【黃家正 X 鮮魚行學校】分享音樂很快樂　無他

今次表演，異常緊張。

五點起床，冥想一會，嘗試把昨夜的念頭整理。可能性太多，但環境太陌生，一犯錯便滿盤皆落索。不得不小心，但過分的計算會失去氣氛和能量。諗唔通，瞓唔着。

唉，唔好理啦，死就死。今鋪唔可以怯。

去到會場。死火，的士司機唔識路。幸好我是個有準備的藝術家，早到。今次「首演」不容有失。

進入會場，還算鎮定。哎喲！畀個細路撞到。「對唔住啊叔叔！」

「My God，叔……？！」唔緊要，最緊要定。叔叔不行，但叔叔還可以。

等了一會，set機、set琴試琴，再等。心情恍惚。但我面不改容，編輯在場，我唔可以露底。

係喎！唔記得講。我仲要今日皮膚嚴重發炎，面紅耳赤，條頸甩皮，唔係好郁到。好彩多年來訓練有素：明日有明天，明天會更好，見唔到當有運行。只不過……今日冇得打靚仔牌。唔緊要，實力派冇有怕。

編輯問：「有咩expectation？」

「冇。平常心。今天嚟彈琴分享。無他」

好，終於開始。二十幾個黃衫短褲波鞋小學生走進來。他們一般的興奮，應該剛剛考完試，心情還算輕鬆。但一日未開始，我不可以掉以輕心。

播片。Fine, I'm used to it. 鬼叫科技發達咩？

Ok, My turn.

「鮮魚行的同學，今天我很高興來與你們分享音樂。」

分享會兩個月前安排，我忐忑不安了一段日子。古典音樂分享？朋友問會唔會對牛彈琴喎。學校？我做得多，還可以。小學？死火，出名難搞。鮮魚行？佢哋明唔明㗎，可能真係成世未聽過音樂喎。點樣令件事冇咁悶？會唔會太離地？會。佢哋目瞪口呆我點算？

「我要聽月光曲！」

「我知，係貝多芬！」

「土耳其進行曲！」

「李斯特！」

「我要聽奏鳴曲！」

很多時候我們把別人定位，標籤，先入為主認定別人不及資格、不夠水平、太離地貼地，最終建立那無形的距離和欄杆，放棄很多美好的接觸。

最後，那天我沒有分析貝多芬的偉大，沒有彈了半小時一首的奏鳴曲。

跟他們說了音樂可以是情感，可以是氣氛、或是一個意境、回憶。

最最後，與他們分享音樂最最終的真諦：

「真．善． 美——愛」

編輯問怕不怕他們不懂。

怕。我怕我不懂，他們才懂。

（本文純屬作者意見，不代表香港01立場。）