，大台喺未有任何準備之下，將周一至周日每日播嘅2130劇線，轉做周一至周五播一套，周六日播另一套。身先士卒嘅有《踩過界》，好在劇本同埋演員夠硬淨，加上係合拍片，所以睇過嘅人都唔少。播完之後，就由周六日每日播一個鐘，變咗做周日連播兩個鐘，接火棒嘅《雜警奇兵》同埋《性在有情》都變砲灰，幾乎冇人睇冇人討論咁濟。急急改變令到本來為周一至日連環播而拍嘅劇水土不服，28集尷尷尬尬，所以先有《同盟》播星期一二三、《踩過界》播四五，一個星期斬開分畀兩套劇播大結局嘅安排。有電視城中人更加話之前高層話冇貨要日夜趕拍，依家轉咗時段咁玩法同燒咗套劇冇分別，浪費大家心力。無綫現時已經開拍緊專門為周日播而設計嘅劇集，希望傳聞當中接《性在有情》嘅《三個女人一個因》係最後受害者（又有黃智雯、郭子豪份…）。
BigBigChannel上場 大台全力谷
7月下旬，大台正式推出宣傳已久嘅Big Big Channel大台網，打算主攻後生仔網絡手機平台。本來求變創新應該支持，但係唔少電視節目都成為咗Big Big Channel嘅宣傳工具，當中最令觀眾眼火爆嘅係《香港小姐競選2017》，差唔多成個節目都為大台網宣傳，港姐變咗做KOL喺房裡面表演。再之後嘅《2017勁歌金曲優秀選第二回》更加變咗做Big Big Channel獨家直播，之後先喺J2播精華版。最難堪嘅係頒獎當日叫得獎歌手分享一吓做網上直播嘅心得同埋趣聞。大台近年冇嘢叻，最叻係令到觀眾好快咁厭惡一樣嘢。
不過Big Big Channel都有（唯一？）好處嘅，就係開拍網劇。以台慶劇《降魔劇》做宣傳、12月喺Big Big Channel獨家播放嘅《降魔的番外篇——首部曲》令到楊潮凱同埋黃建東首嚐男一滋味，雖然劇本有待改善，但普遍觀眾都樂於見到有位可以畀人上，多啲機會畀唔同臉孔，觀眾都冇咁悶。
《短暫的婚姻》《 未來還未來》短打突圍
經過一年時間，開台講明以實況娛樂做主打嘅ViuTV，最終喺《矛盾2》事件同埋《瑪嘉烈與大衛系列-綠豆》嘅威力之下，喺開台一年之際推出周一至五2130至2200半小時劇線。不過成績同口碑就未如理想，就連皇牌《瑪嘉烈與大衛系列》嘅新作《前度》都毀譽參半，好多鍾意《綠豆》嘅觀眾都叫苦連天。《詭探》叫做多人支持，但討論度同埋完成度最高嘅，係兩套喺9月同10月播出嘅短打劇集：10集嘅《未來還未來》同埋5集嘅《短暫的婚姻》。《未來還未來》講後生仔面對現實社會嘅掙扎而得到目標觀眾共鳴。《短暫的婚姻》由陳奕迅吸客，再靠金牌編劇莊梅岩嘅高質劇本成糊，我估ViuTV都始料不及。
不過令到觀眾搲頭嘅係播完《短暫的婚姻》之後，ViuTV就停播咗本地劇集，斷咗道氣。但係ViuTV喺幕後就密鑼緊鼓，一口氣開拍咗好多套劇集，傳聞喺2月就會推出。到底精心策劃嘅一擊，可唔可以超越兩套短打劇嘅成績，相信唔少本地電視迷都好想知，亦都等到好興奮。
《溏心3》觸礁 《降魔的》以小勝大
