【私心預測】2017上位電視女藝員
上一篇預測咗2017年上位嘅電視男藝員，有朋友仔問我咁女藝員呢？唔講咁多，立即睇睇。講明呀，係私心選嚟，純粹個人推介同預測。
袁澧林
袁澧林（Angela）model出身，2015年幫美心拍賀年廣告，通街都係佢個大頭，已經令到唔少人留低印象，有「美心少女」呢個稱號。同劉俊謙一樣，唔計拍廣告嘅話，踏入電視圈嘅頭砲可以話係ViuTV開台前瘋狂播放嘅宣傳片《WEIU》。之後更加喺新台電視劇《三一如三》裏面出現，成為其中一對主角莫志凡（游學修飾）同埋陳旭平（徐肇平飾）嘅劇情催化劑。喺《三》裏面佢係一位農夫，雖然佢以農夫造型出現嘅次數唔多，但係每次都可以carry得到仲仙氣不減，叫得佢做「ViuTV女神」係有原因嘅。
喺《三》裏面已經憑住對愛嘅堅持而擄走咗唔少男少女嘅心（大部分係男啦應該），接住仲會喺ViuTV新劇《瑪嘉烈與大衛系列 前度》當中，擔正做「新瑪嘉烈」。傳聞ViuTV打算日日播，日日見到女神，上位指日可待。
李靖筠又係model出身，李靖筠（Gladys）最令人記得嘅廣告應該係依家日播夜播，晚晚喺大台同你報時嘅特強止痛成藥廣告。2014年，演出過許志安《流淚行勝利道》嘅MV，不過喺裏面軟弱嘅形象，我就覺得同佢有啲格格不入啦。喺ViuTV電視劇《三一如三》裏面，做溫碧霞個囡阿花，爽朗開心就更加討好，似乎亦都接近返佢本身嘅性格。喺劇裡面佢知道自己嘅身世嗰一場戲，亦都證明佢有戲，而且比起好多演員自然得多。
不過最正嘅係Gladys係唱得之人，有個組合叫做Geez，喺facebook page有佢自彈自唱嘅片段，仲有文青類文章。唔怪之得佢喺《三》劇裏面嘅Vincent Café都不停唱歌啦，我最初以為係代唱呀。雖然未知道佢喺2017年有冇電視作品，但我覺得新台捉到鹿要識得脫角，唔好錯過佢啦。呢個世代女神易求，但係爽朗又識得自彈自唱嘅就一定唔多。
麥美恩
今個雞年，差唔多個個無綫嘅賀歲節目，都見到麥美恩（Mayanne）嘅蹤影。大癲大肺嘅佢由選港姐入行，2011年參選時得到第四名，當年嘅冠軍係朱晨麗。選美之後入咗大台做娛樂新聞台嘅主持。喺加拿大長大嘅Mayanne鬼妹仔性格，乜都笑一餐。佢曾經喺森美嘅電台節目當中話過，當年選美畀人話係「龍躉村姑」以為係好嘢嚟，因為佢只係知道龍躉係貴價魚而唔知形容人下盤大，又誤會咗村姑係「鄰家女孩 Girl Next Door」夠親切而唔知人哋話佢娘。不過亦都係呢個樂觀傻傻哋嘅性格令到佢喺大台咁多個藝員當中突圍。始終大笑姑婆呢類定位，喺吳君如、梅小惠之後就後繼無人，Mayanne攝到呢個位應該有排玩。
不過話分兩頭，呢類定位好少喺電視台上到去一線，而眼見Mayanee亦都主要喺主持方面發展，但係《學是學非》是非精之後似乎無以為繼，要再爆出就要等機會。劇集方面，之前Mayanne都有拍過劇集，但係演技就麻麻……簽咗大台嘅經理人合約，希望佢努力進修下，練好功夫等運到。
梁嘉琪
同樣係「是非精」之一嘅梁嘉琪，我覺得係滄海遺珠。喺香港演藝學院畢業，之後加入有線娛樂台，主持經典靈異節目《怪談》，外景爆喊一幕係佢第一次獲得最多人關注嘅娛樂新聞事件。2007年轉投無綫，開始參演劇集。2013年開始成為《學是學非》主持，「是非精」形象令到佢入屋，但好似好多人都唔記得咗佢喺戲劇方面嘅努力。
我記得佢俾人笑得最甘嘅一次，係喺2012年《回到三國》當中飾演諸葛亮（林峯飾）嘅夫人黃月英。體弱多病但係學富五車嘅黃月英去到嘉琪手中，同佢本身個性格太大對比，做得唔太好。不過去到2014年嘅《愛我請留言》，佢做嘅Sa姐宋柳娟就發揮水準，嗰種八婆得嚟又令到你同情佢嘅演繹，係有啲料到。到2015年《師奶Madam》嘅演出亦都保持水平。唔係大台「親生女」嘅梁嘉琪，2016年好似唔見佢喺劇集度出現，希望2017年佢有多啲劇集演出機會。
鄧佩儀
Gloria鄧佩儀喺香港出世，移民加拿大之後再回流香港，參加2013年度《國際中華小姐》奪冠入行。唔可以話佢好似其他選美冠軍咁，得到冠軍之後立即俾大台力捧，但都keep住有機會做戲，同埋主持J2節目《搵食飯團》。老實，佢喺其他劇集嘅演出對我嚟講可以話係無乜印象，一直到2016年嘅台慶劇《幕後玩家》，當中以粗豪形象出現嘅錢嘉欣的確令人眼前一亮。劇裏面同陸永、張繼聰嘅對手戲，堪稱係嗰套劇最好睇嘅交流。（龔嘉欣都演得好，但大部份都係solo嚟）
曾經被大台高層點名話佢有潛質，係2014年第27期藝訓班嘅旁聽生。（俾大台睇中咗先有機會做旁聽生咋，同期仲有陳凱琳同蔡思貝）2017年唔知有咩工作會安排畀佢，但簽咗大台經理人合約，應該多啲機會啩。希望呢下點名，喺大台權鬥到七彩嘅今時今日唔係死亡之吻。
李君妍講李君妍大部分人都唔識，講佢英文名Aurora亦都無乜人有記憶。2009年第24期藝員訓練班出身，畢業就加入大台，但一直都無做過重要角色，最連戲嘅可能係佢之前喺《姊妹淘》成日做示範。最近令人印象深刻啲嘅，可能就係賀歲劇《味想天開》俾李國麟困喺地下室毒打嘅妹仔，或者係《八時入席》裏面做默默耕耘、唔想出名嘅特技女飛人，兩個都做得幾好。李君妍曾經喺2011年參加《功夫新星》，但其實之前佢一啲都唔識功夫，參賽為求多啲曝光率，抵讚。後來以打女身份，畀佢同另一位功夫新星何佩珉博到喺《城寨英雄》有角色，叫做「木蘭花姐妹」，不過又係唔起眼。
無乜人有印象，點解我都覺得佢可以有位上呢？因為大台無呢一類硬朗嘅女演員。冇其他人競爭，如果等到機會就一定諗起佢。再拍《城寨英雄》、《同盟》、《使徒行者》呢一類要打、要硬淨形象嘅女角色，李君妍就有機。大台最興食過翻尋味，呢類劇可能長開長有。佢仲係樂隊Muffy嘅主唱，唱rock呀，夾晒佢嘅硬淨形象。
（文章純屬作者意見，不代表香港01立場。）