【劇評】香港話劇團「唱政治」？連讚好都要三思的這生態
「藝文記」喺01博評呢個平台，主要係寫藝評，
睇咗節目，好好或者好差嘅都寫，其他唔痛唔癢，或者無咩感受，一般就「算吧啦」，條線就係咁簡單，
不過前幾晚睇咗香港話劇團全新作品《嗚啦啦啦啦你的歌》，心情就有啲十五十六......
話說呢個騷有現場音樂伴奏、有載歌載舞畫面、有跳得唱得演員，甚至有即場為觀眾作曲填詞嘅互動環節，喺小小一個黑盒入面，可以話係應有盡有，不過標題所講嘅「讚好」，並唔係表面呢浸技術嘢，而係製作團隊心入面果種勇，一種有關免於恐懼、自由創作嘅精神，之不過，點解就連讚好都要三思呢？
睇完簡介都唔知講咩嘅劇
介紹返少少《嗚啦啦啦啦你的歌》係一套點樣嘅作品：
「請即聯絡歌你條命音樂劇有限製作娛樂公司。本公司會為閣下度身訂造『您的歌』，將您人生的精彩片段譜成動人樂章，串成蕩氣迴腸的音樂劇，讓您以好玩好聽的方式跟親朋好友分享自己的故事。」
呢個就係劇團嘅官方陳述。由段簡介開始，已經注定呢個製作係一個異數，事關極少話劇嘅宣傳文字，係你睇完都唔係幾知到底個節目想做啲咩，相反絕大多數都係清清楚楚寫明一個故事，係吸引嘅，你自然就會買飛入場。
喺傳統嘅香港話劇團入面，《嗚啦啦啦啦你的歌》並唔係一套典型嘅「話劇」，首先佢無咩故事，亦都可能因為咁，佢亦寫唔到好具體嘅簡介，扼要咁講，就係一班人來自「歌你條命」公司嘅人，不斷不斷咁唱歌，又不斷不斷咁話你知，其實生命之中咩都可以唱、咩都可以透過歌曲表達同抒發，劇中所謂嘅「角色」，你唔知佢地之間有咩關係、佢地各人係咩背景，就連做咩堅持要唱歌，全部都唔交代，總之就由頭到尾唱唱唱，係咁唱。
曲詞演均有水準
全劇唔夠兩個鐘，一共唱咗8首歌，仲要普遍都係「長歌」，即係唔會唱兩句又做返戲，平心而論，曲詞編都有一定水準，音樂類型夠晒豐富、填詞亦啱音唔太夾硬，其中一個居功至偉嘅，一定係呢套劇嘅作曲、作詞兼演員郭靜雯，呢一位話劇團團員，除咗戲演得紮實，音樂上嘅功力亦都好唔簡單，日後應該仲有大把發揮機會，畢竟全部歌曲都係自己寫，仲要本身有合唱團經驗，全台5個演員入面，佢嘅表現絕對係非常突出。
另外值得一提嘅，就係客席演員馮志佑，之前咁啱睇過佢幾個演出，包括都係同話劇團合作嘅黑盒作品《順風．送水》，佢演嘅係一個送貨員，嗰種社會基層嘅粗獷感同埋草根味，做得好立體，特別係節目採取咗AB Cast嘅安排，即係兩對演員分別演繹同一個劇本，比較之下，更加睇到佢喺塑造角色上嘅能力，另外佢喺 iStage《男人老狗之狗唔狗得起2015》入面飾演主角「豬豬」，無論係惶恐、天真，抑或果敢，每一段每一層嘅演出都好準確分明，令人印象幾深。
今次佢演嘅係「歌你條命」公司其中一員，一開場一開聲，可能未熱身嘅關係，其實唔係特別搶耳，喺音樂劇嘅世界，演員唱成點絕對係關鍵，因為入場前已經有期望，當時仲擔心：「搵佢做到底係咪好嘅選擇呢？」之後好彩慢慢漸入佳境，除咗本身音色幾靚，唔只高音，仲要穩定，同時佢喺唱歌同做戲之間嘅平衡亦拿捏得幾好，音樂劇從來都難做，要保持角色狀態做好每場戲，然後又可以自然流暢咁轉去唱歌，唔係想像咁易。
唱盡1、4、6、7、8、9 「唱生活」點少得「政治」
講咗咁耐，似乎呢個戲都唔錯，但係其實上述所有嘅技術嘢，都唔係寫呢篇文嘅初衷，一開筆話要「讚好」嘅，其實係作品除咗講愛情、親情、家庭、職場之外，仲「大膽」講埋政治，嚴格咁講，作為一套以「生活」為主題嘅戲，《嗚啦啦啦啦你的歌》並無刻意避開政治唔講。
喺今日嘅香港，政治彷彿成為咗禁忌，講下都隨時死於非命，願意去掂，本身已經係勇，而且大家唔好唔記得，話劇團每年拎緊政府一大筆資助，以往藝術上嘅作風亦一直保守，由佢地出手去做，更加係比勇更勇，值得記低呢一筆。