有觀眾推測ViuTV停播本地製作劇集嘅其中一個原因，係要避開10月至12月嘅無綫金禧台慶劇。咁諗都好合理，無理由同佢硬碰硬。不過世事真係估唔到，大台嘅四套台慶劇《老表，畢業喇﹗》、《降魔的》、《誇世代》、《溏心風暴3》，除咗《降魔的》有收視有口碑之外，其餘三套都係得啖笑。當中《溏心風暴3》更加畀一眾觀眾嘲笑做「挑戰劇」，舊橋段錯演繹硬潮語，令到呢套重頭台慶劇收視喺聖誕夜跌破20點。相信最唔敢相信嘅係sponsor嘅翠華集團。反而拍完先知係台慶劇嘅《降魔的》，喺觀眾撐馬國明、黃智雯等「撐弱小」嘅氣氛支持之下，成功跑出。石敢當胡鴻鈞人氣爆升直撲多個音樂頒獎禮，馬國明更加被觀眾熱捧做今年視帝。最慘嘅係憑《不懂撒嬌的女人》同《踩過界》喺年頭帶到年中嘅視帝大熱王浩信，畀杯爛奶茶搞到一舖清袋。
網劇起動 反黑高收 FOX出擊 邵氏亞視加入
9月，網絡劇《反黑》牽起追劇熱潮，喺大陸嘅優酷、同埋全球大部分地方都睇到嘅Youtube免費播放，當中Youtube仲係4K畫質。網上免費電視劇直接衝擊免費電視台嘅地位時，另一邊廂收費嘅華語電視劇都蠢蠢欲動。好多觀眾都期待嘅有FOX投資開拍嘅《心冤》同埋《香港華爾街》，前者有惠英紅、謝君豪、黃秋生，後者有吳鎮宇、張孝全、譚耀文，預計會喺2018年出動。邵氏亦開拍好多網絡劇，好似係已經同優酷合作、拍完咗嘅《飛虎極戰》，羅致晒一班昔日同埋現今嘅無綫演員。收唔收得仲未知，但以後免費電視節目會唔會再降多一個梯隊階級就似乎有迹可遁。至於喺12月透過OTT平台復活嘅亞視，都話會開拍《英雄本色》嘅電視版。多個人爭吓始終都係好事。
港台新大樓告吹 電台節目電視化
香港電台自從2016年4月亞視熄機之後，接手咗佢遺留落嚟嘅免費電視頻譜，但資源 一直都唔夠。除咗早晨資訊節目《早辰‧早晨》可以一直由開台做落嚟之外，就得返零星嘅節目好似係《五夜講場》同《自在8點半》咁。其他好多節目，都係將電台節目放部攝影機做直播變做電視節目，包括咗《千禧年代》同埋《精靈一點》，確係巧婦難為無米炊。不過最得人驚嘅，係10月時突然傳出港台嘅新廣播大樓計劃已經停止咗，電視部要繼續匿喺廣播道1號A，傳說落雨會漏水嘅舊樓度繼續默默做……
邵方逸華辭世 邵氏電視時代正式告一段落
11月22日，邵方逸華辭世，終年83歲。其實佢喺2012年已經向無綫董事局辭任副主席兼董事總經理「全退」，轉做非執董，不過「六嬸」仍然係喺邵逸夫死後無綫其中一個靈魂人物。邵方逸華逝世，代表住「邵氏」嘅電視王國真正告一段落。
佢喺無綫嘅管理手法，網民彈多過讚，最多人話佢「守財」同「管死晒條數」，令到製作進入倒退階段，令無綫同其他地區冇得競爭，係做成今時今日大台退步嘅主因。亦都有人話佢用人唔錯，起碼任內提拔嘅總經理陳志雲當年都算搞得有聲有色。依家大台七國咁亂，各有山頭又唔平衡勢力，失去六嬸呢一類可以一錘定音嘅領導層，係咪件好事大家有目共睹。將來點發展真係要自求多福。
（本文純屬作者意見，不代表香港01立場。）