【專訪】《撒嬌》《踩過界》Opening製作人:觀眾值得高質片頭

撰文:方以文
出版:更新:

大台終於取消由2015年開始嘅星期一至七2130橫線播劇集策略。今個星期開始周一至五播《賭城群英會》,而周六日就播《踩過界》。同之前嘅「電視電影」系列唔同,今次《踩過界》明顯係臨危受命,見佢都仲係為咗周一至七播放而拍成28集(四個星期 X 7集)。《踩過界》會唔會做炮灰就未知,但係最近網上流出嘅Opening就令人眼前一亮。

剪埋劇中片段當opening

講起大台劇集嘅opening,可以好肉酸,對我嚟足以摧毀成套劇。啲opening通常都係劇透嚟,將啲劇裡面「最精彩」嘅畫面剪埋一齊就算,包括咗對罵、掌摑、飛車、爆炸(連聲)、嚎哭,睇到膩睇到煩。不過《不懂撒嬌的女人》同埋《踩過界》呢兩個劇嘅opening就有啲唔同,有啲驚喜,原來係由大台嘅「品牌傳播科」(CID)主理,製作期足足成個月咁長。

品牌傳播科主理

負責主理《撒嬌》同《踩過界》片頭opening製作嘅CID高級監製Tom Chan話,幾年前其實已經建議過要出力去做片頭,《撒嬌》嘅片頭就係爭取幾年後上頭派落嚟嘅第一個任務,出到嚟各位觀眾都好impressed,到第二季第15集時有所變化亦都提高咗套劇嘅談論度,算係打響咗頭炮。而《踩過界》就係Tom Chan自己爭取去做。

「林志華係我最欣賞嘅監製之一,睇咗幾集初剪之後,好想幫套劇出啲力,就自己舉手話要做。其實當時仲做緊《撒嬌》片頭嘅後期,所以要同步構思《踩過界》嘅片頭。」

觀眾識分好與壞

CID負責大台全部宣傳片同埋網上短片,而做劇集opening嚟講以往只限於處境劇,呢兩次可以話係「做多咗」。

「我覺得opening對一套劇非常重要,簡單嚟講好似一項形象工程咁,着一件啱場合嘅衫、噴濃淡適宜嘅香水、準備啱timing嘅話題,做得好嘅話可以令套劇升格、add value。我希望可以用片頭幫到套劇。」

結果係觀眾對於《撒嬌》嘅片頭有讚冇彈。

「成日都有人話大台嘅觀眾係班盲目嘅師奶,但其實佢哋係一班識分好壞嘅觀眾,會感受到片頭我哋想營造嘅氣氛,亦都會留意到detail位同變化。」

睇返日韓美台劇,一早就已經會為劇集拍opening。有觀眾話呢啲opening質素係基本要求,我都同意,希望無綫唔好再將啲片段剪埋一堆就算數,依家啲觀眾畀《蘭花刼》迫一迫,已經識得熄電視或者轉台,你估仲好似以前咁逆來順受咩?

(本文純屬作者意見,不代表香港01立場。)