【毛記台慶】鬧乜啫？毛記嚟㗎！
如果我話「鬧乜啫？無綫嚟㗎﹗」一定會畀人剷到上火星。但係如果我話「鬧乜啫？毛記嚟㗎﹗」就可能會有掌聲。不過唔好意思，秉持住我好就讚、唔好就彈嘅原則，毛記電視今次搞《萬千呃Like賀台慶》係要鬧嘅。
先鬧佢主題不清。
毛記之所以成功得到某班人嘅支持，係因為sell二次創作，再結合「反霸權主義」，吓吓都錐住大台嘅節目同埋政府嚟玩。相對於上次分獎禮，今次台慶可以話捉錯用神。新登場嘅葉家寶、卓韻芝、盧冠廷、夏雨、李司棋、趙學而、利嘉兒，唔係話佢哋嘅陣容唔夠上次分獎禮咁強，而係配合唔到反霸權嘅意識。
上次分獎禮點解咁爆？除咗有各路明星登場以示支持毛記，仲係大玩意識形態。唔駛出聲，個個都有種「我唔妥大台」或者「我唔妥政府」嘅形象出晒嚟。河國榮就話「鍾意香港就係香港人，所以佢都係香港人」、MC仁rap埋香港人嘅態度同觀念出嚟，兩個都成為當日最爆嘅環節。
今次喺台慶登場嘅，除咗司棋姐講咗兩句揶揄大台嘅「煮個麵你食」，同埋利嘉兒嘅「普通廣東話新聞報道」之外，呢啲新外援都表示唔到佢哋係為咗「反政府」、「反霸權」而嚟，講嘅嘢亦都唔夠「本土」。各位毛記偽員主理嘅環節，除咗羅若Off嘅「我的恐怖志願」係有時事元素之外，其他連社會性都無。（利君牙同龍志權講自殺我可唔可以唔計呀……）
唔夠「毛記意識」，二次創作部分亦都完全唔見影。
啲人最初鍾意睇毛記，係因為差唔多所有節目都笑數字大台膠，膠到盡頭就係搞笑。依家你講明係呃like嘅台慶喎，點解無汪阿姐DoDo姐主持、無食炭、無飛車、無疊羅漢、無大型又簡單嘅歌舞呢？今次個騷可以話係原創，從頭開始設計要用好多力，亦都唔係二次創作嗰套方法，對於毛記台前幕後嚟講明顯係力不從心。今次林日曦同另外兩位老細批准啲偽員做唔擅長嘅原創，無可能唔知後果，但係都照通過拍板去馬。最有良心咁諗，可能係腦細們想啲偽員趁台慶呢個機會，將8,000位現場觀眾，再加埋透過免費電視觀眾嘅注目機會，畀佢哋一圓演員夢。
嗱，以上都係我估嘅，講到情有可原咁，但唔係製作差劣嘅藉口嚟。正如林日曦第二日喺佢自己facebook咁講，真係差。網上好多人鬧佢哋，但我估都係阿媽教仔咁恨鐵不成鋼居多。支持嘅鬧完會繼續支持，仲有機會嘅。唔做電視台咪做第二樣囉，白紙、黑紙、100毛，去到毛記電視，轉到七彩又精彩，畀啲信心腦細們。
落井下石嘅人就一定有啦，正所謂耶穌都有對頭人，亦都係好多香港人嘅特質。當中唔少人都搵無綫電視同毛記電視做比較，話毛記開到荼蘼，又話今次台慶終於見到真章，仲話二次創作終於走到極限，更加好proud咁話原創先係創意嘅根本。
大佬呀，你搞清楚先。第一，搵毛記同無綫做比較係咪搞笑咗啲呀？一個有50年歷史，成3000幾員工嘅龍頭電視台，仲好意思同一個成立咗1年左右、打正旗號二次創作嘅網上電視台相比？勝之不武吓嘛？
夠膽大大聲話二次創作走到極限就更加戇居啦。毛記惡搞嘅全部都係大台啲經典節目，而呢啲經典節目閒閒地都超過10年歷史。惡搞要有共鳴先會識得笑，重點係本身個材料有人識先有用。依家支持大台嘅人話毛記二次創作終於見底，你立正，諗清楚啲﹗即係你支持嘅大台無嘢再可以畀人抄呀﹗我一早講過，無綫玩完，毛記都會玩完。大台嘅粉絲，如果你真心覺得毛記瀕死，請你望清楚無綫，佢都死得七七八八喇﹗
各有所愛我唔反對，唔同人唔同口味好正常。但係無綫同毛記嘅各位粉絲，清醒啲，畀啲有用嘅意見，先對你鍾意嘅事同埋人有益嘅。
（本文純屬作者意見，不代表香港01立場。）