最緊要，是評審投下的票，真係安安全全放入票箱。個票箱，又開到，不用給差人們粗暴地解開後極速地倒在票海。咁，麥迪文（Matt Damon）都贏到。
今屆奧斯卡，黑人演員不獲提名，大會被抨擊。結果，出場最頻密的，是黑人。
我不談膚色。
教你剪布
今年是改朝換代的一年，因為多了個唔俾得獎者盡情發表感受的措施，搞到人人唸急口令。最緊要快，最緊要短，像在社交媒體發文。無人情味、唔夠莊重，甚至毫不尊重？什麼來的？建議：建制派下次收到上頭命令要剪布，不用搞到如現在般核突。只需在無限資金中抽少少出來，請支樂隊，等反對派議員發言一到兩分鐘即奏樂，音量愈升愈高。殘忍得來不失優雅。
世代交替
以前，你詬病奧斯卡敬老，像史泰龍（Sylverster Stallone），金草莓常客仍然敬業樂業，最值得鼓勵。它今次放棄催淚煽情，唔頒俾龍哥，頒給舞台劇出身的麥克懷倫斯（Mark Rylance）。感人沒有市場，大家情願品嘗新血。最佳女配角艾莉西亞菲瑾德（Alicia Vikander），88年出生；最佳女主角貝兒娜森（Brie Larson），89年。老人家不夠演技或形象可怕，下場一如黃成智。
要有風度
落敗沒有所謂，最緊要有風度。我不是說梁天琦，我說迷你兵團（Minions），閘都入唔到，仍然笑笑口上台頒發最佳動畫短片。無批評大會無眼光、無品味，或者潑婦罵街話其他對手的助選團阻住晒。哪吒唔該學習一下，一如葉劉要參考夏蕙。
大老站台反效果
唔係喎，里安納度狄卡比奧（Leonardo DiCaprio）咪又係等到個影帝，被同情被安慰？佢真係好戲嘛，又沒有流出周浩鼎式眼淚。何況，在我眼中，艾迪烈柏尼（Eddie Redmayne）賽前步步進逼，狄卡比奧唔算勝望壓一的超級熱門。
無得輸的，我以為係Lady Gaga。為校園性侵受害人發聲，政治正確，連美國副總統拜登（Joe Biden）都站埋台造勢。竟然輸俾Sam Smith？幾乎全球都同意《Writing’s on the Wall》不及《Skyfall》的Sam Smith？Lady Gaga唱《Till It Happen to You》，唱到台下觀眾似足《我是歌手》的觀眾，咁都唔俾人攞個獎開心一下？係咪即係唔聽話的，一定要打壓先？還是證明找一些所謂重量級的人物來幫拖，不單止拉唔到票，仲分分鐘有反效果？如果推斷屬實，九月的新界東，無論誰人參選，應該都會求神拜佛湯家驊唔好投自己一票，然後走過來握手影合照。
不過，以上都唔係最緊要。最緊要，是評審投下的票，真係安安全全放入票箱。個票箱，又開到，不用給差人們粗暴地解開後極速地倒在票海。咁，麥迪文（Matt Damon）都贏到。
（本文純屬作者意見，不代表香港01立場。）