【新電視時代】致ViuTV：唔好食大台老本呀！

ViuTV 嘅電視開台劇《瑪嘉烈與大衛系列綠豆》，擔正嘅係林保怡、廖碧兒、周家怡。雖然都搭返個湯怡同潘燦良，但係成陣味真係好大台。如果真係有心做個新台，開台劇就唔好搵咁多無綫人啦，觀眾會覺得自己仲係睇緊無綫㗎…

我認為啲老本既然係大台嘅，佢自己食返無問題，只係長此下去會坐食山崩。今次講嘅，係其他台食大台老本。

大台身為香港電視界嘅龍頭咁多年，自然培養咗好多有實力嘅人，得一個電視台，好多有潛力嘅人就因為無位上而苦苦等候。開新台用返呢啲人好順理成章，畢竟喺香港開新電視台，無可能一個無綫嘅人都唔用，咁嘅諗法不設實際，亦都攞苦嚟辛。

醒目嘅王維基食無綫嘅老本就食得靚、食得叻喇。HKTV當日搵返嚟拍劇集同綜藝嘅大台舊人，大致可以分四大類：

第一類係好耐無見嘅藝員，好似係梁小冰、劉玉翠；
第二類係做極都唔起嘅二線，好似係周家怡、張松枝；
第三類就係半甘草同甘草，例如係夏雨、郭峰、馮素波、艾威、駱應鈞；
第四類係最少數、回咗少少塘嘅一線演員，即係張可頤、黃日華咁。

想做大　勿再用大台人

除咗第四類，其他三類都可以畀HKTV打造成為「王維基為佢哋提供平台」或者「王維基為佢哋抱打不平」嘅感覺。針對市民積壓多時覺得「一台獨大佢玩晒」嘅不滿，推呢個概念，當然好成功咁就吸引好多支持者。可惜最後HKTV開唔成，如果唔係一鼓作氣，應該可以撞一撞無綫呢座大山，要佢哋驚一驚都好。（希望佢再挑戰會成功。）

不過請留意，王維基除咗食個意念食得靚之外，亦都好實際咁將無綫舊人同埋其他人撈埋一齊。《導火新聞線》王宗堯＋梁小冰＋周家怡＋楊淇；《歲月樓情》夏雨＋鮑姐＋黃日華＋唐寧；《來生不做香港人》張可頤＋劉美君；齣齣都係無綫人再加其他人。主打中嘅主打公投開台劇《選戰》，孭重飛無綫人就只有廖啟智，勉強計埋駱應鈞，其他孭飛演員就係影后李心潔＋舞台劇獎最佳男演員潘燦良＋電視素人王宗堯，明顯完全係唔想有大台陣味。總之用咩人都好，千祈唔好用大台嘅紅人。

之不過你睇下 ViuTV 嘅電視開台劇《瑪嘉烈與大衛系列綠豆》，擔正嘅係林保怡、廖碧兒、周家怡。雖然都搭返個湯怡同潘燦良，但係成陣味真係好大台。如果真係有心做個新台，開台劇就唔好搵咁多無綫人啦，觀眾會覺得自己仲係睇緊無綫㗎！對於一個標榜「電視真開始」嘅新電視台嚟講，咁重大台影子，真係倒自己米。你諗吓，你吸緊嘅係一啲已經唔想睇無綫嘅人喎。

其實 ViuTV 喺網上播緊嘅「等緊開台劇」《瑪嘉烈與大衛》啲選⻆咪幾好囉。六個演員當中，有now TV自己培育嘅黃心美同岑樂怡、有線前新聞主播曾美華，仲有近年電影圈新人朱鑑然。大台味重少少嘅，只有好耐冇喺無綫出現但因為重播《大時代》而hit返嘅邵仲衡。同埋前無綫新聞主播、但係轉咗做獨立電影工作者加自由傳媒人嘅柳俊江。個人嚟講勁鍾意朱鑑然朱仔，同埋曾美華Carman呢一pair，無任何大台味，清新到追住嚟睇呀！諗極都唔明點解電視版嘅開台劇反而無佢哋份。

被大家寄予厚望嘅ViuTV，我想同你講，我唔係要另一個無綫，因為無綫仲喺度。我係要一個新嘅ViuTV呀唔該！

（本文純屬作者意見，不代表香港01立場。）