【葉底藏花】劉嘉玲係周星馳扮嘅？從王家衛嘅《東邪西毒》講起
古語有云：「成龍係張學友扮嘅。」咁《東邪西毒》裏面嘅劉嘉玲係邊個扮嘅呢？
話說，《擺渡人》第一輪預告經已出咗，而會喺十二月聖誕檔期上？！係，你冇聽錯，出名拍得慢嘅王導，拍套《2046》閒閒哋五年，今次咁快手就交課，係咪好唔慣呢？咪住，查實今次王家衛只係做監製，導演同埋編劇係《擺渡人》原作者張嘉佳。不過，相信一眾王導嘅影迷會照樣捧場，加上咁耐冇拍喜劇嘅梁朝偉同金城武，睇嚟又會掀起一股王家衛熱潮。所以喺度同各位舊雨新知溫故知新，重溫一下王家衛經典電影嘅八卦軼事。
以下係三條關於《東邪西毒》嘅問題，各位王粉，準備好未？
1. 點解張國榮唔連戲，有時有鬚，有時冇鬚？（難度：1粒星）
正所謂，有圖有真相。一開波左攻右嘅哥哥，青靚白淨，長髮飄逸；右攻左嘅哥哥蓄髮之餘，有鬚亦得，得咗！到底因乜解究會無啦啦轉造型呢？
眾所周知，王導啲戲不嬲都改嚟改去，改到面目全非，搞唔掂又重拍重剪，《東邪西毒》亦唔例外。話說《東邪西毒》開拍之時，王家衛本來屬意張國榮做東邪，梁朝偉做西毒。後來，王導趕唔切交貨，搵佢老友劉鎮偉幫拖，拍咗套《東成西就》頂住先。所以王家衛原初嘅人物設定，唔少都保留喺呢部戲裏面，譬如話：梁朝偉唔係做盲俠，而係做西毒；梁家輝唔係東邪，而係南帝段智興：
| 東成西就 | 東邪西毒 | |
| 東邪 | 張國榮 | 梁家輝 |
| 西毒 | 梁朝偉 | 張國榮 |
| 南帝 | 梁家輝 | / |
| 北丐 | 張學友 | |
後尾王家衛改變主意，又搞咗一輪，就變咗而家呢個版本。不過，交貨之前，王導一如以往，發覺啲片係剪唔埋嘅，因為有啲重要場口係哥哥仲係做緊東邪嗰陣拍落，嗰陣佢散髮披肩兼冇鬚。呢單嘢有相為證，喺開拍影造型嗰陣就見到:
2. 劉嘉玲（原本個角色）係邊個扮（演）嘅？（難度：3粒星）
前面講到，其實《東邪西毒》原本個陣容並唔係咁，除咗之前講過嗰幾個角色，其他嗰啲都嚟咗個大洗牌。劉嘉玲喺而家嘅版本裏面扮演嘅係桃花，盲俠梁朝偉嘅老婆，後尾同東邪梁家輝相戀，但其實梁家輝心目中真正愛慕嘅桃花，係張曼玉－歐陽鋒嘅大嫂，亦都解釋咗東邪後來點解做咗「桃花」島主。
作為王粉嘅你，好可能會懶醒咁答：係周伯通囉。因為你知道只要參考返《東成西就》，你就會知道答案。其實唔止係咁，《東邪西毒》啱啱開拍嗰陣，韓國電視台SBS喺92年探班，拍低咗啲珍貴片段。你會見到劉嘉玲畫粗咗條眉，著上道袍，反串飾演周伯通：
但係咁樣其實只係啱一半！因為我個問題唔係劉嘉玲扮演邊個，而係劉嘉玲係邊個扮嘅，其實係問劉嘉玲原本個角色係由邊位演員扮嘅呢？答案竟然係：
周・星・馳！！！
你有所不知，劉嘉玲原本個角色唔係叫桃花，而係叫至尊寶！邊個係至尊寶？「曾經有一段珍貴嘅對白擺喺你面前，但你唔知，都開估咗你先知道，塵世間最痛苦嘅事⋯⋯」冇錯，就係喺《西遊記第壹佰零壹回之月光寶盒》同埋《西遊記大結局之仙履奇緣》嘅至尊寶。
其實，劉鎮偉成日翻炒王家衛啲橋，甚至將《東邪西毒》原本個構思搬咗入去做《西遊記》嘅開頭。你唔覺得奇怪嘅咩？明明係改編自經典小說《西遊記》，點解一開波係講班山賊遇上春三十娘，神怪片變武俠片？而且，春三十娘呢個角色亦有玄機。不過，呢樣嘢留待以後再講。查實不單止《西遊記》，劉導嘅另一套經典《天下無雙》亦有唔少翻炒《東邪西毒》嘅位，知道答案嘅朋友不妨留言講兩句。
3. 王祖賢飾演嘅係乜嘢角色？（難度：2粒星）
呢個問題就先賣個關子，留待下回分解！各位知道答案嘅朋友可以喺下面留個言。喺未來嘅日子，細佬將會解密更多王家衛電影嘅秘辛，請多多支持！
（本文純屬作者意見，不代表香港01立場。）