【藝評．炫舞場】完全唔合格的舞蹈劇場
呢一刻幾個朋友心結未解，充滿怨懟，下一刻冰釋前嫌，互勵互勉，真係「還未決裂已和好」，近乎每一個轉捩點，作品都唔駛經過醞釀，隨時眨一眨眼，劇情都已經發生驚天動地的轉變……野心又大、班底又勁，好似講到萬勿錯過咁，但係！
繼續「藝術大爆炸」之旅，上次睇過表面平平無奇，實際內有乾坤的《FOLK-S，明天你還愛我嗎？》，今次再睇另一個舞蹈作品《炫舞場》。
藝術節落重本 自家製舞蹈劇場
未講作品本身之前，首先要講少少背景，《炫舞場》可以話係今年香港藝術節的重頭戲之一，唔係話因為印到一街都係海報傳單就係重頭戲（呢個反而可能反映到，某一階段節目票房唔掂，所以加大力度救亡，不過呢個又係另一話題，有機會先再講），而係因為節目係由香港藝術節自己擔當監製，屬於藝術節的「自家品牌」，反映著整個節的個性、特質。
相反其他外購節目，在依家全球化、商業化的藝術市場運作中，主要就係用錢，或者加埋人脈就會成事，香港可以做，同樣深圳、上海、台灣，以及新加坡等等，人人都可以做，咁啱你去其他地方旅行工幹，都有機會睇番同一個節目，雖然時空會有唔同，不過單係藝術內容，整體上都係一致的。
例如被譽為「歌劇女神」的俄羅斯女高音安娜．涅翠柯（Anna Netrebko）剛剛在香港藝術節獻出了第一個亞洲演唱會（「首個亞洲演出」亦當然成為了藝術節的宣傳重點），其實三月頭在香港演出完，佢同團隊三月底已經飛到台灣，在台灣國際藝術節上演了亞洲巡迴的另一站，正正就係一種「呢度睇唔到，另一度可以睇番」的演出。
除了自家監製之外，細心睇返整個製作，都可以知道主辦單位對《炫舞場》的重視，例如將作品安排在葵青劇院演藝廳上演，須知道呢個場地係香港依家數一數二的大場，唔計因為其他製作同行政需要而扣起的座位，每場可以容納多達889位觀眾，今次仲要一連十場咁做，規模之大，冠絕本地藝壇，同時票房壓力都唔會細。
俾返少少參考大家，香港三大舞團之一的城市當代舞蹈團，上年年底就在同一場地做過舞蹈劇場《孤寂》，由本地舞壇大師黎海寧，夥拍涉獵寫作、插畫同音樂等跨媒體創作的英國藝術家彼得小話（Peter Suart）聯手打造，作品以諾貝爾文學獎得主馬奎斯（Gabriel García Márquez）名著《百年孤寂》（One Hundred Years of Solitude）為靈感，一度引起藝壇哄動。
不過就算非常叫座，《孤寂》前後都不過只係做了兩場，所以去為一個作品排上一連十場的葵青劇院演藝廳檔期，香港藝術節的野心實在明顯不過。
創作質素唔係睇班底嘅
今次呢個作品，係結合街舞同劇場於一身的「舞劇」（根據官方宣傳，直接叫做”Dansical”，即係相對於音樂劇"Musical"的一種形式），同時班底方面，結集了幾位行內非常有名的創作人，編舞係電影《狂舞派》（三年前的一部香港電影，同樣以舞蹈為主題）的舞蹈總監麥秋成。
至於編劇導演，分別係鄭國偉同鄧偉傑，前者作品包括香港話劇團「社會現實系列」《最後晚餐》和《最後作孽》，後者最近就執導過羅冠蘭主演的翻譯劇《心靈病房》（Wit），觀眾反應都係非常唔錯。
野心又大、班底又勁，好似講到萬勿錯過咁，但係！
創作始終唔係計數，就算1+1+1都好，結果隨時都係1，甚至細過1。
終於講返節目本身，兩個鐘頭入面，接近一個鐘頭十五分鐘都係舞蹈場面，除了開場同結尾的「騷Quali」大舞，中間仲有一連串小舞，有的推進劇情、有的表達情緒，其餘就係無舞跳的戲劇部分。
除咗勁舞就乜都無
作為一套「舞劇」，有舞當然無問題，就算舞好多，都唔特別構成問題（多而唔夠精彩，同埋只顧『演嘢』先係問題……），問題反而出在戲劇部分，在餘下的四十五分鐘入面，故事情節堆砌刻意、人物性格空洞無味，呢一分鐘家姐狠批細佬只顧實踐理想，自私任性，下一分鐘家姐即刻出現一百八十度劇變，驚覺自己原來都係有夢未尋，改為全力支持細佬。
呢一刻幾個朋友心結未解，充滿怨懟，下一刻冰釋前嫌，互勵互勉，真係「還未決裂已和好」，近乎每一個轉捩點，作品都唔駛經過醞釀，隨時眨一眨眼，劇情都已經發生驚天動地的轉變；講開劇情問題，寫寫下先發現，原來一直無講《炫舞場》到底講咩，其實一句可以講完：主角為了學舞，過程排除萬難，最後完滿結局。
上面所講的，嚴格上已經算係「戲劇分析」，不過就算唔用呢個框架去審視作品，《炫舞場》有一個問題仍然好礙眼，甚至較之前所講的「戲劇分析」問題更大，就係作品充斥住好多令人睇到打冷震的價值觀。
要數最致命的一個，亦都即係整個作品所謂的「戲軌」：「我要跳出個未來，我可以點？」係咪覺得熟口熟面？係，因為上面講過果套幾年前的電影，已經講呢樣嘢（「為了跳舞，你可以去到幾盡？」）；係咪有人講過就唔可以再講？唔係，但你至少都要搵到自己方法去講，否則亦未必需要你執人口水尾。
具體上，嗰個所謂「我可以點？」的掙扎，具體呈現在「讀書」同「跳舞」之間的兩難全，同時「尋夢」同「顧家」，又必定產生衝突等等。
如果只係一個初高中學生主理的節目，處處出現呢一種毫無深度的二元對立，大家或者都可以勉勉強強接受，但係如果係一個國際大都會大型藝術節的「自家品牌」創作，如此水準，就真係令人覺得 好 得 人 驚！
全晚浸淫在一種過度典型的價值觀入面，睇住全無合理建立的淺薄劇情同刻板人物，無論場面點樣多元化，舞台、燈光、音響技術水平有幾高，偏偏就係搵唔到片刻的觸動。
（本文純屬作者意見，不代表香港01立場。）