【影評．槍狂帝國】奧斯卡竟然無提名，無天理！

今屆奧斯卡，最佳電影，我會揀《槍狂帝國》（Miss Sloane）。最佳女主角，我會揀Jessica Chastain。
兩邊都不獲提名。再望一望，原來係連任何一個提名也沒有。六月飛霜呀！

去年的《焦點追擊》（Spotlight）可以贏取最佳電影，同樣反映社會病態的《槍狂帝國》，就算沒有好過《焦點追擊》，一定不會差過。尤其劇本，以一個亦正亦邪的女說客作重心，先探討美國槍械管理問題，再踢政壇積聚已久的陰暗面，表達手法既見新意，娛樂性又豐富，而且槍頭對準大是大非，並非意識不良。最勁係故事極緊湊，一條伏線勾出下一條伏線，驚喜不絕。完完全全被奧斯卡拒於門外，你話與政治無關，真係搵鬼信。

已經有點接近恐嚇。你唔聽話？你影響到我的利益？你將真相暴露於人間？我就要趕盡殺絕，逼你下年改拍無關痛癢開開心心講理想講愛情的《星聲夢裡人》（La La Land）。你想拍一些社會題材？唔係唔得呀，鬧傳媒鬧宗教，最好改編真人真事，無問題，你唔好踩到班既得利益集團同權力核心嘛。似唔似本地的某選舉？幕後黑手們事前出晒口術，盡力避免唔係自己人的參賽者成功入閘，阻唔到，就開埋聲話即使對手選到都唔會獲得任命。頂，如果係咁，都唔知仲選來為乜。

好啦，你話，你唔喜歡電影的意識，唔喜歡電影講出不能說的潛台詞，唔喜歡電影挑戰權威，唔喜歡電影連美國憲法的神聖不可侵犯也敢批判，所以需要作出懲罰。我只能說一句古今中外天下烏鴉一樣黑。你都無理由連只負責演繹的Jessica Chastain都要打殘吧。本來是純技術性的較量喎。一個演員，尤其女演員，要幾大運氣，要幾強實力，先可以接到一個似Miss Sloane的角色？一個人孭晒成套戲都算，仲要勁多發揮機會，剛中有柔，霸道中見理性，邪中帶善，神秘得來，又見細緻的描寫，去解釋心態和行為的動機。以Jessica Chastain的能力，接到一個變化起伏驚人的角色，沒有失準，足夠震懾觀眾有餘。結果，情願將提名席位交給毫無驚喜的Natalie Portman？Emma Stone是黃袍加身，造王造得咁明顯？無辦法，對太多人來說，贏就係贏，用盡所有不雅手法，也只為贏，不用考慮如何贏得堂堂正正，也不會過問贏得醜陋後，究竟還有沒有認受性。

（本文純屬作者意見，不代表香港01立場。）