一套本來輕輕鬆鬆嘅音樂劇，一次過赤裸裸唱盡「1」、「4」、「6」、「7」、「8」、「9」，其勇非常可敬、其志絕對可嘉，特別係唔少人都話香港係「偽人」當道嘅呢個時勢，創作人無畏無懼咁講出心中所想，足夠睇到現場觀眾眼淚直流，雖然坦誠面對自己，原本只係好基本嘅事，無論係對藝術家，以至係普通人如你我。
事實上，《嗚啦啦啦啦你的歌》以「生活」為主旨，主體戲軌由出世開始，之後經歷成長、戀愛、婚姻等唔同階段，所有發展都好「貼地」，例如有關「結婚」一段，主題係「新人唔係主角」，重點描述為咗結婚，由搵良辰吉日、見雙方家長，到訂酒席場地、約兄弟姊妹，新人受盡折磨，講呢啲，觀眾永遠都有共鳴，因為內容本身就係來自生活，不過喺共鳴以外仲有幾多驚喜呢？其實又無咩特別。
大半套《嗚啦啦啦啦你的歌》其實都喺呢種「共鳴有餘、驚喜有限」嘅情況下發展，純粹笑下開心下，當然都係可以嘅，或者就如話劇團藝術總監陳敢權喺節目場刊上寫嘅一樣：
「以好歌『拉闊』大家對生活的想像，重拾人生的正能量…為觀眾獻上一晚的歡娛」
企喺呢個角度，曲詞編有水準、演員連場歌舞，加埋現場演奏，製作上已經達標，而且現場所見，觀眾亦都盡慶暢快。
直至臨近完場，幾位「歌你條命」公司嘅成員開始討論：既然生活上咩都可以唱，咁政治係咪都可以呢？
相比起出世、成長、戀愛、婚姻呢啲「話唱就唱」嘅命題，眾人反應明顯唔同，有人覺得並無不可、有人擔心惹人反感，情況就如現實社會一樣，意見分歧，你一言我一語之中，夾雜咗近年社會一啲政治概念，類似「你唔搞政治， 政治都會搞你」等等，最後眾人決心一齊「搞政治」，唱起一首《城市的歌》，節錄如下：
九與七 你有得也有失；七與一 全民族要迎合
一世人 有幾多個十年；其中有五個是永遠不變
八與九 我不太能理解；怎麼六與四 用暴力去清理
年輕的你 說過這不合理；你隻六八狗 已玩弄我太久
坦率表態實抵讚 但如果讚完「有後果」？
唔需要太多解釋，首歌講嘅人同事，非常清楚，甚至可能有人覺得：「咁白嘅？」呢個有關程度深淺嘅問題，見仁見智，絕對可以討論，同時諗深一層，喺一個為自己、為別人發聲都似乎愈來愈難嘅社會，坦率表態呢個基本行為，其實已經好唔容易，更加唔好話呢個製作單位，主要財政命脈都係由政府牢牢掌握住。
補充少少資訊，話劇團係民政事務局每年提供資助嘅九大藝團之一，資助份額佔咗藝團整體收入超過一半，根據藝團2014至15年度年報，政府撥款達到3千9百萬元，大約佔藝團總收入嘅六成五，可以睇到，政府絕對係劇團嘅最大水喉；如果唔太善忘，大家都會記得，同樣拎住政府嘅錢，香港電台王牌節目《頭條新聞》多年來一直以嬉笑怒駡方式評論時事，都曾引起左派人士狠批節目「陰陽怪氣」，話劇團呢次「搞政治」，喺今日方丈當道嘅社會，實在唔能夠唔為佢地擔心。
職業無分貴賤，人人各有崗位，同時社會對唔同行業，又會有唔一樣嘅期望，好似對藝人呢種似乎對社會有影響力嘅人，唔少人都希望佢地有需要、有機會就挺身而出，仗義執言，夠膽觸及一啲所謂嘅禁區，去為一啲所謂嘅禁忌發聲，可惜現實通常都同想像有啲落差，而當主流藝人往往噤聲，劇場中呢一批敢於表達嘅藝術家同創作人，自然就更加可貴。
好嘢係應該要讚，不過如果「被讚」係可能「有後果」，讚之前又真係要諗一諗，不過人地做果個都唔驚，讚果個其實又有咩好怕，最後引用劇中《城市的歌》幾句歌詞共勉一下：
人事皆非難馭駕，寧做灰沙不要啞
化作春土來護花，唯望他朝發新芽
【所有圖片由香港話劇團提供】
（本文純屬作者意見，不代表香港01立場。）