【少年滋味．影評】９個少年的故事，竟然冇呢樣嘢
睇哂 9 個故事，我發現有一樣最重要嘅野冇出現到，等極都冇。結果我忍唔住同大廚，呀，導演，追單。我覺得最重要但又冇出現嘅係乜嘢？少男少女最關心係乜嘢？照計都係男男女女情情塔塔拍拖暗戀之類…成套戲 9 個男女都冇拍拖冇暗戀冇追人冇比人追？我唔信…當日傳媒場次冇發問環節，但我完場見冇乜人捉住張導，膽粗粗就走埋去問佢。我滿以為係佢嘅主意，抽起我啲「愛情」。張導嘅答案令我十分驚喜……
上篇文寫過《禁藥謊言》（The Program），「搞屎棍」記者 Walsh 將單車之神岩士唐拉下神壇。帶住呢個心情去睇張經緯（下稱「張導」）嘅《少年滋味》，點都有啲「又睇吓你有幾巴閉」嘅心態。
張導當然未算岩士唐，至少我同唔少唔多睇戲或唔多「文化」的朋友講開，都唔知乜水係張經緯。講《音樂人生》就多啲人識，事實上《音樂人生》叫好叫座獲獎無數，確係出色之作。今次《少年滋味》未上映已經備受期待，我亦擔保未來幾日你會讀到好多篇好評。
9 個少年故事各有主題各有煩惱 估佢唔到
咁，張導唔係新人嘛，假假地都6年前已拎金馬獎最佳新晉導演，對佢要求當然高啲。我就帶住一個比較「具批判性」嘅態度入場。一開頭見到合唱《快樂頌》（Ode of Joy），然後訪問名校男女生，你懂的，著長衫果啲女校。嘩，言談間夾雜不少英文，用字精煉發音準確，個Vicky的「V」音標準的沒話說。班學生英文一定好過當年嘅我，甚至好過而家嘅我。加埋屋企堆又「老子」像又哲學書，搞乜春呀大佬？
我細個住居屋，唔算草根子弟。之後都有彈琴彈到唔知幾多級，中學讀所謂的地區名校，讀書成績好好。讀港大後放過下洋，而家偶然都聽下古典音樂會。但我睇到呢度，都不禁覺得，嘩，咁中產咁離地嘅！其他觀眾點算？個個知咩係Alto？
張導好嘢。之後就轉到去講 A cappella（無伴奏合唱）。我正心諗：「最底線都 A cappella呀，嗰陣精英味揮之不去」，張導就講打鼓，講 cosplay，同時間由精英名校，變到普通平民學校。我正心諗：「唔中產，但都離地，避開哂政治喎。」張導好嘢，之後就講中港矛盾，新移民身份，講埋雨傘運動。
真有你的。張導好似識讀心咁，我以為只得A佢就有埋B，以為只係得A同B，佢就有埋C。我相信呢個亦係佢最初揀呢9個故事嘅原因，學校唔同、屋企階層唔同、興趣唔同、煩惱亦唔同。
全戲無冷場但短促 只集中講中學生故事更好
張導的電影技巧非常出色，用鏡頭講故事好純熟，好多剪接位做得好好。唯一要挑剔就係套戲太短。觀眾唔會覺得呃錢，而係覺得「唔夠喉」。80分鐘唔夠，講 9 個故事。真係剛剛投入到已經轉去下一個。事實上套戲拍出嚟全無冷場，拍夠兩個鐘都仲得。甚至可以諗下減走幾個故事。例如兩位小學生嘅故事，以及24歲「義工王」阿Paul嘅故事，都可以另外再拍，倒不如將套戲集中講中學生。畢竟24歲嘅阿Paul同10歲嘅兩位小朋友，係完全兩個世界。
但以上只係好細的瑕疵。真正有趣嘅係，頭先話張導未卜先知，我以為得A佢就有B，以為得A同B佢就有埋C。但睇到最後睇哂9個故事，我發現有一樣最重要嘅野冇出現到，等極都冇。結果我忍唔住同大廚，呀，導演，追單。
我覺得最重要但又冇出現嘅係乜嘢？少男少女最關心係乜嘢？照計都係男男女女情情塔塔拍拖暗戀之類。
回想我中學時期最擔心最困擾嘅，就係溝唔到女！而家嘅小朋友可能冇我咁膚淺，會關心下世界大事普選民主之類，但至少我教書年代，學生同我傾偈，好多時都係講感情事。
成套戲9個男女都冇拍拖冇暗戀冇追人冇比人追？我唔信。甚至發夢諗下渴望愛情都冇？我唔信。當日傳媒場次冇發問環節，但我完場見冇乜人捉住張導，膽粗粗就走埋去問佢。我滿以為係佢嘅主意，抽起我啲「愛情」。
張導嘅答案令我十分驚喜，我慶幸自己有問佢。
失落的愛情 少年主角們「自我審查」避而不談？
張導話我知，其實佢從冇設一個框畀咁多位少年，由得佢哋自由發揮自講，任佢哋講乜。冇出現感情事，就只因佢哋冇講。
呢度就有趣啦。紀錄片唔一定要客觀，唔一定要中立。「真相」好睇你點去拍，可以只係影住隻狗午睡，可以學顏聯武在《森林和原野》咁，當到啲動物係文青般配對白又得，冇話邊種先係「恰當」。肯定嘅係，張導雖則話「任佢哋發揮」，但鏡頭嘅存在，已經係一種干擾。特別係有不少時間，根本係主人翁或家人對住鏡頭講嘢。咁，你期望佢哋會講乜？
我相信張導係個正面嘅人。冇人話一定要拍埋援交吸毒自殺打老母先係「真實」，畢竟而家唔係拍《同班同學》。但連少男少女嘅情事都完全冇掂到，就感覺有點駝鳥，never ask，never tell。我睇你唔到。
點講都好，《少年滋味》一定受好評。特別適合有道德潔癖嘅校長老師或中產家長睇。我都建議每一位讀者去睇，但《少年滋味》係起點，唔係終點。《少年滋味》不錯係少年真實的一面，但只係佢哋願意畀你睇嗰一面。如果以為睇咗《少年滋味》就好了解而家少年人，咁記住睇埋《同班同學》。
話「拋磚引玉」唔多好，套戲唔係「磚」。我最希望《少年滋味》起到帶頭作用，話畀大家知，原來可以咁拍嘅，原來拍紀錄片都有人睇，都可以喺天水圍上。然後有更多人探討到底而家啲少年諗乜。但就唔好叫佢哋對住鏡頭講感受啦，至少都打格仔，否則不如叫佢拍段片上YouTube算啦。
（本文純屬作者意見，不代表香港01立場。）