【有樓萬事足．博評】下年又有得睇岑應嘅傑作喇

大台終於播完岑應大編審嘅年度大作《有樓萬事足？》，本來我決定由始至終都唔會講呢套嘢，但係我見大家咁大反應，幾乎同特首選戰一樣成為全城熱話，我唔同大家分享我嘅睇法，我覺得對唔住自己對香港電視業僅餘嘅愛，唯有忍到佢播完我先爆。

關於岑編審做節目嘅方法，我喺上一次播《沒有起跑線？》嘅時候已經寫過。對於今次《有樓萬事足？》我無補充，因為佢用返同一個方法去做成件事。今次我寫呢篇文，係想問下各位觀眾大人，你哋點解仲睇佢？

只有一招：金句渲染

由岑應第一次話事去開拍嘅「真人騷」節目開始，每次都係搵個社會熱話做大佢，而做大嘅方法只有一個，搵啲極端「人辦」去講啲大家會討論、甚至會鬧到飛天嘅「金句」。個節目實際講咗啲咩？無人關心、無人記得。每次大台呢啲所謂「真人騷」，都賣自己洞悉世情，講嘅係社會嘅現象，但佢所做嘅立論，就往往只係搵幾個調查報告嘅數字去做「客觀基礎」。唔係話佢啲數字唔啱唔準確，但佢捉到鹿，就會不顧一切咁喺呢個ground上面無限僭建，轉個靚身，好唔客觀咁不停用金句去渲染氣氛。好似今次咁，睇完可能好快乜都唔記得，但一定會記得講「有樓有高潮」嘅嗰位女士，同埋佢嘅獨特氣質。

以低俗引起討論

係呀，一個就夠晒數啦，因為你就算唔開電視睇，你身邊嘅朋友都會講。傳媒亦都會不停訪問佢，令到你知道有呢位女士。知道有呢位女士之後，啲三姑六婆八公嘅社交能力就高咗（但唔代表高質咗），可以搭到嗲，一齊去鬧佢，跟住呢班人就可能會變咗日日睇呢個節目觀眾之一，就係咁，岑編審又贏咗喇。

岑應係醒目嘅，我睇《東張西望》訪問返啲人辦，佢哋話無造馬，所有嘢都係佢哋自願去講，但係製作人士會叫佢哋諗定啲金句先。一個五集嘅節目，佢最少搵十個人辦，當中會搵一個極度想上位嘅人，製作團隊叫佢度定啲金句，佢冇底線做畀你就兩家都開心。如果其他人都有爆返一兩句，以金句做主幹嘅呢系列節目就算係大功告成。因為金句安排喺第一集出街，嗜血嘅傳媒就會煲起個節目，跟住嗜血嘅觀眾會自動波去廣傳。就算無收視，都有人講，娛樂圈定律：bad news better than no news嘛，啱唔啱？

個節目最叻係咩呀？就係只得五集，到各位觀眾大人恍然大悟時，就已經播完喇。恭喜晒呀，下年又有得睇岑應做嘅節目啦！歡唔歡喜？開唔開心呀？

（文章純屬作者意見，不代表香港01立場。）