又。係。煮嘢食

《食平D》都叫做對無綫嘅忠實觀眾有啲新意，但係，《食平DD》、《食平3D》到《暖DD．食平D》，唔好話個內容無變過呀，連個廠景都無變過呀。

係呀，又係肥媽，又係煮嘢食，又係嗰個廠景，又係陸浩明。已經好好喇，唔係好似之前，星期一至五有肥媽，星期日有GiGi姐，日日煮，日日食（唔好意思，我無睇Mark嫂嘅《閨密教煮》，我估大家都無睇）。

煮食節目咁多，個人認為，係因為易拍囉。一個廠，煮嚟煮去都係嗰啲嘢，好唔好食？我隔咗個電視機又唔知呀。但係資訊節目唔係只係有煮嘢食啩。我睇大王同李錦聯，或者Annie喺《都市閒情》教我煮餸就夠喇。《食平D》都叫做對無綫嘅忠實觀眾有啲新意（如果你無睇過肥媽喺有線煮嘢食嘅話），但係，《食平DD》、《食平3D》到《暖DD．食平D》，唔好話個內容無變過呀，連個廠景都無變過呀。資源用得少，一拍拍足幾十集，抵拍得嚟，收視又唔錯，咪繼續拍囉。日日三四個餸，去街市買完返廠煮，然後6號搞吓笑，肥媽鬧下個衰仔，又唔錯喎，入屋嘛，我阿媽都係咁鬧我。

煮嚟煮去　就算綜藝「資訊」節目？

問題係，呢啲係綜藝資訊科節目喎。可能係我一直都誤以為，綜藝資訊節目係要拍嚟娛樂觀眾之餘，仲要有資訊去教育觀眾啦。依家日日煮嘢食，唔係話學唔到嘢，但係學到嘅，都係同一類嘢囉。以前有《獎門人》呢啲純粹玩嘅節目，都仲有一啲學到嘢嘅節目，最鍾意係《向世界出發》同埋《勇闖三極》系列，係呀，台慶重頭綜藝資訊節目嚟嘅，但你睇吓呢幾年，居然台慶十點半時段係《三個小生去旅行》、《Do姐去Shopping》，好睇呀，但係都想睇啲資訊嘢囉唔該。

自從余小姐上台之後，就換晒有線啲嘢過嚟黃金時段，演員方面，除咗翠如BB、洪永城入主劇集之外，仲有有線娛樂台嘅一班老臣子——好似6號、陳貝兒、李潤庭、區永權、衛志豪、莫家淦等等——雄霸資訊節目。用人唯才係好，我覺得大部分人都有料到，不過用人唯親就有問題喎。最可怕係將有線製作節目嘅方法帶嚟無綫。

余氏年代　節目愈來愈小家？

無綫之所以是無綫，唔係亞視、有線、NOW，係因為會做啲大scale嘅節目。不過呢幾年可能因為資金問題，又或者係因為余小姐嚟到話事嘅問題，啲節目就愈來愈小家，無晒大台嘅格調。除咗東華之外，就連台慶同頒獎禮都縮咗水，唉，無眼睇，無興趣睇（包括東華）。

（本文純屬作者意見，不代表香港01立場。）